ສຳນັກຂ່າວຕ່າງປະເທດ ລາຍງານໃນວັນທີ 23 ທັນວານີ້ວ່າ ເຈົ້າໜ້າທີ່ກູ້ໄພຂອງຈີນ ໄດ້ຄົ້ນພົບສົບຜູ່ເສຍຊີວິດ ຄົນທຳອິດແລ້ວ ຈາກເຫດດິນເຈື່ອນ ຢູ່ເຂດນິຄົມອຸດສາຫະກຳ ເຫິງໄຕ້ອິ໋ວ (Hengtaiyu) ເມືອງເຊິນເຈິ້ນ ແຂວງກວາງຕຸ້ງ ຊຶ່ງເປັນເຫດເຮັດໃຫ້ ຕຶກຖະຫລົ່ມກ່ວາ 33 ຫລັງ ໃນວັນອາທິດທີ 20 ທັນວາຜ່ານມາ ຈົນເຖິງປັດຈຸບັນ ເຈົ້າໜ້າທີ່ສາມາດຊ່ວຍເຫລືອ ຜູ່ລອດຊີວິດໄດ້ແລ້ວ 7 ຄົນ ແລະ ຍັງມີຜູ່ສູນຫາຍອີກ 76 ຄົນ.
ທັງນີ້ ເຫດການດັ່ງກ່າວເກີດຂຶ້ນ ເນື່ອງຈາກຝົນຕົກໜັກ ເຮັດໃຫ້ກອງດິນ ແລະ ເສດວັດສະດຸກໍ່ສ້າງຢູ່ເທິງເນີນພູແຫ່ງໜຶ່ງ ທີ່ຖືກປະໄວ້ດົນກ່ວາ 2 ປີ ແລ້ວ ໄດ້ໄຫລເຈື່ອນລົງມາ ທັບຖົມເຂດຊຸມຊົນດັ່ງກ່າວ ກວມພື້ນທີ່ຫລາຍກ່ວາ 380,000 ຕາແມັດ ຫລື ຂະໜາດໃຫຍ່ເທົ່າກັບເດີ່ນເຕະບານ 50 ເດີ່ນ ຊຶ່ງບາງຈຸດ ດິນໄດ້ເຈື່ອນລົງມາຖົມໜາເຖິງ 10 ແມັດ.
ຫລັງຈາກເກດເຫດ ເຈົ້າໜ້າທີ່ຂອງຈີນ ໄດ້ເຂົ້າກວດຄົ້ນສຳນັກງານບໍລິສັດ ເຊິນເຈິ້ນ ອີ້ຊຽງຫລົງ ອິນເວສເມັ້ນ ເດເວລັອບເມັ້ນ ຊຶ່ງເປັນເຈົ້າຂອງສະຖານທີ່ ກອງດິນ ແລະ ເສດວັດສະດຸກໍ່ສ້າງ ດັ່ງກ່າວ ແຕ່ກໍບໍ່ພົບມີພະນັກງານຢູ່ຈັກຄົນແລ້ວ.
