ສຳນັກຂ່າວຕ່າງປະເທດ ລາຍງານໃນວັນທີ 24 ທັນວານີ້ວ່າ ລັດຖະບານໂຊມາລີ ປະເທດໃນທະວີບອາຟຣິກາໃຕ້ ໄດ້ອອກຄຳສັ່ງ ຫ້າມບໍ່ໃຫ້ມີການຈັດງານ ສະເຫລີມສະຫລອງ ເທດສະການຄຣິສມາສ ໂດຍໃຫ້ເຫດຜົນວ່າ ເທດສະການດັ່ງກ່າວຂອງຊາວຄຣິສ ແມ່ນເປັນໄພຄຸກຄາມ ຕໍ່ຄວາມສັດທາຂອງສາສະໜາອິດສະລາມ ພ້ອມທັງສັ່ງໃຫ້ໜ່ວຍງານ ດ້ານຄວາມໝັ້ນຄົງຕ່າງໆ ນຳໃຊ້ມາດຕະການ ເພື່ອສະກັດກັ້ນ ບໍ່ໃຫ້ມີການຈັດງານດັ່ງກ່າວນີ້ຂຶ້ນ ພາຍໃນປະເທດ.

ແນວໃດກໍຕາມ, ຄຳສັ່ງດັ່ງກ່າວ ແມ່ນຄວບຄຸມສະເພາະ ຊາວມຸດສະລິມ ພ້ອມດ້ວຍບັນດາໂຮງແຮມ ແລະ ສະຖານທີ່ຕ່າງໆເທົ່ານັ້ນ ໂດຍຊາວຕ່າງປະເທດ ທີ່ເປັນຊາວຄຣິສຕຽນ ຍັງອະນຸຍາດໃຫ້ຈັດງານສະຫລອງໄດ້ ແຕ່ຕ້ອງຈັດສະເພາະ ພາຍໃນເຮືອນຂອງຕົນເອງເທົ່ານັ້ນ.

ທ່ານ ໂມຮຳໝັດ ເຄໂຣ ເຈົ້າໜ້າທີ່ລະດັບສູງ ກະຊວງສາສະໜາ ແລະ ຍຸຕິທຳໂຊມາລີ ໄດ້ໃຫ້ສຳພາດວ່າ ” ການໃຫ້ຊາວມຸດສະລິມ ສະເຫລີມສະຫລອງວັນຄຣິສມາສ ພາຍໃນປະເທດໂຊມາລີນັ້ນ ບໍ່ແມ່ນສິ່ງທີ່ຖືກຕ້ອງ ເນື່ອງຈາກເລື່ອງແນວນີ້ ຄືກັບວ່າເປັນການ ປະຖິ້ມສາສະໜາ ”