HTC ຜູ້ຜະລິດສະມາດໂຟນຈາກໄຕ້ຫວັນ ໄດ້ເປີດເຜີຍລາຍງານທາງການເງິນສຳລັບ ປີ 2015 ອອກມາ, ເຊິ່ງເຜີຍໃຫ້ເຫັນວ່າ ປີ 2015 ນີ້ມີຍອດຂາຍຫຼຸດລົງຫຼາຍກວ່າ 35%. ສຳລັບລາຍຮັບຂອງບໍລິສັດໃນປີທີ່ຜ່ານມາຢູ່ທີ່ 121.68 ພັນລ້ານ NTD ($3.65 ພັນລ້ານ), ຫຼຸດລົງຈາກ 187.91 ພັນລ້ານ NTD ($5.64 ພັນລ້ານ) ໃນປິ 2014.
*ໝາຍເຫດ: NTD ແມ່ນສະກຸນເງິນດອນລາໄຕ້ຫວັນ
ເຊິ່ງປີກ່ອນນີ້ ລາຍຮັບຂອງທາງ HTC ໃນເດືອນພະຈິກນັ້ນກ້າວກະໂດດຂຶ້ນຫຼາຍແລະສູງທີ່ສຸດພາຍໃນ 6 ເດືອນທີ່ຜ່ານມາ, ເຮັດໃຫ້ເຮົາເຊື່ອໄດ້ວ່າ One A9 ນັ້ນມີສ່ວນສຳຄັນຫຼາຍໃນເລື່ອງນີ້, ແລະຄາດຫວັງໄວ້ສູງວ່າລາຍຮັບຈະເພີ່ມຂຶ້ນອີກໃນຊ່ວງເດືອນທັນວາ ເພາະເປັນຊ່ວງເທດສະການວັນພັກ,ເທດສະການອື່ນໆລວມໄປເຖິງສົ່ງທ້າຍປີເກົ່າຕ້ອນຮັບປີໃໝ່
ຢ່າງໃດກໍຕາມໃນເດືອນທັນວາ ທີ່ຄາດການໄວ້ວ່າລາຍຮັບຈະເພີ່ມສູງຂຶ້ນພັດວ່າຫຼຸດລົງຫຼາຍກວ່າເດືອນພະຈິກ ຄືຫຼຸດລົງເຖິງ 36.64% ເປັນຈຳນວນ 6.52 ພັນລ້ານ NTD ($195.7 ລ້ານ), ແລະຫຼຸດລົງກວ່າ 57.08% ເມື່ອທຽບກັບເດືອນທັນວາປີ 2014. ໃນປີນີ້ HTC ຄົງກຳລັງເນັ້ນໄປທີ່ການເປີດໂຕຊຸດຫູຟັງ Vive VR, ເຊິ່ງການເປີດສັ່ງຈອງຈະເລີ່ມຂຶ້ນໃນເດືອນກຸມພານີ້ ແລະເປັນຕາສົົນໃຈວ່າບໍລິສັດຈາກໄຕ້ຫວັນນັ້ນຈະຫຼຸດພົ້ນອອກຈາກບັນຫາດັັ່ງກ່າວນີ້ໄດ້ແນວໃດ
ທີ່ມາ:gsmarena