ສຳນັກຂ່າວຕ່າງປະເທດ ລາຍງານວ່າ ໃນວັນອັງຄານທີ 5 ມັງກອນຜ່ານມານີ້ ທ່ານ ຮັດຊັນ ຣູຮານີ ປະທານາທິບໍດີອີຣ່ານ ໄດ້ອອກຖະແຫລງຕອບໂຕ້ ລັດຖະບານອາຣັບບີຊາອຸດິດ ກ່ຽວກັບການປະຫານຊີວິດ ທ່ານ ຊີກ ນິມະຣາ ອັນ-ນິມະຣາ ຄູສອນສາສະໜານິກາຍຊີອະ ອັນໄດ້ເປັນຊະນວນເຫດ ສ້າງຄວາມຄຽດແຄ້ນຢ່າງຮຸນແຮງ ໃນໝູ່ຜູ່ນັບຖືນິກາຍຊີອະ ພາຍໃນປະເທດອີຣ່ານ ຈົນເຖິງຂັ້ນມີການກໍ່ເຫດ ເຜົາສະຖານທູດຂອງອາຣັບບີ ຊາອຸດິດ ສ້າງຄວາມບາດໝາງ ລະຫວ່າງສອງປະເທດນັ້ນ ຊຶ່ງທ່ານໄດ້ເວົ້າວ່າ ” ພວກເຂົາບໍ່ຄວນຕອບໂຕ້ສຽງວິຈານ ດ້ວຍການຕັດຄໍ ”

ພ້ອມກັນນັ້ນ ທ່ານຍັງໄດ້ຮຽກຮ້ອງໃຫ້ ບັນດາປະເທດຕາເວັນຕົກ ທີ່ມັກມີຫາງສຽງວິພາກວິຈານ ກ່ຽວກັບບັນຫາສິດທິມະນຸດ ຈະດຳເນີນການຕຳນິ ອາຣັບບີ ຊາອຸດິດ ເຊັ່ນດຽວກັບກໍລະນີ ທີ່ພວກເຂົາມັກວິພາກວິຈານ ກ່ຽວກັບໂທດປະຫານຊີວິດຢູ່ອີຣ່ານ ຫລາຍຄັ້ງຜ່ານມາ.

ດ້ານໂຄສົກລັດຖະບານອີຣ່ານ ກໍໄດ້ອອກມາເນັ້ນຢ້ຳວ່າ ການຕັດຄວາມສຳພັນທາງການທູດຂອງ ອາຣັບບີ ຊາອຸດິດ ຈະບໍ່ສ້າງຄວາມເຈັບປວດ ໃຫ້ແກ່ອີຣ່ານ ຫລື ກໍ່ຄວາມເສຍຫາຍໃຫ້ແກ່ການພັດທະນາປະເທດ ແຕ່ຫາກແມ່ນຝ່າຍ ອາຣັບບີ ຊາອຸດິດ ທີ່ຈະຕ້ອງທຸກທໍລະມານເສຍເອງ.