ບໍລິສັດ ອຸດສາຫະກຳຕົ່ງແຢນຢຸນນານ ຈຳກັດ ເຊິ່ງເປັນຜູ້ຖືຮຸ້ນລາຍໃຫຍ່ຮ່ວມກັບບໍລິສັດ ນ້ຳມັນເຊື້ອໄຟລາວ ແລະ ບໍລິສັດ ຮ່ວມທຶນລາວ-ຈີນ ໄດ້ໃຊ້ທຶນ 179 ລ້ານໂດລາສະຫະລັດ ຫຼື ປະມານ 1.432 ຕື້ກີບ ສ້າງໂຮງກັ່ນນ້ຳມັນຂະໜາດໃຫຍ່ ໃນເຂດພັດທະນາກວມລວມໄຊເຊດຖາ ຄາດວ່າຈະສາມາດສະໜອງນ້ຳມັນແອັດຊັງ ແລະ ກາຊວນພຽງພໍກັບຄວາມຕ້ອງການພາຍໃນ.
ທ່ານ ອຸດອນ ແຍງວັນນະວົງ ຫົວໜ້າຄະນະບໍລິຫານເຂດພັດທະນາກວມລວມໄຊເຊດຖາ (ຂພຊ) ນະຄອນຫຼວງວຽງຈັນ ໃຫ້ຮູ້ບໍ່ດົນນີ້ວ່າ: ໂຄງການກໍ່ສ້າງໂຮງກັ່ນນ້ຳມັນ ທີ່ມີມູນຄ່າມະຫາສານ ກຳລັງມີການກໍ່ສ້າງໃນເຂດພັດທະນາກວມລວມໄຊເຊດຖາ ມາແຕ່ໄລຍະທ້າຍປີ 2014 ໄດ້ມີຄວາມຄືບໜ້າແລ້ວ ປະມານ 30% ຂອງການກໍ່ສ້າງທັງໝົດ ປັດຈຸບັນ ກຳລັງມີການຂຸ້ນຂ້ຽວກໍ່ສ້າງຖັງບັນຈຸນ້ຳມັນໜ່ວຍທີ 12 ຈາກທີ່ມີທັງໝົດ 16 ຖັງ ເຊິ່ງແຕ່ລະຖັງຈະສາມາດບັນຈຸນ້ຳມັນບໍ່ຕ່ຳກວ່າ 5 ລ້ານລິດ ການກໍ່ສ້າງ ຄາດວ່າຈະໃຊ້ເວລາ 2 ປີ ຈຶ່ງຈະສຳເລັດ ແລະ ດຳເນີນການຜະລິດໃນຕົ້ນປີ 2017.
ໂຄງການກໍ່ສ້າງໂຮງກັ່ນນ້ຳມັນ ກໍ່ເພື່ອຫຼຸດຜ່ອນການນຳເຂົ້ານ້ຳມັນຈາກຕ່າງປະເທດ ເນື່ອງຈາກໂຮງກັ່ນ ຈະສາມາດຜະລິດນ້ຳມັນແອັດຊັງໄດ້ປະມານ 230.000 ໂຕນຕໍ່ປີ ນ້ຳມັນກາຊວນ 380.000 ໂຕນຕໍ່ປີ ແລະ ແກັດແຫຼວ 12.000 ໂຕນຕໍ່ປີ ສຳລັບນ້ຳມັນແອັດຊັງ ແລະ ກາຊວນແມ່ນຈະສະໜອງໃຫ້ກັບບໍລິສັດ ນ້ຳມັນເຊື້ອໄຟລາວ ຈຳໜ່າຍພາຍໃນ ສ່ວນແກັດແມ່ນຈະສະໜອງໃຫ້ກັບປະເທດໃກ້ຄຽງ.
ໂຄງການພັດທະນາໂຮງກັ່ນນ້ຳມັນ ໄດ້ມີການສຶກສາຜົນກະທົບດ້ານສິ່ງແວດລ້ອມ ແລະ ສັງຄົມຢ່າງລະອຽດ ມີການປະຕິບັດຕາມກົນໄກ ເງື່ອນໄຂ ແລະ ລະບຽບການຂອງກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ພ້ອມກັນນີ້ ອຳນາດການປົກຄອງນະຄອນຫຼວງວຽງຈັນ ແລະ ກອງເລຂາຄະນະກຳມະການແຫ່ງຊາດລາວ ເພື່ອຄຸ້ມຄອງເຂດເສດຖະກິດພິເສດ ແລະ ເຂດເສດຖະກິດສະເພາະ (ຄຂພສ) ກໍ່ໄດ້ລົງຕິດຕາມກວດກາ ແລະ ຊຸກຍູ້ຢ່າງເປັນປົກກະຕິ.
ແຫລ່ງຂ່າວ:
