ຂປລ. ທ່ານ ສູນທອນ ຄັນທະວົງ ຫົວໜ້າອໍານວຍການໃຫຍ່ ສໍານັກຂ່າວສານປະເທດລາວ KPL ຜູ້ຮັບຜິດຊອບສູນຂ່າວກອງປະຊຸມໃຫຍ່ຜູ້ແທນທົ່ວປະເທດຄັ້ງທີ X ຂອງພັກໄດ້ໃຫ້ສໍາພາດບັນດາສື່ມວນຊົນໃນຕອນບາຍຂອງວັນທີ 18 ມັງກອນ 2016 ນີ້ ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນວ່າ: ໃນຖານະຮັບຜິດຊອບສູນຂ່າວຖືວ່າເປັນກຽດຢ່າງຍິ່ງໃນນາມສື່ມວນຊົນລາວ, ທີ່ໄດ້ຮັບໃຊ້ໃນບັ້ນໂຄສະນາກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 10 ຂອງພັກປະຊາຊົນປະຕິວັດລາວ, ສູນຂ່າວມີ ທຸກພາກສ່ວນຄື: ໜັງສືພິມ, ໂທລະພາບ, ສື່ເອເລັກໂຕຼນິກ, ວິທະຍຸ ແລະ ວາລະສານຕ່າງໆ ທັງພາກລັດ ແລະ ເອກະຊົນ ມີສື່ມວນຊົນທັງພາຍໃນ ແລະ ຕ່າງປະເທດ ໂດຍສະເພາະແມ່ນປະເທດບັນດາເພື່ອນມິດປະກອບມີ: ສປ. ຈີນ ແລະ ສສ. ຫວຽດນາມ, ໃນນັ້ນ ລວມທັງ CRI ແມ່ນສື່ໜຶ່ງທີ່ວ່ອງໄວໃນການລາຍງານຂໍ້ມູນຂ່າວສານ. ເວົ້າລວມແລ້ວສື່ມວນຊົນລາວແມ່ນກຽມພ້ອມໃນການຮັບໃຊ້ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ 10 ຂອງພັກຄັ້ງນີ້, ຖືວ່າທຸກພາກສ່ວນແມ່ນມີການກຽມພ້ອມການຖ່າຍທອດສົດທາງວິທະຍຸ, ທາງໂທລະພາບ ໃນມື້ເປີດພິທີເປີດທຸກພາກສ່ວນ, ໄດ້ເຮັດສໍາເລັດໜ້າທີ່ຖ່າຍທອດສົດລາຍການດັ່ງກ່າວ, ນອກຈາກນັ້ນ, ສື່ມວນຊົນພວກເຮົາຍັງໄດ້ມີການສົ່ງຂ່າວຂຶ້ນສູ່ເວັບໄຊ, ໜັງສືພິມ, ທາງໂທລະພາບ,ວິທະຍຸ , ເຟດບຸກ ແລະ ອື່ນໆ ແມ່ນໄດ້ມີການລາຍງານຂ່າວຢ່າງເປັນລະບົບ. ນອກຈາກນັ້ນ, ສູນຂ່າວຍັງໄດ້ມີການບໍລິການຂໍ້ມູນຂ່າວສານ, ຮູບພາບນັບທັງພາບເໜັງຕີງ ແລະ ພາບນີ້ງ. ອັນນີ້, ຖືວ່າແມ່ນໜ້າທີ່ຂອງບັນດາສື່ມວນຊົນ. ນັກຂ່າວທຸກພາກສ່ວນໄດ້ສຸມຈິດສຸມໃຈ ຮັບໃຊ້ກອງປະຊຸມຄັ້ງນີ້, ໝົດອົກໝົດໃຈ ແລະ ຮູ້ສຶກເປັນກຽດຢ່າງຍິ່ງ.
ທ່ານຍັງກ່າວອີກວ່າ: ໃນນາມປະຊາຊົນລາວຜູ້ໜື່ງ ກອງປະຊຸມຄັ້ງນີ້,ແມ່ນເປັນເຫດການທີ່ສໍາຄັນ ໃນຊີວິດການເມືອງຂອງພັກ ຖືວ່າເປັນເຫດການທີ່ສໍາຄັນທົ່ວປວງຊົນລາວທັງຊາດ ຊື່ງເປັນບ່ອນສະຫຼຸບສັງລວມໃນການຊີ້ນໍາ-ນໍາພາຂອງພັກໃນໄລຍະ 5 ປີຜ່ານມາ ແລະ ພ້ອມກັນນັ້ນ,ກໍ່ໄດ້ມີການວາງທິດທາງ ວິໄສທັດໃນ 5 ປີຕໍ່ໜ້າ, ນັບທັງວິໄສທັດປີ 2030 ເຊິ່ງເປັນເສັ້ນທາງທີ່ພວກເຮົາຈະກ້າວເດີນໄປ ແລະ ພ້ອມກັນນັ້ນ, ເສັ້ນທາງນີ້ແມ່ນມີຄວາມສໍາຄັນທີ່ສຸດໃນການທີ່ຈະມີການເລືອກຕັ້ງຄະນະນໍາ ເພື່ອບໍລິຫານວຽກງານຕາມນະໂຍບາຍທີ່ພັກວາງອອກ. ສະນັ້ນ, ເວົ້າລວມແລ້ວໃນຖານະທີ່ເປັນສະມາຊິກພັກ ຫຼື ເປັນປະຊາຊົນຜູ້ໜື່ງແມ່ນມີຄວາມພໍອົກພໍໃຈໃຫ້ເພິ່ນນໍາພາປະເທດຊາດກ້າວຂື້ນ ເພື່ອສ້າງສາເຮັດໃຫ້ປະເທດຊາດຫຼຸດພົ້ນອອກຈາກຄວາມດ້ອຍພັດທະນາກາຍເປັນປະເທດທີ່ມີການພັດທະນາຄືກັບບັນດາປະເທດອ້ອມຂ້າງເຮົາ.
ໃນການລາຍງານຂ່າວຄັ້ງນີ້, ສໍານັກຂ່າວສານປະເທດລາວໄດ້ສົ່ງນັກຂ່າວ 30 ຄົນ, ເຂົ້າຮັບໃຊ້ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ 10 ຂອງພັກ ໃນນັ້ນ, ປະກອບມີ, ຜູ້ປະຕິບັດວຽກງານຂ່າວ, ຜູ້ເຮັດວຽກງານຖ່າຍພາບ, ແລະ ຮັບຜິດຊອບວຽກງານຕ່າງໆ

ແຫ່ລງຂ່າວ