ສຳນັກຂ່າວຕ່າງປະເທດ ລາຍງານໃນວັນທີ 6 ມັງກອນນີ້ວ່າ ທ່ານ ນາງ ຮິນລາຣີ ຄລີນຕັນ ໄດ້ກ່າວໃນຂະນະຫາສຽງເລືອກຕັ້ງ ເປັນຕົວແທນຂອງພັກເດໂດແຄຣດ ເພື່ອລົງສະໝັກຊິງຕຳແໜ່ງ ປະທານາທິບໍດີ ແຫ່ງ ສະຫະລັດອາເມຣິກາ ວ່າ ຕົນເອງມີຄວາມເຊື່ອວ່າ ມະນຸດຕ່າງດາວມີຢູ່ຈິງ ແລະ ຖ້າຫາກຕົນເອງໄດ້ຮັບເລືອກຕັ້ງ ກາຍເປັນປະທານາທິບໍດີຍິງຄົນທຳອິດ ຂອງສະຫະລັດອາເມຣິກາ ຈະດຳເນີນການຄົ້ນຫາຂໍ້ເທັດຈິງ ກ່ຽວກັບມະນຸດຕ່າງດາວ ແລະ ເປີດເຜີຍຂໍ້ມູນຂອງລັດຖະບານ ໃຫ້ແກ່ສາທາລະນະຊົນໄດ້ຮ້ ກ່ຽວກັບເຫດການທີ່ເກີດຂຶ້ນ ໃນພື້ນທີ່ 51 ຖານທັບທະຫານ ແລະ ພື້ນທີ່ຕ້ອງຫ້າມ ໃນຣອສເວວ ນິວແມັກຊິກໂກ ເມື່ອປີ 1947 ຊຶ່ງພື້ນທີ່ດັ່ງກ່າວນີ້ ແມ່ນແຕ່ປະທານາທິບໍດີເອງ ກໍບໍ່ມີສິດເຂົ້າໄປ.
ນັກທິດສະດີມະນຸດຕ່າງດາວ ໄດ້ພາກັນເຊື່ອວ່າ ພື້ນທີ່ຕ້ອງຫ້າມດັ່ງກ່າວນີ້ ເປັນບ່ອນເຊື່ອງອຳຫລັກຖານ ດ້ານເຕັກໂນໂລຊີ ຂອງມະນຸດຕ່າງດາວ ເນື່ອງຈາກລັດຖະບານມີຄວາມເປັນຫ່ວງວ່າ ຖ້າຫາກມີການເປີດເຜີຍ ຈະກະທົບຕໍ່ຄວາມເຊື່ອທາງສາສະໜາ ແລະ ເປັນໄພຕໍ່ຄວາມໝັ້ນຄົງ.
