ພິທີ​ວາງ​ສີ​ລາ​ລຶກ​ໂຄງການ ຂະຫຍາຍ​ອາຄານ​ຜູ້ໂດຍສານ​ສະໜາມ​ບິນ​ສາກົນ​ວັດ​ໄຕ ຈັດ​ຂຶ້ນວັນ​ທີ 28 ທັນວາ 2015 ທີ່​ນະຄອນ​ຫຼວງ​ວຽງ​ຈັນ ໂດຍ​ການ​ເຂົ້າຮ່ວມ​ຂອງ​ທ່ານ ​ດຣ. ບຸນ​ຈັນ ສິນທະ​ວົງ ລັດຖະມົນຕີ​ວ່າການ​ກະຊວງ​ໂຍທາ​ທິ​ການ ແລະ ຂົນສົ່ງ ທ່ານ ເຄ​ອິ​ຊິ ອິ​ຊີ ລັດຖະມົນຕີວ່າການ​ກະຊວງ​ທີ່​ດິນ ພື້ນຖານໂຄງ​ລ່າງ ຂົນສົ່ງ ແລະ ທ່ອງທ່ຽວ​ ປະເທດ​ຍີ່ປຸ່ນ ພ້ອມ​ດ້ວຍລັດຖະມົນຕີ​ຊ່ວຍ​ວ່າການ ແລະ ພາກສ່ວນ​ທີ່​ກ່ຽວຂ້ອງ​ເຂົ້າ​ຮ່ວມ.

ທ່ານ ​ດຣ. ບຸນ​ຈັນ ສິນ​ທະ​ວົງ ກ່າວ​ວ່າ: ເນື່ອງ​ຈາ​ກວ່າ​ຈຳນວນຜູ້ໂດຍສານ​ ຂອງ​ສະໜາມ​ບິນ​ສາກົນ​ວັດ​ໄຕ ​ແມ່ນ​ມີ​ການ​ເພີ່ມ​ຂຶ້ນຢ່າງ​ຕໍ່​ເນື່ອງ ໂດຍ​ປຽບທຽບຈາກປີ 2011 ທີ່​ມີ​ຈຳນວນ 520.000 ຄົນ ມາ​ເປັນ 1.100.000 ຄົນ ​ໃນປີ 2015 ເຊິ່ງ​ເຫັນ​ໄດ້​ວ່າ​ມີ​ການເພີ່ມ​ຂຶ້ນ​ເທົ່າ​ຕົວ ແລະ ຄາດ​ຄະເນ​ໄດ້​ວ່າ​ຈະ​ມີ​ຈຳນວນ​ເພີ່ມ​ຂຶ້ນເປັນ 2.800.000 ຄົນ ໃນ​ປີ 2028 ເນື່ອງ​ຈາກ​ການ​ຂະຫຍາຍຕົວ​ທາງ​ດ້ານ​ເສດຖະກິດ-ສັງຄົມ ແລະ ການ​ເຂົ້າ​ເປັນ​ປະຊາ​ຄົມເສດຖະກິດ​ອາ​ຊຽນ​ຂອງ ​ສປປ ລາວ ໃນ​ທ້າຍ​ປີ​ນີ້ ອາຄານ​ໂດຍສານ​ຂອງ​ສະໜາມ​ບິນ​ສາກົນ​ວັດໄຕ​ ທີ່​ມີ​ໃນ​ປັດຈຸບັນ ແມ່ນ​ບໍ່​ສາມາດ​ຮອງ​ຮັບ​ ການ​ເພີ່ມ​ຂຶ້ນ​ດັ່ງກ່າວ​ຂອງ​ຈຳນວນ​ຜູ້ໂດຍສານ ເວົ້າ​ລວມແມ່ນ ​ບໍ່​ສາມາດ​ຮອງຮັບ​ການ​ຂະຫຍາຍຕົວ ​ຂອງ​ວຽກງານ​ການບິນ​ໃນ​ອະນາຄົດ​ໄດ້ ພ້ອມ​ນີ້ ໃນ​ປີ 2016 ທີ່​ຈະ​ມາ​ເຖິງນີ້ ​ສປປ ລາວ ກໍ່​ຍັງ​ຈະ​ໄດ້​ຮັບກຽດ​ເປັນ​ເຈົ້າພາບ ແລະ ເປັນ​ປະທານ​ກອງ​ປະຊຸມ​ອາ​ຊຽນ ​ໃນ​ຕົ້ນເດືອນ​ກັນຍາ​ອີກ​ດ້ວຍ ດັ່ງນັ້ນ ການ​ກະກຽມ​ດ້ານ​ວຽກ​ງານການບິນ ແລະ ອາຄານ​ຜູ້​ໂດຍສານ​ໃຫ້​ມີ​ຄວາມ​ພ້ອມ​ສູງ​ສຸດ ແມ່ນ​ສິ່ງ​ທີ່​ຈຳເປັນ ແລະ ສຳຄັນ ທັງ​ນີ້ ກໍ່​ເພື່ອ​ຮອງ​ຮັບ​ເຮືອບິນຂອງ​ຜູ້​ບໍລິຫານ​ລະດັບ​ສູງ​ຈາກຫຼາຍ​ປະເທດ​ ທີ່​ຈະ​ເຂົ້າ​ຮ່ວມ​ກອງປະຊຸມ​ດັ່ງກ່າວ ໂດຍ​ໄລຍະ​ເວລາ​ຂອງ​ການ​ດຳເນີນ​ໂຄງການແມ່ນ 32 ເດືອນ ໃຊ້​ງົບປະມານການ​ກໍ່ສ້າງ​ມູນ​ຄ່າ 61 ລ້ານ​ໂດລາ​ສະຫະລັດ ຫຼື ປະມານ 488 ຕື້​ກີບ ໂດຍ​ການ​ກູ້​ຢືມ​ຈາກ​ລັດ​ຖະບານ​ຍີ່ປຸ່ນ.