ຂປລ. ກອງປະຊຸມ ຄັ້ງທີ 38 ຂອງຄະນະກໍາມະການຮ່ວມທະວີພາຄີ ລະຫວ່າງ ລັດຖະບານ ແຫ່ງ ສປປ ລາວ ແລະ ສສ ຫວຽດນາມ ໄດ້ຈັດຂຶ້ນໃນວັນທີ 27 ທັນວາ 2015 , ທີ່ນະຄອນຫລວງວຽງຈັນ, ໂດຍເປັນປະທານຮ່ວມ ລະຫວ່າງ ທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ ແຫ່ງ ສປປ ລາວ ແລະ ທ່ານ ຫງວຽນ ຊວນ ຟຸກ ຮອງນາຍົກລັດຖະມົນຕີ ແຫ່ງ ສສ ຫວຽດນາມ ພ້ອມບັນດາລັດຖະມົນຕີວ່າການ, ຊ່ວຍວ່າການ, ຫົວໜ້າກົມ ແລະ ເຈົ້າໜ້າທີ່ກ່ຽວຂ້ອງເຂົ້າຮ່ວມ.
ກອງປະຊຸມດັ່ງກ່າວ, ໄດ້ສຸມໃສ່ຕີລາຄາ ແລະ ທົບທວນຄືນ ສະພາບການຈັດຕັ້ງປະຕິບັດສັນຍາຮ່ວມມື ລາວ–ຫວຽດນາມ ໄລຍະ 2011-2015; ການຈັດຕັ້ງປະຕິບັດ ບັນດາຂໍ້ຕົກລົງ ຂອງສອງກົມການເມືອງສູນກາງພັກ; ເນື້ອໃນບົດບັນທຶກກອງປະຊຸມ ຄັ້ງທີ 37 ແລະ ສັນຍາວ່າດ້ວຍການຮ່ວມມືທະວີພາຄີ ລະຫວ່າງ ສອງລັດຖະບານ ປີ 2015 ເພື່ອໃຫ້ເຫັນແຈ້ງອັນໃດທີ່ປະຕິບັດໄດ້ອັນໃດຍັງປະຕິບັດບໍ່ໄດ້ ເຊິ່ງຈະໄດ້ເປີດໂອກາດໃຫ້ຄະນະຜູ້ແທນທັງສອງຝ່າຍສະເໜີ ແລະ ປະກອບຄໍາຄິດຄໍາເຫັນຮ່ວມກັນ ໃຫ້ຫລາຍຂຶ້ນກວ່າເກົ່າ; ພ້ອມທັງ ປຶກສາຫາລືທິດທາງແຜນການຮ່ວມມືທະວິພາຄີ ໄລຍະ 2016-2020 ແລະ ແຜນການຮ່ວມ ປະຈໍາປີ 2016 ໃຫ້ສອດຄ່ອງກັບສະພາວະຄວາມເປັນຈິງ ຂອງທັງສອງຝ່າຍ ແນ່ໃສ່ປະຕິບັດຂໍ້ຕົກລົງຂອງສອງກົມການເມືອງ ແລະ ສັນຍາວ່າດ້ວຍການຮ່ວມມືທະວີພາຄີ ລະຫວ່າງ ສອງລັດຖະບານໃຫ້ປະກົດຜົນເປັນຈິງ.
ກອງປະຊຸມຄັ້ງນີ້, ທັງສອງຝ່າຍໄດ້ລົງນາມຮ່ວມກັນ ໃນເອກະສານສໍາຄັນຕ່າງໆຄື: ສັນຍາວ່າດ້ວຍການຮ່ວມມືທະວີພາຄີ ໄລຍະ 2016-2020, ລະຫວ່າງ ສອງລັດຖະບານ; ຂໍ້ຕົກລົງວ່າດ້ວຍ ແຜນການຮ່ວມມື ປະຈໍາປີ 2016 ລະຫວ່າງ ສອງລັດຖະບານ; ບົດບັນທຶກກອງປະຊຸມ ຄັ້ງທີ 38, ລະບຽບການທົດລອງ ມອບໃຫ້ລັດຖະບານລາວ ເປັນຜູ້ຈັດຕັ້ງປະຕິບັດ ໂຄງການກໍ່ສ້າງໂຮງຮຽນມັດທະຍົມສົມ ບູນອານຸວົງ ທີ່ແຂວງໄຊສົມບູນ, ໂດຍມີການປະສານສົມທົບກັບຝ່າຍ ຫວຽດນາມ, ສັນຍາຮ່ວມມື ປະຈໍາປີ 2016 ລະຫວ່າງ ກະຊວງສຶກສາທິການ ແລະ ກິລາລາວ ກັບກະຊວງສຶກສາ ແລະ ບໍາລຸງສ້າງຫວຽດນາມ ແລະ ອື່ນໆ.
ແຫລ່ງຂ່າວ:
