ຂປລ. ວັນທີ 27 ທັນວາ 2015 ທີ່ຜ່ານມານີ້ ທີ່ສວນອາຫານເສລີພາບໃໝ່ ນະຄອນຫລວງວຽງຈັນ, ສຳນັກພິມ ລາວດວງເດືອນ ໄດ້ຈັດງານພົບປະສັງສັນ ນັກຂຽນ-ນັກກະວີ ແລະ ກຽມວາງຈຳໜ່າຍວາລະສານນ້ອງໃໝ່ ຂອງ ສປປ ລາວ ທີ່ມີຊື່ວ່າ “ ລາວດວງເດືອນ”, ເປັນກຽດເຂົ້າຮ່ວມໃນງານມີ ທ່ານ ສົມສະໜຸກ ມີໄຊ ຮອງປະທານສະມາຄົມນັກຂ່າວ ແຫ່ງ ສປປ ລາວ, ມີຜູ້ຕາງໜ້າກົມພິມຈຳໜ່າຍ ບັນດາທ່ານ ໃນຄະນະບໍລິຫານສະມາຄົມນັກປະພັນລາວ ພ້ອມດ້ວຍເພື່ອນຮ່ວມງານ, ນັກຂຽນ-ນັກກະວີ, ສິລະປິນ, ແຂກຖືກເຊີນ ແລະ ຜູ້ໃຫ້ການສະໜັບສະໜູນເຂົ້າຮ່ວມຢ່າງຫລວງຫລາຍ.
ວາລະສານ “ລາວດວງເດືອນ” ເປັນວາລະສານກ່ຽວກັບ ສິລະປະ-ວັດທະນະທຳ, ວັນນະກຳສ້າງສັນຮ່ວມສະໄໝ ພາຍໃນເຫລັ້ມປະກອບໄປດ້ວຍເນື້ອໃນສາລະ ທີ່ຫລາກຫລາຍ ເຊັ່ນ: ຂ່າວການເຄື່ອນໄຫວໃນວົງການວິຈິດສິນ, ດົນຕີ, ກະວີ, ເພງ ແລະ ເລື່ອງສັ້ນ ລວມເຖິງການວິຈານວັນນະຄະດີ ແລະ ອື່ນໆ.
ທ່ານ ປັນຍາ ພັນທະພານິດ ຫົວໜ້າບັນນາທິການວາລະສານ ລາວດວງເດືອນ ກ່າວວ່າ: ວາລະສານສະບັບປະຖົມມະລຶກນີ້ ເປັນສະບັບພິເສດ ເຊິ່ງມີຄວາມໜາ 155 ໜ້າ ໃນນີ້ໄດ້ຮີບໂຮມເອົາຜົນງານການຂຽນ ຂອງນັກຂຽນ-ນັກກະວີ 40 ທ່ານ ເພື່ອເປັນການຮ່ວມ ສະຫລອງ ສປປ ລາວ ຄົບຮອບ 40 ປີ ພາຍໃຕ້ຄຳຂວັນ “40 ປີ ສປປ ລາວ 40 ນັກຂຽນ-ນັກກະວີ” ເຊິ່ງຕໍ່ໄປກໍຈະເລີ່ມພິມປົກກະຕິດ້ວຍຂະໜາດທີ່ບາງລົງ ແຕ່ຈະເພິ່ມເນື້ອໃນໃຫ້ມີຫລາຍສີສັນກວ່າເກົ່າ, ວາລະສານລາວດວງເດືອນ ຈະມີວາງຈຳໜ່າຍຕາມສະຖາບັນການສຶກສາໃນທົ່ວປະເທດ ແລະ ຕາມຮ້ານຂາຍປຶ້ມທົ່ວໄປໃນໄວໆນີ້.
ແຫລ່ງຂ່າວ:
