ຕະຫລອດ​ໄລຍະ​ຜ່ານ​ມາ ພາຍ​ໃຕ້​ການ​ຊີ້​ນຳ-ນຳພາ​ຢ່າງ​​ໃກ້ຊິດ​ຂອງ​ກົມ​ການ​ເມືອງ​ສູນ​ກາງ​ພັກ, ຄະນະ​​ເລຂາທິການສູນ​ກາງ​ພັກ ​ແລະ ລັດຖະບານ ຂະ​ແໜງ​ແຮງ​ງານ ​ແລະ ສະຫວັດດີ​ການ​ສັງຄົມ ​ໄດ້​ຕັ້ງໜ້າ​ປະສານສົມທົບ​ກັບ​ຂະ​ແໜງ​ການ​ຂັ້ນ​ສູນ​ກາງ ​ແລະ ທ້ອງ​ຖິ່ນ​ ​ໃນ​ການ​ປະຕິບັດ​ໜ້າ​ທີ່​ການ​ເມືອງ​ຂອງ​ຕົນ ​ໄດ້​ມີ​ຜົນ​ສຳ​ເລັດ​ຫລາຍ​ດ້ານ.

ທ່ານ ດຣ. ຄຳ​ແພງ ​ໄຊ​ສົມ​ແພງ ​ລັດຖະມົນຕີ​ວ່າການ​ກະຊວງ​ແຮງ​ງານ ​ແລະ ສະຫວັດດີ​ການ​ສັງຄົມ ​ໄດ້​ໃຫ້​ສຳ​ພາດ​ຕໍ່​ນັກ​ຂ່າວ​ໜັງສືພິມ​ລາວ​ພັດທະນາ​ໃນ​​ວັນ​ທີ 13 ມັງກອນນີ້​ວ່າ: 40 ປີ​ແຫ່ງ​ການ​ປົກ​ປັກ​ຮັກສາ ​ແລະ ສ້າງສາ​ພັດທະນາ ​ປະ​ເທດ​ຊາດ ​ແລະ 60 ປີ ພາຍ​ໃຕ້​ການ​ນຳພາ​ຂອງ​ພັກ​ປະຊາຊົນ​ປະຕິ​ວັດ​ລາວ ຂະ​ແໜງ​​ແຮງ​ງານ ​ແລະ ສະ

ຫວັດດີ​ການ​ສັງຄົມ ​ໄດ້​ປະກອບສ່ວນ​ສຳຄັນ​ເຂົ້າ​ໃນ​ການຈັດ​ຕັ້ງ​ປະຕິບັດ​ແນວທາງ​ປ່ຽນ​ແປງ​ໃໝ່​ຢ່າງຮອບດ້ານ ທີ່​ມີ​ຫລັກການ​ຂອງ​ພັກ ​ແລະ ​ແຜນ​ພັດທະນາ​ເສດຖະກິດ-ສັງຄົມ ຂອງ​ລັດ​ຖະບານ, ​ໂດຍ​ສະ​ເພາະ ​ແຜນ​ນະ​ໂຍບາຍ​ດ້ານ​ແຮງ​ງານ ​ແລະ ສະຫວັດດີ​ການ​ສັງຄົມ​ຂອງ​ຂະ​ແໜງ​​ແຮງ​ງານ ​ໄດ້​ຮັບ​ການ​ເອົາ​ໃຈ​ໃສ່​ຢ່າງ​ຕັ້ງໜ້າຄື: ​ໃນ 5 ປີຜ່ານມາ​ການ​ພັດທະນາ​ສີມື​ແຮງ​ງານ ບັນລຸ​ໄດ້ 240.000 ກວ່າ​ຄົນ, ​ເປັນ​ຍິງ 110.000 ກວ່າ ຄົນ, ລື່ນ​ຄາດໝາຍແຜນການວາງ​ໄວ້ 12,26%, ສາມາດຈັດ​ຫາວ​ຽກ​ເຮັດ​ງານ​ທຳ​ໃຫ້​ພົນລະ​ເມືອງລາວ​ໄດ້​ທັງ​ໝົດ 340.000 ກວ່າ​ຄົນ, ລື່ນ​ແຜນການ 24,18%, ​ເຮັດ​ໃຫ້ອັດຕາ​ສ່ວນ​ຂອງ​ການ​ມີ​ວຽກ​ເຮັດ​ງານ​ທຳ​ໃນ​ຂົງ​ເຂດອຸດສາຫະກຳ​ເພີ່ມ​ຂຶ້ນ 37,3% ​ແລະ ຂົງ​ເຂດ​ບໍລິການ​ເພີ່ມ​ຂຶ້ນ 14,2%, ຄ່າ​ແຮງ​ງານ​ຂັ້ນ​ຕ່ຳ​ຂອງ​ຜູ້​ອອກ​ແຮງ​ງານ​ໃນ​ຂົງ​ເຂດ​ທຸລະ​ກິດ​ໄດ້​ຮັບ​ການ​ປັບປຸງ​ເພີ່ມ​ຂຶ້ນ 158,6%, ສິດ ​ແລະ ຜົນ​ປະ​ໂຫຍ​ດຂອງ​ຜູ້​ອອກ​ແຮງ​ງານ ​ແລະ ຂອງ​ຜູ້​ໃຊ້​ແຮງ​ງານ ກໍ​ໄດ້​ຮັບ​ການ​ປົກ​ປ້ອງ​ຕາມ​ລະບຽບ​ກົດໝາຍ, ການ​ປະຕິບັດ​ນະ​ໂຍບາຍ​ຕໍ່​ພະນັກງານ​ປະຕິວັດ​ຜູ້​ອາວຸ​ໂສ​ທີ່​ມີ​ຜົນງານ​ ​ແລະ ຄຸນງາມຄວາມດີ​ຕໍ່​ປະ​ເທດ​ຊາດບັນລຸ​ໄດ້ 15.167 ທ່ານ ລວມ​ເປັນ​ເງິນ​ປະມານ 300 ຕື້​ກວ່າ​ກີບ, ຕາໜ່າງການ​ປົກ​ຄຸມ​ປະກັນ​ສັງຄົມ ​ແລະ ປະກັນ​ສຸຂະພາບ​ກວມ​​ເອົາ 30,22% ຂອງ​ພົນລະ​ເມືອງ, ການ​ຊ່ວຍ​ເຫລືອ​ສົງ​ເຄາະ​ປະຊາຊົນ ຜູ້​ໄດ້​ຮັບ​ຜົນ​ປະ​ໂຫຍ​ດຈາກ​ໄພພິບັດ​ທາງ​ທຳ​ມະ​ຊາດ ​ແລະ ສັງຄົມ ​ໄດ້​ຫລາຍ​ກວ່າ 2 ​ແສ​ນຄອບຄົວ, ລວມມີ 1,1 ລ້ານ​ກວ່າ​ຄົນຄິ​ດ​ເປັນ​ເງິນ​ປະມານ 49 ຕື້​ກວ່າ​ກີບ, ການ​ເບິ່ງ​ແຍງ​ດູ​ແລ​ຜູ້​ດ້ອຍ​ໂອກາດ​​ໃນ​ສັງຄົມ ໄດ້​ຮັບ​ການ​ເອົາ​ໃຈ​ໃສ່, ບັນດາ​ນິຕິ​ກຳ​ໃນ​ຂົງ​ເຂດ​ແຮງ​ງານ ກໍ​ໄດ້​ຮັບ​ການ​ສ້າງ​ຕັ້ງ ​ແລະ ປັບປຸງ​ຢ່າງ​ເປັນ​ລະບົບຄົບ​ຖ້ວນຫລາຍ​ຂຶ້ນ, ການ​ແຂ່ງຂັນ​ຮັກ​ຊາດ ​ແລະ ພັດ​ທະ​ນາ​ຕິດ​ພັນ​ກັບ​ວຽກ​ງານ 3 ສ້າງ ​ມີ​ຜົນສໍາເລັດ​ສຳຄັນ​​ຫລາຍ​ດ້ານ, ​ເຮັດ​ໃຫ້ການ​ບໍລິຫານ ​ແລະ ການ​ຄຸ້ມ​ຄອງ​ມະຫາ​ພາກ​ດ້ານ​ແຮງ​ງານ ​ແລະ ສະຫວັດດີ​ການ​ສັງຄົມ ​ມີ​ການ​ປ່ຽນ​ແປງ​ຢ່າງ​ເລິກ​ເຊິ່ງ ​ແລະ ມີ​ບາງ​ດ້ານ​ລື່ນ​ຄາດໝາຍ​ຢ່າງ​ໜ້າ​ສັນລະ​ເສີນ. ຕໍ່​ຜົນສຳ​ເລັດ​ທີ່​ກ່າວ​ມາ​ຂ້າງ​ເທິງ​ນີ້, ຍ້ອນ​ມີ​ແນວທາງ​ນະ​ໂຍບາຍ​ທີ່​​ສອດຄ່ອງ​ຂອງ​ພັກ ​ແລະ ລັດຖະບານ ຈຶ່ງ​ເຮັດ​ໃຫ້​ກະຊວງ​ແຮງ​ງານ ​ແລະ ສະຫວັດດີ​ການ​ສັງຄົມ ປະຕິບັດ​ໜ້າ​ທີ່ວຽກ​ງານຂອງ​ຕົນມີ​ຄວາມ​ຄືບ​ໜ້າ​ສູງ. ​ແຕ່​​ເຖິງ​ຢ່າງ​ໃດ​ໃນ​ຕໍ່ໜ້າ​ນີ້, ວຽກ​ງານ​​ແຮງ​ງານ ​ແລະ ສະຫວັດດີ​ການ​ສັງຄົມ ຍັງ​ຕ້ອງ​ໄດ້​ເອົາ​ໃຈ​ໃສ່​ໃຫ້​ເລິກ​ເຊິ່ງ ຕາມ​ທິດ​ຊີ້​ນຳ​ນຳພາ​ຂອງ​ພັກ​ໃຫ້​ໜັກ​ແໜ້ນ​ກວ່າ​ເກົ່າ.

ແຫ່ລງຂ່າວ