ຂປລ. ພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວ ນະຄອນຫລວງວຽງຈັນ ຮ່ວມກັບອຳ ນາດການປົກຄອງເມືອງສີໂຄດຕະບອງ ຈັດພິທີສະເຫລີມສະຫລອງວັນປະດິດສະຖານພະຍາຟ້າງຸ່ມ ມະຫາລາດຄົບຮອບ 13 ປີ ໃນຕອນເຊົ້າວັນທີ 5 ມັງກອນ 2016 ຢູ່ທີ່ ອະນຸສະຖານພະຍາເຈົ້າຟ້າງຸ່ມ ເມືອງສີໂຄດຕະບອງນະຄອນຫລວງວຽງຈັນ, ໄດ້ມີພິທີໃສ່ບາດຖວາຍສັງຄະທານ ອຸທິດສ່ວນບຸນກຸສົນເຖິງດວງວິນຍານຂອງພະຍາຟ້າງຸ່ມມະຫາລາດ ໂດຍມີພະສົງ 57 ອົງ ກອງອັດຖະ 9 ກອງ ເຂົ້າຮ່ວມໃນພິທີຕັກບາດໃນຄັ້ງນີ້ ນຳໂດຍ ທ່ານ ສາຍ ທອງ ແກ້ວດວງດີ ຮອງເຈົ້າຄອງນະຄອນຫລວງວຽງຈັນ ພ້ອມດ້ວຍການນຳນະຄອນຫລວງ, ຫົວໜ້າພະແນກ ອ້ອມຂ້າງນະຄອນຫລວງ ກໍຄືປະຊາຊົນ 9 ຕົວເມືອງ ໃນນະ ຄອນຫລວງວຽງຈັນ ແລະ ປະຊາຊົນມາຈາກແຂວງຕ່າງໆຈຳນວນຫລວງຫລາຍ.
ທ່ານ ຄຳປະດິດ ເຂັມມານິດ ຫົວໜ້າພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວນະຄອນຫລວງວຽງຈັນ ໄດ້ກ່າວວ່າ: ຊາດລາວ ເປັນຊາດທີ່ເກົ່າແກ່ມີການສືບເຊື້ອການປົກຄອງມາຫລາຍກະສັດ ເວົ້າສະເພາະໃນໄລຍະສະຕະວັດທີ 14 ພະຍາຟ້າງຸ່ມ ມະຫາລາດ ຖືວ່າເປັນກະສັດອົງໜຶ່ງທີ່ສະຫລຽວສະຫລາດ ນຳພາປະຊາຊົນບັນດາເຜົ່າ ທ້ອນໂຮມອານາຈັກລ້ານຊ້າງເປັນອານາຈັກໜຶ່ງດຽວ ເປັນອານາຈັກທີ່ເຂັ້ມແຂງທາງດ້ານການປົກຄອງ, ການປົກປັກຮັກສາ ແລະ ການພັດທະ ນາເສດຖະກິດ ພາຍຫລັງສຳເລັດການທ້ອນໂຮມອານາຈັກລາວລ້ານຊ້າງແລ້ວ ມາຮອດທ້າຍປີ 1357 ຫາຕົ້ນປີ 1358 ກໍໄດ້ມີການສະເຫລີມສະຫລອງຢ່າງຍິ່ງໃຫຍ່ຢູ່ສະຖານທີ່ແຫ່ງນີ້.
ສະເພາະການຈັດງານສະເຫລີມສະຫລອງ ວັນປະດິດສະຖານພະຍາຟ້າງຸ່ມ ມະຫາລາດ ປີນີ້ ແມ່ນໄດ້ດຳເນີນມາແຕ່ວັນທີ 3 ມັງກອນ 2016 ເປັນຕົ້ນມາ ໂດຍພາຍຫລັງປະດັບປະດາສະຖານທີ່ສຳເລັດແລ້ວ ເວລາ 15:00 ໂມງໄດ້ມີການແຫ່ອຸປະຄຸດ ເວລາ 16:00 ໂມງ ສູດອະພິທຳ ນອກນີ້ ໃນຕອນກາງຄືນຍັງໄດ້ມີການຄົບງັນຕາມປະເພນີ ແລະ ພິເສດ ປີນີ້ໄດ້ມີຄົບງັນມ່ວນຊື່ນ ຈາກສິລະປະດົນຕີ, ສາຍຮູບເງົາ ແລະ ສຳລັບວັນທີ 4 ມັງກອນ 2016 ສືບຕໍ່ຄົບງັນຕາມປະເພນີ ສ່ວນຕອນເຊົ້າ ວັນທີ 5 ມັງກອນ 2016 ແມ່ນຕັກບາດຖວາຍສັງຄະທານ.
ແຫລ່ງຂ່າວ:
