ຂປລ. ໃນວັນທີ 26 ທັນວາ 2015 ນີ້, ທີ່ທໍານຽບປະທານປະເທດ ນະຄອນຫລວງວຽງຈັນ, ທ່ານ ຈູມມາລີ ໄຊຍະສອນ ປະທານປະເທດ ແຫ່ງ ສປປ ລາວ ໄດ້ໃຫ້ກຽດຕອນຮັບ ທ່ານ ຫງວຽນ ຊວນ ຟຸກ ຮອງນາຍົກລັດຖະມົນຕີ ແຫ່ງ ສສ ຫວຽດນາມ, ປະທານຄະນະກໍາມະການຮ່ວມມືຫວຽດນາມ–ລາວ ພ້ອມຄະນະ ໃນໂອກາດເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ແຕ່ວັນທີ 25-27 ທັນວາ 2015.
ທ່ານ ຈູມມາລີ ໄຊຍະສອນ ໄດ້ສະແດງຄວາມຊົມເຊີຍ, ຍິນດີຕ້ອນຮັບອັນອົບອຸ່ນຕໍ່ການຢ້ຽມຢາມ ສປປ ລາວ ຂອງທ່ານ ຮອງນາຍົກລັດຖະມົນຕີ, ປະທານຄະນະກໍາມະການຮ່ວມມື ຫວຽດນາມ–ລາວ ພ້ອມຄະນະ, ເຊິ່ງເປັນການ ປະກອບສ່ວນສໍາຄັນເຂົ້າ ໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືແບບພິເສດຮອບດ້ານທີ່ເປັນມູນເຊື້ອ ລະຫວ່າງ ສອງພັກ ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ນັບມື້ແຕກດອກອອກຜົນງອກງາມຍິ່ງໆຂຶ້ນ.
ໃນໂອກາດດັ່ງກ່າວ, ທ່ານ ຫງວຽນ ຊວນ ຟຸກ ກໍໄດ້ສະແດງຄວາມຂອບໃຈຕໍ່ ທ່ານ ປະທານປະເທດແຫ່ງ ສປປ ລາວ ທີ່ ໄດ້ສະຫລະເວລາອັນມີຄ່າ ໃຫ້ກຽດຕ້ອນຮັບອັນອົບອຸ່ນ, ພ້ອມທັງ ແຈ້ງໃຫ້ຊາບເຖິງຈຸດປະສົງຂອງການເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້, ໂດຍສະເພາະໄດ້ເຂົ້າຮ່ວມພິທີມອບ-ຮັບ ສູນອົງຄະທຽມ ແລະ ຟື້ນຟູສະມັດຕະພາບ 686 ບ້ານເກີນ, ພິທີເຊັນບົດບັນທຶກຮ່ວມມືແຮກສ່ຽວ ລະຫວ່າງ ສູນອົງຄະທຽມ 686 ບ້ານເກີນ ແລະ ໂຮງໝໍດານັງ ລວມທັງ ແຈ້ງການເຂົ້າຮ່ວມກອງປະຊຸມ ຄັ້ງທີ 38 ປະຈໍາປີ 2015 ຢູ່ ສປປ ລາວ.
ໃນມື້ດຽວກັນນີ້ ທ່ານ ຫງວຽນ ຊວນ ຟຸກ ຮອງນາຍົກລັດຖະມົນຕີ, ປະທານຄະນະກໍາມະການຮ່ວມມື ຫວຽດນາມ–ລາວ ກໍໄດ້ເຂົ້າຢ້ຽມຄໍານັບ ທ່ານ ທອງສິງ ທໍາມະວົງ ນາຍົກລັດຖະມົນຕີແຫ່ງ ສປປ ລາວ ແລະ ທ່ານນາງ ປານີ ຢາທໍ່ຕູ້ ປະທານສະພາແຫ່ງຊາດລາວຢູ່ນະຄອນຫລວງວຽງຈັນ ເຊັ່ນດຽວກັນ.
ແຫລ່ງຂ່າວ:
