ຂປລ. ໃນປີ 2016 ນີ້ ກະຊວງກະສິກຳ–ປ່າໄມ້ ຈະສູ້ຊົນຂະຫຍາຍເນື້ອທີ່ປູກເຂົ້າລວມໃຫ້ໄດ້ 1.007.000 ເຮັກຕາ, ສະມັດຕະພາບສະເລ່ຍປະມານ 4,2 ໂຕນ/ເຮັກຕາ, ຜົນຜະລິດໃຫ້ໄດ້ 4,2 ລ້ານໂຕນ, ໃນນີ້ປະກອບມີເຂົ້ານາແຊງ 120. 000 ເຮັກຕາ (ຈາກ102.000 ໃນປີ 2014-2015 ຜ່ານມາ ) ເນື່ອງຈາກວ່າ ຈະສະໜອງນ້ຳໄດ້ເພີ່ມຕື່ມຢູ່ປະຕູ 3 ນ້ຳເທີນ 2 ຈຳນວນ 1 ພັນເຮັກຕາ, ເຊສາລະລອງ 600 ເຮັກຕາ ແລະ ບ່ອນອື່ນໆ ຜົນຜະລິດໄດ້ 6 ແສນໂຕນ, ເຂົ້ານາປີ 787.000 ເຮັກຕາ ຜົນຜະລິດ 3.400.000 ໂຕນ, ເຂົ້າໄຮ່ 1 ແສນເຮັກຕາ ຜົນຜະລິດ 2 ແສນໂຕນ. ໃນຈຳນວນເຂົ້າ 4,2 ລ້ານໂຕນນີ້ ແບ່ງອອກເປັນເຂົ້າບໍລິໂພກ ມີປະມານ 2.100.000 ໂຕນ, ຄັງແຮ 4 ແສນໂຕນ, ແນວພັນ 60 ພັນໂຕນ, ປຸງແຕ່ງພາຍໃນປະມານ 640.000 ໂຕນ ແລະ ເຂົ້າເປັນສິນຄ້າພາຍໃນ ແລະ ສົ່ງອອກ ປະມານ 1 ລ້ານໂຕນ.
ທ່ານ ໄຊປລາເດດ ຈຸລາມະນີ ຫົວໜ້າກົມແຜນການ ແລະ ການຮ່ວມມື ກະຊວງກະສິກຳ ແລະ ປ່າໄມ້ ເປີດເຜີຍເມື່ອບໍ່ດົນນີ້ວ່າ: ເພື່ອບັນລຸຕົວເລກຄາດໝາຍການຜະລິດເຂົ້າ 4,2 ລ້ານໂຕນນັ້ນ ຈະຕ້ອງໄດ້ກຳນົດເນື້ອທີ່ການຜະລິດລະດູແລ້ງ, ລະດູຝົນ ໃຫ້ຈະແຈ້ງ ໂດຍສະເພາະເນື້ອທີ່ການຜະລິດເຂົ້ານາປີ ໃຫ້ຮູ້ວ່າ ແຕ່ລະແຂວງມີເທົ່າໃດ ແລ້ວ ມອບຄວາມຮັບຜິດຊອບໃຫ້ແຕ່ລະແຂວງເປັນເຈົ້າການ ໃນການຊຸກຍູ້, ຕິດຕາມການຜະລິດຢ່າງແຂງແຮງ, ສະໜອງນ້ຳໃຫ້ແກ່ການຜະລິດລະດູແລ້ງ ສົກປີ 2015 -2016 ໃຫ້ໄດ້180.000 ເຮັກຕາ ໃນນັ້ນ ນາແຊງ 120.000 ເຮັກຕາ, ພືດລະດູແລ້ງ 60 ພັນເຮັກຕາ, ລະດູຝົນ 260.000 ເຮັກຕາ, ຕ້ອງໄດ້ຟື້ນຟູ, ສ້ອມແປງ ໂຄງການທີ່ໃຊ້ມາຫລາຍປີ ແລະ ເປ່ເພ ໃຫ້ຮັບປະກັນການສະໜອງນ້ຳ ພ້ອມທັງຕິດຕາມເຝົ້າລະວັງ ແລະ ແກ້ໄຂກໍລະນີ ເກີດໄພແຫ້ງແລ້ງ-ນ້ຳຖ້ວມ ໃຫ້ທັນການ ໄປຄຽງຄູ່ກັບ ການສະໜອງແນວພັນເຂົ້າທີ່ດີ ໃຫ້ໄດ້ 60 ພັນໂຕນ ກໍຄື ການນຳໃຊ້ຝຸ່ນ-ປຸ໋ຍວິທະຍາສາດ ເພື່ອຮັບໃຊ້ເນື້ອທີ່ການຜະລິດ ໂດຍການສົມທົບກັບຜູ້ປະກອບການ, ກຸ່ມໂຮງສີ ເປັນຜູ້ຕອບສະໜອງຕິດພັນກັບສິນເຊື່ອທະນາຄານ, ພ້ອມປຸກລະດົມຊາວກະສິກອນ ນຳໃຊ້ຝຸ່ນບົ່ມ-ຝຸ່ນຄອກ ໂດຍປະຕິບັດຕາມຄຳຂວັນ “ບ້ານສະອາດ ນາງາມ”.
ຜ່ານການເກັບກຳຂໍ້ມູນສະຖິຕິ ໃນສົກປີ 2014-2015 ເຂົ້າບໍລິໂພກ ແລະ ຄັງແຮ ມີປະມານ 2,5 ລ້ານໂຕນ, ເຂົ້າແນວພັນ 60 ພັນໂຕນ, ເປັນສິນຄ້າທີ່ມີເຄື່ອງໝາຍການຄ້າ ສົ່ງອອກຜ່ານດ່ານສາກົນ 1 ແສນໂຕນ, ເຂົ້າສ່ວນເກີນສົ່ງອອກ ຕາມຊາຍແດນ 6 ແສນໂຕນ ແລະ ສ່ວນເຫລືອ ແມ່ນການປຸງແຕ່ງພາຍໃນ ສະແດງໃຫ້ເຫັນວ່າ ເຂົ້າສົ່ງອອກທີ່ມີເຄື່ອງໝາຍການຄ້າ ມີພຽງ 20% ຂອງການສົ່ງອອກທັງໝົດ ແລະ 80% ແມ່ນເຂົ້າສ່ວນເກີນທີ່ຂາຍຕາມຊາຍແດນ.
ແຫລ່ງຂ່າວ:
