ສຳນັກຂ່າວຕ່າງປະເທດ ລາຍງານໃນວັນທີ 5 ມັງກອນນີ້ວ່າ ມື້ວານນີ້ (4 ມັງກອນ) ທ່ານ ສະເຕຟານ ດູຢາຣິດ ໂຄສົກອົງການສະຫະປະຊາຊາດ ຫລື UN ໄດ້ອອກມາລະບຸເຖິງ ທ່ານ ບັນກີມູນ ເລຂາທິການໃຫຍ່ ອົງການສະຫະປະຊາຊາດ ໄດ້ມີຄວາມເປັນຫ່ວງຢ່າງສູງ ຕໍ່ສະຖານະການຄວາມເຄັ່ງຕຶງ ແລະ ຄວາມສຳພັນທີ່ແຕກຫັກ ລະຫວ່າງສອງປະເທດ ອາຣັບບີ ຊາອຸດິດ ແລະ ອີຣ່ານ.
ທ່ານເລຂາທິການໃຫຍ່ ໄດ້ຕໍ່ສາຍໂທລະສັບ ເພື່ອໂອ້ລົມກັບ ທ່ານ ອາເດັນ ອັນ-ຍູເບອີ ລັດຖະມົນຕີວ່າການ ກະຊວງການຕ່າງປະເທດ ອາຣັບບີ ຊາອຸດິດ ແລະ ທ່ານ ໂມຮຳໝັດ ຈາວາດ ຊາຣິບ ລັດຖະມົນຕີວ່າການ ກະຊວງການຕ່າງປະເທດອີຣ່ານ ເພື່ອສະແດງຄວາມວິຕົກກັງວົນ ພ້ອມທັງໄດ້ຮຽກຮ້ອງໃຫ້ທັງສອງປະເທດ ຫລີກລ່ຽງການເຄື່ອນໄຫວໃດໆ ທີ່ອາດຈະຂະຫຍາຍຄວາມຂັດແຍ່ງ ແລະ ເຮັດໃຫ້ສະຖານະການບານປາຍ ຈົນອາດລຸກລາມ ນຳໄປສູ່ສົງຄາມຂັດແຍ່ງ ທົ່ວພາກພື້ນຕາເວັນອອກກາງ.
ທັງນີ້ ເນື່ອງຈາກ ໃນວັນທີ 3 ມັງກອນຜ່ານມາ ລັດຖະບານ ອາຣັບບີ ຊາອຸດິດ ໄດ້ອອກມາຖະແຫລງ ຕັດສຳພັນທາງການທູດ ກັບລັດຖະບານອີຣ່ານ ພ້ອມອອກຄຳສັ່ງ ໃຫ້ເຈົ້າໜ້າທີ່ການທູດທັງໝົດ ຂອງອີຣ່ານ ອອກຈາກດິນແດນຂອງຕົນ ພາຍໃນ 48 ຊົ່ວໂມງ ເນື່ອງຈາກບໍ່ພໍໃຈ ຕໍ່ເຫດການກຸ່ມຜູ່ປະທ້ວງຊາວອີຣ່ານ ບຸກເຂົ້າໂຈມຕີສະຖານທູດຂອງຕົນ ປະຈຳນະຄອນຫລວງເຕເຮຣານ ປະເທດອີຣ່ານ ໃນວັນເສົາທີ 2 ມັງກອນຜ່ານມາ ໂດຍກຸ່ມຜູ່ປະທ້ວງ ໄດ້ພາກັນຄຽດແຄ້ນ ຈາກກໍລະນີທີ່ ລັດຖະບານອາຣັບບີ ຊາອຸດິດ ທຳການປະຫານຊີວິດ ທ່ານ ຊິກ ນິມະຣາ ອັນ-ນິມະຣາ ຄູສອນສາສະໜາອິດສະລາມ ນິກາຍຊີອະ ຊຶ່ງເປັນນິກາຍທີ່ຊາວອີຣ່ານສ່ວນໃຫຍ່ນັບຖື ໃນຂໍ້ຫາກ່ຽວຂ້ອງກັບການກໍ່ການຮ້າຍ.
ການປະກາດຕັດຄວາມສຳພັນ ແລະ ຂັບໄລ່ນັກການທູດອີຣ່ານ ຂອງລັດຖະບານອາຣັບບີ ຊາອຸດິດ ໃນຄັ້ງນີ້ ຖືເປັນຈຸດຕ່ຳສຸດ ຂອງຄວາມສຳພັນລະຫວ່າງສອງປະເທດ ທີ່ມີຄວາມເຄັ່ງຕຶງມາຍາວນານ ຫລາຍທົດສະວັດ ໂດຍລັດຖະບານອາຣັບບີ ຊາອຸດິດ ໃນຖານະທີ່ເປັນຜູ່ນຳ ໃນໂລກມຸດສະລິມນິກາຍຊຸນນີ ມັກຈະກ່າວຫາອີຣ່ານ ຊຶ່ງເປັນຜູ່ນຳຊາດມຸດສະລິມນິກາຍຊີອະວ່າ ໄດ້ດຳເນີນການແຊກແຊງ ກິດຈະການຂອງໂລກອາຫລັບມາໂດຍຕະຫລອດ.