ໃນ ວັນທີ 29 ທັນວາ 2015 ຜ່ານມາ, ທ່ານຮອງຫົວໜ້າກົມຕໍາຫລວດເສດຖະກິດ ກະຊວງປ້ອງກັນຄວາມສະຫງົບ ພັນໂທ ບຸນຖິນ ແກ້ວມົນລັດຊີ ໄດ້ຖະແຫລງຕໍ່ສື່ມວນຊົນ ກ່ຽວກັບຄວາມໜ້າການສືບສວນ-ສອບສວນ ຄະດີນັກທຸລະກິດຕ່າງປະເທດ ເຂົ້າມາເປີດບໍລິສັດ ເປັນສາກບັງໜ້າ ເພື່ອສໍ້ໂກງຊັບພົນລະເມືອງ, ໂດຍກວາດເງິນຫລົບໜີໄປຫລາຍກວ່າ 16 ລ້ານໂດລາສະຫະລັດ.
ທ່ານຮອງກົມ ຕຳຫລວດເສດຖະກິດ ໃຫ້ຮູ້ວ່າ: ມີກຸ່ມຄົນບໍ່ດີຈຳນວນໜຶ່ງ ຮ່ວມກັບຄົນຕ່າງປະເທດ ໄດ້ຕັ້ງ ບໍລິສັດ ລາວແມັກສຄີສະແຕໂບ 1 ແລະ ບໍລິສັດ ລາວແມັກສຄີສະແຕໂບບີ 2 ເວີວາຍ ຈຳກັດ ຜູ້ດຽວ ໂດຍສອງບໍລິສັດ ໄດ້ຮັບອະນຸຍາດຈາກພາກສ່ວນທີ່ກ່ຽວຂ້ອງ ເຄື່ອນໄຫວທາງດ້ານທີ່ປຶກສາດ້ານການຄ້າ ແລະ ການລົງທຶນ ຜ່ານລະບົບອີເລັກໂຕຣນິກ, ແຕ່ພາຍຫລັງໄດ້ຮັບອະນຸຍາດແລ້ວ ກໍໄດ້ເຮັດທຸລະກິດກ່ຽວກັບການລະດົມທຶນ ຫລື ຮັບເງິນຝາກໃຫ້ດອກເບ້ຍ ດ້ວຍຮູບການໂຄສະນາຊວນເຊື່ອ ຜ່ານສື່ມວນຊົນ, ທາງອິນເຕີເນັດ ແລະ ໃຫ້ພະນັກງານໂຄສະນາຕົວຈິງ ເພື່ອລະດົມໃຫ້ນັກທຸລະກິດ, ພໍ່ຄ້າຊາວຂາຍ, ປະຊາຊົນຫລົງເຊື່ອມາຮ່ວມທຶນ ຫລື ຝາກເງິນນຳບໍລິສັດ ໂດຍສະເໜີໃຫ້ດອກເບ້ຍ ແລະ ຜົນປະໂຫຍດສູງກວ່າລະບຽບຂອງທະນາຄານ.
ຈາກ ເຫດການດັ່ງກ່າວ ໄດ້ມີຜູ້ແຈ້ງຄວາມ ແລະ ຮ້ອງຟ້ອງຕໍ່ສອງບໍລິສັດດັ່ງກ່າວ ມາຫາກະຊວງປ້ອງກັນຄວາມສະຫງົບ, ຈາກນັ້ນ ຈຶ່ງໄດ້ແຕ່ງຕັ້ງຄະນະຮັບຜິດຊອບ ລົງໄປກວດສອບເຫັນວ່າບໍລິສັດດັ່ງກ່າວ ໄດ້ເປີດບໍລິສັດບັງໜ້າ ເພື່ອສໍ້ໂກງຊັບພົນລະເມືອງແທ້, ຈຶ່ງໄດ້ກັກຕົວຜູ້ກະທຳຜິດໄດ້ 6 ຄົນ ທີ່ຮ່ວມກັບຄົນຕ່າງປະເທດ ສໍ້ໂກງຊັບ ແລະ ຜ່ານການສືບສວນ-ສອບສວນ ໃນເບື້ອງຕົ້ນເຫັນວ່າມີບຸກຄົນ ນຳເງິນມາຮ່ວມການລົງທຶນ ແລະ ເອົາເງິນໄປຝາກນຳ 2 ບໍລິສັດດັ່ງກ່າວ ຫລາຍກວ່າພັນຄົນ, ລວມມີມູນຄ່າເສຍຫາຍຫລາຍກວ່າ 16 ລ້ານໂດລາສະຫະລັດ, ປັດຈຸບັນຄະດີດັ່ງກ່າວ ເຈົ້າໜ້າທີ່ພວມດຳເນີນຄະດີ ຕາມລະບຽບກົດໝາຍ, ພ້ອມທັງຮຽກຮ້ອງມາຍັງທຸກພາກສ່ວນ ຊ່ວຍກັນເປັນຫູເປັນຕາ ໃນການພົບເຫັນຂໍ້ມູນຫລັກຖານທີ່ກ່ຽວຂ້ອງ ກັບສອງບໍລິສັດນີ້ຈົ່ງສະໜອງລາຍງານຕໍ່ເຈົ້າໜ້າທີ່ ເພື່ອແກ້ໄຂໃຫ້ທັນການ.
ແຫລ່ງຂ່າວ:
