ປລ. ລາວຈະຕ້ອງໄດ້ຊຳລະໜີ້ໂຄງການດາວທຽມດວງທຳອິດຂອງລາວ ຈຳນວນ 341 ລ້ານກວ່າໂດລາສະຫະລັດ ແລະ ດອກເບ້ຍໃຫ້ລັດຖະບານ ສປ ຈີນ, ໃຫ້ສຳເລັດ ໃນປີ 2033 ພາຍຫລັງທີ່ໄດ້ກູ້ຢືມເງິນຈຳນວນ 258 ລ້ານໂດລາສະຫະລັດ, ມາດຳເນີນໂຄງການດັ່ງກ່າວ.
ໃນໂອກາດລາຍງານ ກ່ຽວກັບໂຄງການດາວທຽມລາວ ຕໍ່ກອງປະຊຸມສະໄໝສາມັນ ເທື່ອທີ 10 ຂອງສະພາແຫ່ງຊາດ ຊຸດທີ VII, ທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ ໄດ້ມີຄຳເຫັນວ່າ: ການຊຳລະໜີ້ໂຄງການດາວທຽມລາວ ແມ່ນຈະຫັກເອົາ 80% ຂອງກຳໄລທຸລະກິດດ້ານດາວທຽມ ເພື່ອມອບໃຫ້ລັດຖະບານ ນຳໄປແທນຄືນແກ່ລັດຖະບານ ຈີນ ໂດຍມີໄລຍະການດຳເນີນໂຄງການ ທັງໝົດ 15 ປີ ເຊິ່ງໂຄງການນີ້ ແບ່ງອອກເປັນສອງໄລຍະຄື: ການດຳເນີນການດ້ານເຕັກນິກຕ່າງໆ ຈົນເຖິງການສົ່ງດາວທຽມຂຶ້ນສູ່ວົງໂຄຈອນອາວະກາດສຳເລັດ, ສ່ວນໄລຍະທີສອງ ແມ່ນການບໍລິຫານລະບົບດາວທຽມ ໃຫ້ເກີດຜົນປະໂຫຍດດ້ານເສດຖະກິດ-ສັງຄົມ ນຳໃຊ້ງານ 15 ປີ ແລ້ວ ລາວຍັງມີແຜນຈະສົ່ງດາວທຽມດວງທີສອງ ໄປແທນດາວທຽມດວງທີໜຶ່ງ ເພື່ອຮັກສາຕຳແໜ່ງການນຳໃຊ້ວົງໂຄຈອນ 128,5 ອົງສາຕາເວັນອອກໄວ້ ໂດຍນຳໃຊ້ຜົນກຳໄລ ທີ່ໄດ້ມາຈາກການດຳເນີນ ທຸລະກິດດາວທຽມ ດັ່ງກ່າວ.
ແຫລ່ງຂ່າວ:
