ຂປລ. ກອງປະຊຸມສະພາສະໄໝສາມັນເທື່ອທີ 10 ຂອງສະພາແຫ່ງຊາດຊຸດທີ VII ເຊິ່ງໄດ້ດຳເນີນມາແຕ່ວັນທີ 7-25 ທັນວາ 2015, ທີ່ນະຄອນຫລວງວຽງຈັນ ໄດ້ອັດລົງດ້ວຍຜົນສຳເລັດອັນຈົບງາມ. ໂດຍການເປັນປະທານຂອງ ທ່ານນາງ ປານີ ຢາທໍ່ຕູ້ ປະທານສະພາແຫ່ງຊາດ, ໃຫ້ກຽດເຂົ້າຮ່ວມຂອງທ່ານ ຈູມມາລີ ໄຊຍະສອນ ປະທານປະເທດ ແຫ່ງ ສປປ ລາວ, ມີການນຳພັກ–ລັດ, ສະມາຊິກລັດຖະບານ, ພະນັກງານອາວຸໂສ-ບຳນານ ແລະ ສະມາຊິກສະພາແຫ່ງຊາດ ທຸກເຂດເລືອກຕັ້ງ ເຂົ້າຮ່ວມຢ່າງພ້ອມພຽງ.
ທ່ານ ສົມພັນ ແພງຄຳມີ, ຮອງປະທານສະພາແຫ່ງຊາດ, ຄວບຕຳແໜ່ງຫົວໜ້າຫ້ອງວ່າການສະພາແຫ່ງຊາດ ໄດ້ຖະແຫລງຜົນສຳເລັດຂອງກອງປະຊຸມໃນຄັ້ງນີ້ ຕໍ່ສື່ມວນຊົນ ໃນວັນທີ 25 ທັນ ວາ 2015 ນີ້ວ່າ: ກອງປະຊຸມໄດ້ພິຈາລະນາຮັບຮອງເອົາລັດຖະທຳມະນູນ ສະບັບປັບປຸງ ປີ 2015 ເຊິ່ງເປັນກົດໝາຍພື້ນຖານຂອງຊາດ ເພື່ອເປັນພື້ນຖານໃຫ້ແກ່ການປັບປຸງບູລະນະ ອົງການອຳນາດລັດໃຫ້ເຂັ້ມແຂງ, ເຮັດໃຫ້ການຄຸ້ມຄອງລັດ–ຄຸ້ມຄອງສັງຄົມ ດ້ວຍກົດໝາຍມີຄວາມເຂັ້ມງວດ ແລະ ສັກສິດ. ກອງປະຊຸມໄດ້ພິຈາລະນາຮັບຮອງເອົາກົດໝາຍ ທັງໝົດ 11 ສະບັບ, ໃນນີ້ມີກົດໝາຍສ້າງ ໃໝ່ຈຳນວນ 4 ສະບັບ ຄື: ກົດໝາຍວ່າດ້ວຍສະພາປະຊາຊົນຂັ້ນແຂວງ, ກົດໝາຍວ່າດ້ວຍພະນັກງານ–ລັດຖະກອນ, ກົດໝາຍວ່າດ້ວຍຕ້ານການຄ້າມະນຸດ ແລະ ກົດໝາຍວ່າດ້ວຍການປ້ອງກັນຊາດ. ກົດໝາຍປັບປຸງໃໝ່ ຈຳນວນ 7 ສະບັບ ຄື: ກົດໝາຍວ່າດ້ວຍສະພາແຫ່ງຊາດ, ກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ ແລະ ສະພາປະຊາຊົນຂັ້ນແຂວງ, ກົດໝາຍວ່າດ້ວຍການລົງທຶນຂອງລັດ, ກົດໝາຍວ່າດ້ວຍງົບປະມານ, ກົດໝາຍວ່າດ້ວຍສ່ວຍສາອາກອນ, ກົດໝາຍວ່າດ້ວຍການປົກຄອງທ້ອງຖິ່ນ ແລະ ກົດໝາຍວ່າດ້ວຍລັດຖະບານ.
