ລັດຖະບານທຸ່ມງົບປະມານຈຳນວນມະຫາສານເຂົ້າໃນການກໍ່ສ້າງຂົວ 18 ແຫ່ງລຽບແຄມຂອງນັບແຕ່ເທສະບານເມືອງໄກສອນພົມວິຫານຫາເມືອງໄຊພູທອງ ແຂວງສະຫວັນນະເຂດ, ຕັ້ງເປົ້າຈະໃຫ້ສຳເລັດໃນປີ 2019.
ທ່ານ ໄຊຍະເສນ ແກ້ວວິໄລສັກ ຫົວໜ້າຂະແໜງຄຸ້ມຄອງທາງບົກ, ພະແນກໂຍທາທິການ ແລະຂົນສົ່ງແຂວງ ສະຫວັນນະເຂດໄດ້ໃຫ້ສຳພາດກັບນັກຂ່າວພວກເຮົາວ່າ: ເພື່ອເປັນການປັບປຸງ ແລະຍົກລະດັບພື້ນຖານໂຄງລ່າງຈຳເປັນພາຍໃນແຂວງສະຫວັນນະເຂດ ໃຫ້ມີຄວາມສະດວກສະບາຍທັງຮັບປະກັນຄຸນນະພາບທາງພັກ ແລະລັດຈິ່ງໄດ້ ທຸ່ມງົບປະມານຈຳນວນ 139 ຕື້ກວ່າກີບ, ເຂົ້າໃນການກໍ່ສ້າງປັບປຸງຂົວຈຳນວນ 18 ແຫ່ງລຽບຕາມແຄມຂອງທີ່ກວມເອົາໃນຂອບເຂດສອງຕົວເມືອງຄື: ເມືອງໄກສອນພົມວິຫານ ແລະເມືອງໄຊພູທອງ ໃນນີ້ງົບປະມານ 50% ແມ່ນເປັນທຶນຂອງກະຊວງໂຍທາທິການ ແລະຂົນສົ່ງ (ກອງທຶນທາງ) ແລະ ອີກ 50% ແມ່ນເປັນທຶນຂອງແຂວງ, ຕາມແຜນແມ່ນຈະໃຫ້ສຳເລັດໃນປີ 2019, ໂດຍຂົວຈຳນວນທັງໝົດແມ່ນຈະກໍ່ສ້າງເປັນຂົວເບຕົງເສີມເຫຼັກ ຊຶ່ງໃນສົກປີ 2015-2016 ນີ້ ແມ່ນຈະໃຫ້ສຳເລັດ 6 ແຫ່ງຄື: ຂົວຫ້ວຍສົ້ມປ່ອຍ, ຂົວຫ້ວຍຍາງ, ຂົວຫ້ວຍເດື່ອ (ເມືອງໄກສອນ ພົມວິຫານ), ຂົວຫ້ວຍສວນອີ້ງ, ຂົວຫ້ວຍກົບ ແລະຂົວ ຫ້ວຍມະຍະ (ເມືອງໄຊພູທອງ).
ສຳລັບຄວາມຄືບໜ້າຂອງການກໍ່ສ້າງ, ທ່ານ ທິບພະວອນ ສີລາຊາ ຜູ້ອຳນວຍການບໍລິສັດວີແອວພີພັດທະນາກໍ່ ສ້າງຈຳກັດ ຊຶ່ງເປັນຜູ້ຮັບເໝົາໂຄງການ ກ່າວວ່າ: ມາຮອດປະຈຸບັນ ແມ່ນພວມຂຸ້ນຂ້ຽວຈັດຕັ້ງປະຕິບັດໂຄງການດ້ວຍຄວາມເອົາໃຈໃສ່, ມາຮອດດຽວນີ້, ບັນລຸໄດ້ກວ່າ 30% ໂດຍໜ້າວຽກຫຼັກແມ່ນການສ້າງຮາກຖານຂົວ ຫຼື ການຕອກເສົາເຂັມຂອງຂົວທີ່ນັບວ່າເປັນຂັ້ນຕອນການກໍ່ສ້າງທີ່ສຳຄັນກວ່າໝູ່ໝົດ ຖ້າຫາກຜ່ານຂັ້ນຕອນນີ້ແລ້ວໜ້າວຽກອື່ນໆແມ່ນຈະປະຕິບັດໄດ້ຢ່າງວ່ອງໄວ ເນື່ອງຈາກວ່າທາງດ້ານວັດສະດຸອຸປະກອນການກໍ່ສ້າງທີ່ສຳຄັນຕ່າງໆແມ່ນໄດ້ກຽມພ້ອມໄວ້ໝົດແລ້ວ.
ທີ່ມາ: