ຂປລ. ພິທີມອບ-ຮັບໜ້າທີ່ ລະຫວ່າງ ທ່ານ ຄໍາຮຸ່ງ ເຮືອງວົງສີ ເຈົ້າແຂວງຜູ້ເກົ່າ (ໄປຮັບໜ້າທີ່ໃໝ່)ແລະ ທ່ານ ວັນໄຊ ແພງຊຸມມາ ເປັນເຈົ້າແຂວງຄົນໃໝ່ ພ້ອມນັ້ນ, ກໍໄດ້ປະກາດແຕ່ງຕັ້ງບັນດາຮອງເຈົ້າແຂວງຄົນໃໝ່ ຈໍານວນ 3 ທ່ານ ຄື: ທ່ານນາງ ແພງ ກັນຍາພິມ, ທ່ານ ພັນທອງ ເພັດໄຊສົມບູນ ແລະ ທ່ານ ພູໂຊນ ທໍາມະວິໄຊ. ພິທີໄດ້ຈັດຂຶ້ນໃນວັນທີ 22 ທັນວາ 2015 ທີ່ຫ້ອງວ່າການປົກຄອງແຂວງດັ່ງກ່າວ ໂດຍມີທ່ານ ຈັນສີ ໂພສີຄໍາ ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ, ມີບັນດາຄະນະພັກ, ພະນັກງານ ພ້ອມດ້ວຍພາກສ່ວນທີ່ກ່ຽວຂ້ອງ ເຂົ້າຮ່ວມ.
ເພື່ອສືບຕໍ່ຊີ້ນໍາ-ນໍາພາ ແລະ ຄຸ້ມຄອງບໍລິຫານວຽກງານແຂວງຫົວພັນ ທີ່ການຈັດຕັ້ງພັກ-ລັດຖະບານມອບ ໝາຍໃຫ້ ທັງປະຕິບັດພາລະບົດບາດ, ໜ້າທີ່ ແລະ ຂອບເຂດສິດຂອງຕົນໃຫ້ປະສົບຜົນສໍາເລັດນັ້ນ, ທ່ານ ຈັນສີ ໂພສີຄໍາ ໄດ້ໃຫ້ກຽດໂອ້ລົມໂດຍກ່າວວ່າ: ການມອບໝາຍຮັບໜ້າທີ່ ລະຫວ່າງເຈົ້າແຂວງຜູ້ເກົ່າ ແລະ ຜູ້ໃໝ່ໃນຄັ້ງນີ້ ແມ່ນມີຄວາມໝາຍເປັນຢ່າງຍິ່ງທີ່ເຈົ້າແຂວງຜູ້ໃໝ່ ຈະໄດ້ສືບຕໍ່ນໍາພາ, ຜັນຂະຫຍາຍເນື້ອໃນຈິດໃຈຂອງພັກ-ລັດ ໃຫ້ປະກົດຜົນເປັນຈິງ. ພ້ອມກັນນັ້ນ ກໍເພື່ອເປັນການຮອງຮັບບໍາລຸງຍົກລະດັບພະນັກງານການນໍາຜູ້ທີ່ມີ ຄວາມຮູ້, ຄວາມສາມາດເຂົ້າໃນພາລະກິດລວມຂອງຊາດ. ການໝູນວຽນ, ການຊັບຊ້ອນໜ້າທີ່ເຊິ່ງແມ່ນເປັນເລື່ອງປົກກະຕິ, ທັງເປັນກົດເກນ ແລະ ທັງແມ່ນຫລັກການຂອງພັກເຮົາທີ່ເຄິຍປະຕິ ບັດກັນມາ.
ພ້ອ ມກັນນີ້, ທ່ານເຈົ້າແຂວງຜູ້ໃໝ່ ກໍຕ້ອງໄດ້ເອົາໃຈໃສ່ນໍາພາເຕົ້າໂຮມຄວາມສາມັກຄີໃນໝູ່ຄະນະ, ພະນັກງານ-ລັດຖະກອນໃຫ້ແໜ້ນແຟ້ນ, ເອົາໃຈໃສ່ສຶກສາອົບຮົມການເມືອງແນວຄິດພະນັກງານການນໍາແຂວງ ລວມທັງພະນັກງານ-ລັດ ຖະກອນທົ່ວແຂວງຫົວພັນ ໃຫ້ມີຫລັກສະນະຫລັກໝັ້ນການເມືອງໜັກແໜ້ນ, ສ້າງໃຫ້ພະນັກງານມີສະ ຕິເຄົາລົບລະບຽບ-ກົດໝາຍ, ມີສະຕິຕໍ່ການຈັດຕັ້ງ, ເພີ້ມທະວີຄວາມຮັບຜິດຊອບຕໍ່ການນໍາພາສະມາຊິກພັກ-ພະນັກງານໃນຂົງເຂດ ທີ່ຕົນຮັບຜິດ ຊອບໃຫ້ມີຜົນສໍາເລັດ.
ແຫລ່ງຂ່າວ:
