ຂປລ. ຂະ​ແໜງ​ພະລັງງານ-​ໄຟຟ້າ ​ໄດ້​ຄາດ​ຄະ​ເນຄວາມ​ຕ້ອງການ​ພະລັງງານ​ໄຟຟ້າ ທົ່ວ​ປະ​ເທດ ສະ​ເລ່ຍ​ເພີ່ມ​ຂຶ້ນປະມານ 18-20% ຕໍ່​ປີ, ຄວາມ​ຕ້ອງການ​ຊົມ​ໃຊ້​ໄຟຟ້າ​ສູງ​ສຸດ ​ໃນ​ປີ 2015 ​ແມ່ນ 989 MW. ຮອດ​ປີ 2030 ​ເພີ່ມ​ຂຶ້ນ​ເປັນ 7.093 MW. ​ເຊິ່ງ​ໄຟຟ້າລາວ ຕ້ອງມີ​ແຫ​ລ່ງຜະລິດ​ແຮ​ໄວ້​ໃຊ້​ໃນ​ກໍລະນີ​ສຸກ​ເສີນຢ່າງ​ຕ່ຳ 30% ຂອງ​ຄວາມ​ຕ້ອງການ​ໃນ​ປີ​ນັ້ນໆ.

ທ່າ​ນ ສີ​ສະຫວາດ ທິຣະວົງ ຜູ້ອຳນວຍການ​ໃຫຍ່ ລັດ​ວິ​ສາ​ຫະກິດ​ໄຟຟ້າ​ລາວ ​​ໃຫ້ຮູ້​ວ່າ: ເພື່ອ​ເຮັດ​ໃຫ້​ລະບົບ​ໄຟຟ້າ​ມີ​ຄວາມ​ໝັ້ນ​ຄົງ ​ໄຟຟ້າລາວ ຕ້ອງມີ​ແຫ​ລ່ງຜະລິດ​ແຮ​ໄວ້​ໃຊ້​ໃນ​ກໍລະນີ​ສຸກ​ເສີນຢ່າງ​ຕ່ຳ 30% ຂອງ​ຄວາມ​ຕ້ອງ ການ​ໃນ​ປີ​ນັ້ນໆ. ສ່ວນ​ການ​ດຸ່ນດ່ຽງ​ພະລັງງານ​ໄຟຟ້າ​ທົ່ວ​ປະ​ເທດ ​ແຕ່​ປີ 2016 ​ເປັນ​ຕົ້ນ​ໄປ​ ແມ່ນ​ເຫລືອ​ຊົມ​ໃຊ້​ພາຍ​ໃນ​ປະ​ເທດ ໝາຍ​ຄວາມ​ວ່າ ​ໄຟຟ້າ​ລາວ ຕ້ອງ​ໄດ້​ສົ່ງ​ໄຟຟ້າ​ອອກ​ຕ່າງປະ​ເທດ ປະມານ 1.400 GWh ​ໃນ​ປີ 2016 ​ແລະ ​ເພີ່ມ​ຂຶ້ນ​ເປັນ 10.000 GWh ​ໃນ​ປີ 2025.

ປັດຈຸບັນ ທົ່ວ​ ປະ​ເທດ​ມີ​​ແຫ​ລ່ງຜະລິດ​ກະ​ແສ​ໄຟຟ້າ​ດ້ວຍ​ພະລັງງານ​ນ້ຳ ​ແລະ ພະລັງງານ​ຄວາມ​ຮ້ອນ ​ທັງ​ໝົດ 38 ​ແຫ່ງ ມີ​ກຳລັງ​ຕິດ​ຕັ້ງ 6.264,8 ​ເມ​ກາ​ວັດ, ສາມາດ​ຜະລິດ​ພະລັງງານ​ໄດ້ 33.315,1 ລ້ານ​ກິ​ໂລ​ວັດ​ໂມງ​ຕໍ່​ປີ ທຽບ​ໃສ່​ປີ 1975 ​ເພີ່ມ​ຂຶ້ນ​ເກືອບ 200 ​ເທົ່າ​ຕົວ, ສາມາດ​ຕອບ​ສະໜອງ​ການ​ຊົມ​ໃຊ້​ກະ​ແສ​ໄຟຟ້າ​ພາຍ​ໃນ​ປະ​ເທດ ​ກວມ 89,6% ຂອງ​ຈຳນວນ​ຄອບຄົວ​ໃນ​ທົ່ວ​ປະ​ເທດ.

ແຫລ່ງຂ່າວ: