ທ່ານ ທອງສີ ສຸດທະວົງ ຮອງປະທານກຸ່ມກະສິກຳອິນຊີນະຄອນຫຼວງວຽງຈັນ ໄດ້ໃຫ້ສຳພາດຕໍ່ນັກຂ່າວໜັງສືພິມວຽງຈັນໃໝ່ ກ່ຽວກັບການກໍ່ສ້າງຕະຫຼາດກະສິກຳອິນຊີເປັນແບບຖາວອນວ່າ: ປັດຈຸບັນ ຕະຫຼາດກະສິກຳອິນຊີ ຕັ້ງຢູ່ໜອງສະພັງເລນ ໃນບໍລິເວນເດີ່ນພະທາດຫຼວງ ຕະຫຼາດດັ່ງກ່າວນີ້ມີຂໍ້ຫຍຸ້ງຍາກຫຼາຍອັນ ເປັນຕົ້ນ ສະຖານທີ່ຕະຫຼາດຄັບແຄບ ຊາວສວນເຂົ້າມາຂາຍຫຼາຍຂຶ້ນ ເຮັດໃຫ້ສະຖານທີ່ບໍ່ພຽງພໍ ພ້ອມນັ້ນ ສະຖານທີ່ຈອດລົດກໍ່ແອອັດ ເຮັດໃຫ້ມີຄວາມຫຍຸ້ງຍາກທາງດ້ານຈະລາຈອນ ດັ່ງນັ້ນ ທາງເມືອງໄຊເຊດຖາ ຮ່ວມກັບພະແນກກະສິກຳ-ປ່າໄມ້ ນວ ແລະ ຕາມການຕົກລົງຂອງເຈົ້າຄອງນະຄອນຫຼວງວຽງຈັນ ເຫັນດີໃຫ້ຍ້າຍຕະຫຼາດດັ່ງກ່າວ ນັບແຕ່ວັນທີ 1 ກຸມພາ 2014 ເປັນຕົ້ນໄປ ຈະຍ້າຍໄປຢູ່ທີ່ບໍລິເວນຮ່ອມວັດໜອງບອນ ທາງເບື້ອງທິດຕາເວັນອອກ ດ້ານໜ້າຕະຫຼາດຕັ້ງຢູ່ເສັ້ນທາງບ້ານນາໄຊນັ້ນ ເພື່ອອຳນວຍຄວາມສະດວກ ທັງເປັນການຂະຫຍາຍຕະຫຼາດໃຫ້ກວ້າງອອກ ເພື່ອຮອງຮັບກຸ່ມຜະລິດກະສິກຳອິນຊີທີ່ເຂົ້າໄປຈຳໜ່າຍ ເຊິ່ງປັດຈຸບັນມີທັງໝົດ 100 ກວ່າຄອບຄົວ ທີ່ໄດ້ຮັບການຢັ້ງຢືນ ສາມາດນຳພືດຜັກກະສິກຳອິນຊີມາຈຳໜ່າຍ.
ໃນຕໍ່ໜ້າ ຈະສ້າງຕະຫຼາດດັ່ງກ່າວ ເປັນຕະຫຼາດກະສິກຳອິນຊີນະຄອນຫຼວງແບບຖາວອນ ແລະ ໄດ້ມີແຜນປັບປຸງໃຫ້ສາມາດຈຳໜ່າຍໄດ້ໃນທຸກມື້ ຈະມີການຂາຍແບບຄົບວົງຈອນ ເປັນຕົ້ນແມ່ນ ຊີ້ນ ປາ ເປັດ ໄກ່ ໂດຍຈະມີການຫຸ້ມຫໍ່ເປັນລະບົບກະສິກຳສະອາດ.
ທີ່ມາ http://www.vientianemai.net/teen/khao/1/11010