ຂປລ.​ກອງ​ປະຊຸມ​ແລກປ່ຽນ​ບົດຮຽນ ​ກ່ຽວ​ກັບ​ການ​ຄວບ​ຄຸມ​​ເຄື່ອງ​ດື່ມ​ທີ່​ມີ​ທາດ​ເຫລົ້າ ​ແລະ ບັນດາ​ນະ​ໂຍບາຍ​ທີ່​ກ່ຽວຂ້ອງ​​ ​ ​ໂດຍ​ການ​ເຂົ້າ​ຮ່ວມ​ຂອງ​ຜູ້ຕາງໜ້າ​ຈາກ​ສະພາ​ແຫ່ງ​ຊາດລາວ ຫວຽດ ນາມ, ກໍາ​ປູ​ເຈຍ ​ແລະ ຜູ້ຕາງໜ້າ​ອົງການ​ຈັດ​ຕັ້ງ​ສາກົນ ​ເຊິ່ງຈັດ​ຂຶ້ນ​ໃນ​ວັນ​ທີ 11 ມັງກອນ ນີ້​ຢູ່​ນະຄອນຫລວງ​ວຽງ​ຈັນ.

ທ່ານ ດຣ. ຊົມ​ພູ ດວງ​ສະຫວັນ ຮອງ​ປະທານ​ກຳ​ມະ​ທິການ​ວັດທະນະທຳ-ສັງຄົມ ສະພາ​ແຫ່ງ​ຊາດ​ລາວ​ໃຫ້​ຮູ້​ວ່າ: ​ກອງ​ປະຊຸມ​​ໃນ​ຄັ້ງ​ນີ້ ​ເພື່ອ​ແລກ​ປ່ຽນບົດຮຽນ​ເຊິ່ງກັນ ​ແລະ ກັນ ລະຫວ່າງ ສະມາຊິກ​ສະພາ​ແຫ່ງ​ຊາດ​ຈາກ 3 ປະ​ເທດ ລາວ, ກໍາປູ​ເຈຍ ​ແລະ ຫວຽດນາມ,  ​ແລະ ຂະ​ແໜງ​ການ​ທີ່​ກ່ຽວຂ້ອງ ​ໃນ​ຂະ​ບວນການ​ສ້າງ ​ແລະ ປັບປຸງ​ກົດ   ໝາຍ​, ລະບຽບ​ການ​ຕ່າງໆ​ກ່ຽວ​ກັບ​ການ​ຄວບ​ຄຸມ​ເຄື່ອງ​ດື່ມ​ທີ່​ມີ​ທາດ​ເຫລົ້າ ​ແລະ ຫລຸດຜ່ອນ​ຜົນ​ກະທົບ​ຈາກ​ການ​ຊົມ​ໃຊ້​ເຄື່ອງ​ດື່ມ​ທີ່​ມີ​ທາດ​ເຫລົ້າ, ທັງ​ເປັນການ​ປະກອບສ່ວນ​ເສີມ​ຂະຫຍາຍ​ສາຍ​ພົວພັນ​ມິດຕະພາບ ​ແລະ ການ​ຮ່ວມ​ມື ລະຫວ່າງ ອົງການ​ນິຕິບັນຍັດ​ ຂອງ​ສາມ​ປະ​ເທດ​ໃຫ້​ແໜ້ນ​ແຟ້ນຍິ່ງໆ​ຂຶ້ນ ກາຍ​ເປັນ​ແຮ​ງຊຸກ​ດັນ ​ເພື່ອ​ບັນລຸ​ເປົ້າ​ໝາຍ​ການ​ພັດທະນາ​ແບບ​ຍືນ​ຍົງ ​ແລະ ​ເຊື່ອມ​ໂຍງ​ເຂົ້າ​ປະຊາ​ຄົມ​ເສດຖະກິດ​ອາ​ຊຽນ ​ແລະ ​ເສົາ​ຄໍ້າ​ອື່ນໆ​ຂອງ​ອາ​ຊຽນ. ສູ້​ຊົນ​ເຮັດ​ໃຫ້​ຂົງ​ເຂດ​ສາມ​ປະ​ເທດ​ສາມາດ​ຫລຸດ​ຜ່ອນ​ຄວາມ​ສ່ຽງ ​ແລະ ຄວາມ​ເສຍ​ຫາຍ​ທີ່​ມີ​ສາຍ​ເຫດ​ກ່ຽວ​ກັບ​ທາດ​ເຫລົ້າ.

​​​ການ​ດື່ມ​ເຄື່ອງ​ດື່ມ​ທີ່​ມີ​ທາດ​ເຫລົ້າ​ແມ່ນມີ​ຜົນ​ກະທົບ​ອັນ​ໃຫຍ່​ຫລວງ​ຕໍ່​ກັບ​ຮ່າງກາຍ, ຈິດ​ໃຈ​ຂອງ​ບຸກຄົນ, ຄອບຄົວ ​ແລະ ສັງຄົມ ​ເປັນສາ​ເຫດ​ຕົ້ນຕໍພາ​ໃຫ້​ເກີດ​ພະຍາດ​ຫລາຍ​ກວ່າ 200 ຊະນິດ ​ແລະ ອຸປະຕິ​ເຫດ​ຈໍາ​ນວນ 3,8% ຂອງຈໍານວນ​ຜູ້​ເສຍ​ຊີວິດ​ທັງ​ໝົດ ​ແມ່ນ​ມີ​ສາ​ເຫດ​ຈາກ​ທາດ​ເຫລົ້າ 4,5% ຂອງ​ພາວະ​ການ​ເຈັບ​ປ່ວຍ, ​ເປັນ​ປັດ​​ໄຈ​ອັນ​ດັບ​ສາມ​ຂອງ​ການ​ເຈັບ​ປ່ວຍ ​ແລະ ການ​ເປັນ​ພະຍາດ​ໃນ​ບັນດາ​ປະ​ເທດ​ກໍາລັງ​ພັດທະນາ. ນ​ອກຈາກນັ້ນ ​ເຄື່ອງ​ດື່ມ​ທີ່​ມີ​ທາດ​ເຫລົ້າ ​ຍັງ​ສົ່ງ​ຜົນ​ກະທົບ​ທາງ​ລົບ​ ຕໍ່​ການ​ພັດທະນາ​ເສດຖະກິດ-ສັງຄົມ ​ຂອງ​​ປະ​ເທດອີກ​ດ້ວຍ.

ແຫ່ລງຂ່າວ