ກອງປະຊຸມ ຍັງໄດ້ຮັບຟັງການລາຍງານຂອງລັດຖະບານ ກ່ຽວກັບຮ່າງແຜນພັດທະນາເສດຖະ ກິດ–ສັງຄົມ 5 ປີ ຄັ້ງທີ VIII (2016-2020), ຍຸດທະສາດຮອດປີ 2025, ວິໄສທັດຮອດປີ 2030, ການປະຕິບດໂຄງການດາວທຽມລາວ ແລະ ໂຄງການກໍ່ສ້າງເສັ້ນທາງລົດໄຟລາວ–ຈີນ, ການຄຸ້ມຄອງລັດ–ຄຸ້ມຄອງເສດຖະກິດ–ສັງຄົມໃນ 4 ຂະແໜງການຂອງລັດຖະບານ ຄື: ກະຊວງອຸດສາຫະກຳ ແລະ ການຄ້າ, ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ກະຊວງປ້ອງກັນຄວາມສະຫງົບ ແລະ ທະນາຄານແຫ່ງສປປ ລາວ. ພ້ອມທັງພິຈາລະນາຮັບຮອງ ການຈັດຕັ້ງປະຕິບັດວຽກງານທົດລອງ 3 ສ້າງ ແລະ ການເຄື່ອນໄຫວວຽກງານ 5 ປີ ຂອງສະພາແຫ່ງຊາດຊຸດທີ VII (2011-2015).
ກອງປະຊຸມ ໄດ້ພິຈາລະນາຮັບຮອງກ່ຽວກັບການກະກຽມບັ້ນເລືອກຕັ້ງ ສະມາຊິກສະພາແຫ່ງຊາດຊຸດທີ VIII, ສະມາຊິກສະພາປະຊາຊົນຂັ້ນແຂວງ ແລະ ການສ້າງຕັ້ງສະພາປະຊາຊົນຂັ້ນທ້ອງຖິ່ນ, ຮັບຮອງບົດລາຍງານຂອງອົງການກວດສອບແຫ່ງລັດ ກ່ຽວກັບຜົນການກວດສອບບົດສະຫລຸບຂາດຕົວ ຂອງການປະຕິບັດແຜນງົບປະມານແຫ່ງລັດ ສົກປີ 2013-2014, ການປະຕິບັດມະຕິຂອງສະພາແຫ່ງຊາດ, ການແກ້ໄຂການລະເມີດ ແລະ ການກວດຄືນຜົນການກວດສອບ. ພິເສດ ໃນໄລຍະການດຳເນີນກອງປະຊຸມ ໄດ້ມີປະຊາຊົນສົ່ງຄວາມຄິດເຫັນ ຜ່ານໂທລະສັບສາຍດ່ວນຈຳນວນ 152 ສາຍ ເຊິ່ງສ່ວນໃຫຍ່ແມ່ນກ່ຽວຂ້ອງກັບສ້ອມແປງຖະໜົນຫົນທາງ, ເງິນອຸດໜູນ ແລະ ເງິນນະໂຍບາຍຕ່າງໆ ເຊິ່ງທາງສະພາແຫ່ງຊາດ ໄດ້ສະຫລຸບສັງລວມ ແລະ ມອບໃຫ້ພາກສ່ວນກ່ຽວຂ້ອງໃຫ້ຄວາມກະຈ່າງແຈ້ງຜ່ານທາງສື່ມວນຊົນໄປແລ້ວ.
ໂອກາດນີ້ ທ່ານນາງປານີ ຢາທໍ່ຕູ້ ປະທານສະພາແຫ່ງຊາດ ໄດ້ກ່າວສູນທອນພົດ ປິດກອງປະຊຸມ ເຊິ່ງມີບາງຕອນສຳຄັນ ໄດ້ຊີ້ໃຫ້ເຫັນວ່າ: ສະພາແຫ່ງຊາດຊຸດທີ VII ກໍໃກ້ຈະໝົດວາລະໃນບໍ່ເທົ່າໃດເດືອນຂ້າງໜ້ານີ້ ເຊິ່ງໃນໄລຍະ 5 ປີ ຜ່ານມາໃນຖານະເປັນອົງການແຫ່ງສິດ ແລະ ຜົນປະໂຫຍດຂອງປະຊາຊົນ, ສະມາຊິກສະພາແຫ່ງຊາດແຕ່ລະທ່ານ ໄດ້ຍົກສູງຄວາມຮັບຜິດຊອບທາງດ້ານການເມືອງ ໃນການຄົ້ນຄວ້າພິຈາລະນາ ແລະ ຕົກລົງບັນຫາສຳຄັນຂອງຊາດ, ພ້ອມທັງລົງໃກ້ຊິດຕິດແທດ, ຮັບຟັງຂໍ້ຄິດເຫັນຂອງປະຊາຊົນ ແລະ ນຳສະເໜີຕໍ່ພາກສ່ວນກ່ຽວຂ້ອງ ພິຈາລະນາແກ້ໄຂຕາມຄວາມເໝາະສົມ.
ແຫລ່ງຂ່າວ:
