ການກວດກາເຕັກນິກລົດ ເປັນບັນຫາສຳຄັນສຳລັບນັກຂັບຂີ່ທັງຫຼາຍ ເພື່ອຄວາມປອດໄພໃນເວລາໃຊ້ລົດໃຊ້ຖະໜົນ ໂດຍສະເພາະການເດີນທາງໄກຍິ່ງສຳຄັນ ເພື່ອຮັບປະກັນບໍ່ໃຫ້ລົດມີບັນຫາ ເປັນຕົ້ນ ລົດເປ່ເພລະຫວ່າງການເດີນທາງ ການເກີດອຸບັດຕິເຫດ ແລະ ອື່ນໆ ດັ່ງນັ້ນ ການກວດກາເຕັກນິກລົດເປັນປະຈຳ.
ທ່ານ ນວນໄຊ ພະໄຊສົມບັດ ຫົວໜ້າກອງຄຸ້ມຄອງພາຫະນະ ແລະ ການຂັບຂີ່ ນະຄອນຫຼວງ ໄດ້ກ່າວວ່າ: ເມື່ອກ່ອນການບໍລິການກວດເຕັກນິກລົດໃຫຍ່ ແມ່ນຈະໃຊ້ຄົນເບິ່ງດ້ວຍຕາເປົ່າ ແຕ່ພາຍຫຼັງທີ່ພວກເຮົາໄດ້ກັບຄືນມາຮັບຜິດຊອບວຽກງານນີ້ອີກ ທາງກອງຄຸ້ມຄອງກໍ່ໄດ້ປັບປຸງຈຸດບໍລິການກວດເຕັກນິກ ນັບແຕ່ເດືອນພະຈິກ 2015 ດ້ວຍການໃຊ້ລະບົບເຄື່ອງມືທີ່ທັນສະໄໝ ຄອມພີວເຕີເຂົ້າໃນການກວດເຊັກລະບົບຕ່າງໆຂອງລົດ ໂດຍຜົນອອກມາວ່າຈະຜ່ານ ຫຼື ບໍ່ຜ່ານນັ້ນ ແມ່ນຄອມພີວເຕີເປັນຜູ້ຕັດສິນ ຖ້າຄອມພີວເຕີວ່າຜ່ານ ກໍ່ຜ່ານໄປ ແຕ່ຖ້າວ່າບໍ່ຜ່ານຈຸດໃດ ກໍ່ໄດ້ໃຫ້ເຈົ້າຂອງລົດ ໄປສ້ອມແປງລົດຂອງຕົນເອງ ຢູ່ຮ້ານແປງລົດ ຈາກນັ້ນ ຈຶ່ງກັບຄືນມາກວດຄືນອີກ ຈົນກວ່າຈະຜ່ານ ແລ້ວຈຶ່ງອະນຸຍາດອອກໃບເຕັກນິກໃຫ້ ໂດຍລວມແລ້ວການໃຊ້ລະບົບທັນສະໄໝ ຈະຊ່ວຍເຮັດໃຫ້ການບໍລິການມີຄວາມວ່ອງໄວ ທັນເວລາ ແລະ ມີຄຸນະພາບ ແຕ່ໃນປັດຈຸບັນນີ້ ແມ່ນຍັງຢູ່ໃນໄລຍະທົດລອງ ຄາດວ່າອີກ 3 ເດືອນຂ້າງໜ້າ ຈະສົມບູນແບບ ດັ່ງນັ້ນ ນັກຂັບຂີ່ທັງຫຼາຍ ເມື່ອລົດຕົນເອງໝົດອາຍຸການກວດກາເຕັກນິກ ກໍ່ສາມາດເອົາລົດຂອງຕົນ ໄປກວດເຕັກນິກຄືນໃໝ່ ໄດ້ທຸກເວລາໃນໂມງລັດຖະການ ຖ້າເປັນລົດໃໝ່ແມ່ນປີລະຄັ້ງ ແຕ່ຖ້າເປັນລົດເກົ່າແດ່ 6 ເດືອນຕໍ່ຄັ້ງ ທັງນີ້ກໍ່ເພື່ອຄວາມປອດໄພຂອງເຮົາເອງ ໃນເວລາຂັບຂີ່ລົດ ແລະ ຖືກຕ້ອງຕາມກົດລະບຽບຈະລາຈອນທາງບົກຕື່ມອີກ.
ແຫລ່ງຂ່າວ:
