ວັນທີ 17 ມັງກອນ 2014 ຄະນະຜູ້ແທນ ສປປ ລາວ ນຳໂດຍທ່ານ ທອງລຸນ ສີສຸລິດ ຮອງນາຍົກລັດຖະມົນຕີ ລັດຖະມົນຕີວ່າການ ກະຊວງການຕ່າງປະເທດ ໄດ້ສຳເລັດການເຂົ້າຮ່ວມກອງປະຊຸມວົງແຄບ ຂອງລັດຖະມົນຕີການຕ່າງປະເທດອາຊຽນ (AMM Retreat) ຈັດຂຶ້ນທີ່ບາການ ມຽນມາ ໂດຍການເປັນເຈົ້າພາບ ແລະ ເປັນປະທານຂອງທ່ານ ອູວຸນນາ ມອງລິນ ລັດຖະມົນຕີວ່າການກະຊວງການຕ່າງປະເທດແຫ່ງ ສາທາລະນະລັດສະຫະພາບມຽນມາ.
ກອງປະຊຸມວົງແຄບຄັ້ງນີ້ ເປັນກອງປະຊຸມຄັ້ງທຳອິດ ພາຍໃຕ້ການເປັນປະທານອາຊຽນຂອງມຽນມາ ສຳລັບປີ 2014 ຫົວຂໍ້ສຳຄັນທີ່ໄດ້ປຶກສາຫາລືກັນມີຄື: ການຈັດຕັ້ງຜັນຂະຫຍາຍຜົນຂອງກອງປະຊຸມສຸດຍອດອາຊຽນ ຄັ້ງທີ 23 ແລະ ບັນດາກອງປະຊຸມສຸດຍອດທີ່ກ່ຽວຂ້ອງ ຊຶ່ງໄດ້ຈັດຂຶ້ນໃນເດືອນຕຸລາ 2013 ກໍ່ຄືການສ້າງປະຊາຄົມອາຊຽນ ບຸລິມະສິດຂອງການເປັນປະທານອາຊຽນຂອງມຽນມາ ສຳລັບປີ 2014 ທົບທວນການພົວພັນຮ່ວມມືກັບພາຍນອກຂອງອາຊຽນ ວິໄສທັດອາຊຽນຫຼັງ 2015 ແລະ ແລກປ່ຽນຄຳຄິດຄຳເຫັນກ່ຽວກັບບັນຫາພາກພື້ນ ແລະ ສາກົນທີ່ພົ້ນເດັ່ນ ແລະ ມີຄວາມສົນໃຈຮ່ວມກັນ ໝາກຜົນທີ່ສຳຄັນຂອງກອງປະຊຸມມີດັ່ງນີ້: ບັນດາລັດຖະມົນຕີການຕ່າງປະເທດອາຊຽນ ໄດ້ທົບທວນຄືນຄວາມຄືບໜ້າໃນການສ້າງປະຊາຄົມອາຊຽນ ແລະ ເຫັນວ່າການສ້າງປະຊາຄົມອາຊຽນ ມີຄວາມຄືບໜ້າເທື່ອລະກ້າວ ແຕ່ອາຊຽນຕ້ອງໄດ້ເພີ່ມທະວີຄວາມພະຍາຍາມ ເພື່ອສ້າງປະຊາຄົມອາຊຽນໃຫ້ສຳເລັດໃນປີ 2015.
ໃນໂອກາດນີ້ ບັນດາລັດຖະມົນຕີການຕ່າງປະເທດອາຊຽນ ໄດ້ຮັບຮອງເອົາບຸລິມະສິດຂອງອາຊຽນ ສຳລັບປີ 2014 ໂດຍການເປັນປະທານອາຊຽນຂອງມຽນມາ ພາຍໃຕ້ຄຳຂວັນ “ກ້າວໄປຂ້າງໜ້າດ້ວຍຄວາມເອກະພາບ ສູ່ປະຊາຄົມທີ່ມີສັນຕິພາບ ແລະ ຄວາມວັດທະນາຖາວອນ” (Moving Forward in unity towards a peaceful and prosperous Community) ກ່ຽວກັບການພົວພັນກັບພາຍນອກ ກອງປະຊຸມໄດ້ປຶກສາຫາລືຄວາມເປັນແກນກາງ ແລະ ບົດບາດອັນສຳຄັນຂອງອາຊຽນໃນພາກພື້ນ ທ່າມກາງສະພາບພູມສາດການເມືອງໃໝ່ ທີ່ສືບຕໍ່ຜັນແປໄປຢ່າງສະຫຼັບສັບຊ້ອນ ແລະ ເຫັນວ່າອາຊຽນຄວນສືບຕໍ່ຮັດແໜ້ນການຮ່ວມມືລະຫວ່າງອາຊຽນ ກັບບັນດາຄູ່ຮ່ວມມືພາຍນອກ ພາຍໃຕ້ຂອບການຮ່ວມມືທີ່ອາຊຽນເປັນຜູ້ລິເລີ່ມ ໃຫ້ສອດຄ່ອງກັບສະພາບຕົວຈິງ ໂດຍອາຊຽນເປັນແກນກາງ.
ພ້ອມກັນນີ້ ບັນດາລັດຖະມົນຕີການຕ່າງປະເທດອາຊຽນ ກໍ່ໄດ້ເຫັນດີໃຫ້ບັນດາເຈົ້າໜ້າທີ່ອາວຸໂສອາຊຽນ ເລີ່ມການປຶກສາຫາລືກ່ຽວກັບວິໄສທັດອາຊຽນ ຫຼັງປີ 2015 ໃນເວລາອັນໄວ ໂດຍປະສານສົມທົບກັບຂະແໜງການຕ່າງໆຂອງອາຊຽນ ນອກຈາກນີ້ ກອງປະຊຸມວົງແຄບຄັ້ງນີ້ ຍັງໄດ້ແລກປ່ຽນຄຳຄິດຄຳເຫັນກ່ຽວກັບບັນຫາພາກພື້ນ ແລະ ສາກົນທີ່ພົ້ນເດັ່ນ ແລະ ມີຄວາມສົນໃຈຮ່ວມກັນ.
ທີ່ມາ http://www.vientianemai.net/teen/khao/1/11013