ເພື່ອເປັນການປຸກລະດົມ ແລະ ສ້າງຈິດສໍານຶກໃຫ້ແກ່ບັນດານ້ອງນັກຮຽນພາຍໃນໂຮງຮຽນປະຖົມສົມບູນຈອມມະນີ ໄດ້ຮັບຮູ້ ເຂົ້າໃຈກ່ຽວກັບວິທີປ້ອງກັນ ແລະ ການກໍາຈັດແຫຼ່ງເພາະພັນຍຸງລາຍທີ່ຖືກຕ້ອງ ຢ່າງມີປະສິດທິພາບ ຮວມໄປເຖິງສາເຫດຂອງການເປັນພະຍາດໄຂ້ຍຸງລາຍ ຜົນຮ້າຍ ແລະ ໄພອັນຕະລາຍຂອງຍຸງລາຍ ໂດຍປະຕິບັດຄໍາຂວັນ 5 ປ ຂອງກະຊວງສາທາລະນະສຸກວາງອອກຢ່າງເຄັ່ງຄັດ ເຊັ່ນ ປິດຝາພາຊະນະນຳໃຊ້ໃນເຮືອນ ແລະ ນອກເຮືອນ ເພື່ອບໍ່ໃຫ້ຍຸງໄຂ່ໃສ່ ປ່ຽນນ້ຳໃນພາຊະນະ ເຕົ້າດອກໄມ້ ນ້ຳຮອງຕີນຕູ້ ຖ້ານຮອງຈອກນ້ຳ ປ່ອຍປາຫາງນົກຍຸງເພື່ອໃຫ້ກິນໜອນນ້ຳຍຸງລາຍ ປັບປຸງ ໂດຍການເຮັດອະນາໄມສິ່ງແວດລ້ອມອ້ອມເຮືອນ ບໍ່ໃຫ້ມີກະໂປະ ກະປ໊ອງ ຢາງຕີນລົດທີ່ມີນ້ຳຂັງ ແລະ ປະຕິບັດໃຫ້ເປັນນິໄສເປັນປະຈຳທຸກໆວັນ ຈິ່ງຈະສາມາດປ້ອງກັນການເປັນພະຍາດໄຂ້ຍຸງລາຍໄດ້ ພ້ອມກັນນັ້ນ ເມື່ອເວລາ ເປັນໄຂ້ກໍຄວນໄດ້ໄປປຶກສາແພດຢູ່ຕາມສຸກສາລາ ຫຼື ໂຮງໝໍໃກ້ເຮືອນ ສິ່ງສໍາຄັນແມ່ນບໍ່ຄວນຊື້ຢາມາກິນເອງ ເຊິ່ງຈະເຮັດໃຫ້ພະຍາດດື້ຢາ ແລະ ເປັນອັນຕະລາຍຕໍ່ສຸຂະພາບເຖິງຂັ້ນເສຍຊີວິດ.
…….ພິທີສາທິດໃຫ້ຄວາມຮູ້ແກ່ນັກຮຽນໂຮງຮຽນປະຖົມສົມບູນບ້ານຈອມມະນີ ກ່ຽວກັບວິທີປ້ອງກັນ ແລະ ກໍາຈັດແຫຼ່ງເພາະພັນຂອງຍຸງລາຍ ໄດ້ຈັດຂຶ້ນໃນຕອນເຊົ້າວັນທີ 09 ມັງກອນ 2016 ທີ່ວັດບ້ານຈອມມະນີໃຕ້ ເມືອງໄຊເຊດຖາ ນະຄອນຫຼວງວຽງຈັນ ໂດຍການເຂົ້າຮ່ວມຂອງທ່ານ ດຣ. ຄັນທະລາດ ພິລາພັນເດດ ຫົວໜ້າຫ້ອງການສາທາລະນະສຸກເມືອງໄຊເຊດຖາ ມີອໍານາດການປົກຄອງບ້ານ ພະນັກງານແພດ ບັນດາຄູອາຈານ ແລະ ນ້ອງນັກຮຽນເຂົ້າຮ່ວມ.
ແຫ່ລງຂ່າວ
