ຂປລ.ກອງປະຊຸມສະໄໝສາມັນເທື່ອທີ 10 ຂອງສະພາແຫ່ງຊາດຊຸດທີ 7 ໄດ້ດຳເນີນມາເປັນມື້ທີ 12 ໃນວັນທີ 22 ທັນວາ 2015, ເຊິ່ງບັນດາສະມາຊິກສະພາແຫ່ງຊາດ ສສຊ ທຸກເຂດເລືອກຕັ້ງ ໄດ້ສືບຕໍ່ສຸມໃສ່ພິຈາລະ ນາປະກອບຄຳຄິດຄຳເຫັນ ແລະ ຮັບຮອງເອົາຜົນການຈັດຕັ້ງປະຕິບັດ ການທົດລອງວຽກງານ 3 ສ້າງ, ຮ່າງວິໄສທັດຮອດປີ 2030 ແລະ ຍຸດທະສາດການພັດທະນາເສດຖະກິດ-ສັງຄົມຮອດປີ 2025, ພ້ອມດ້ວຍຮ່າງແຜນພັດ ທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ VIIIແລະ ແຜນງົບປະມານແຫ່ງລັດ 5 ປີ ຄັ້ງທີ VIII.
ທ່ານ ຄຳໝັ້ນ ສູນວິເລີດ ລັດຖະມົນຕີວ່າການກະຊວງພາຍໃນ ຕາງໜ້າລັດຖະບານ ໄດ້ຊີ້ໃຫ້ເຫັນກ່ຽວກັບສະພາບລວມ ກໍຄື ຜົນສຳເລັດ ແລະ ຂໍ້ຄົງຄ້າງ ໃນການຈັດຕັ້ງຜັນຂະຫຍາຍມະຕິ 03/ກມສພ ວ່າດ້ວຍການທົດລອງວຽກງານ 3 ສ້າງ ເຊິ່ງມີຈຳນວນ 52 ເມືອງ 109 ບ້ານ ທົ່ວປະເທດ ໃນໄລຍະຜ່ານມາ ເຊິ່ງສາມາດເຮັດໃຫ້ທຸກບ້ານເປົ້າໝາຍໃໝ່ ທີ່ມີລັກສະນະຮອບດ້ານ. ອັນພົ້ນເດັ່ນແມ່ລະບົບການເມືອງໄດ້ຮັບການປັບປຸງໜັກແໜ້ນເຂັ້ມແຂງ, ປະຊາຊົນບັນດາເຜົ່າມີສະຕິຕື່ນຕົວເປັນເຈົ້າການ ເຂົ້າຮ່ວມໃນຂະບວນການຫລາຍຂຶ້ນ, ຕົວແບບໃນການຜະ ລິດສິນຄ້າເກີດຂຶ້ນຢ່າງແຜ່ຫລາຍ, ຄວາມທຸກຍາກຂອງປະຊາຊົນບັນດາເຜົ່າ ໄດ້ຮັບການແກ້ໄຂໃຫ້ດີຂຶ້ນເທື່ອລະກ້າວ. ໃນຂະນະດຽວກັນ ປະຊາຊົນໃນບ້ານ 3 ສ້າງ ແລະ ອ້ອມຂ້າງ ກໍໄດ້ຮັບຜົນປະໂຫຍດຕົວຈິງຈາກໂຄງການລົງທຶນຂອງລັດ ເພື່ອການພັດທະນາໃນຫລາຍດ້ານ, ລວມທັງການໃຫ້ສິນເຊື່ອເພື່ອການຜະລິດເປັນສິນຄ້າ ແລະ ອື່ນໆ ເຊິ່ງມີມູນຄ່າຫລາຍຕື້ກີບ. 3 ປີ ຜ່ານມາ ເຫັນວ່າມີບ້ານ ແລະ ຄອບຄົວພັດທະນາເກີດຂຶ້ນ, ນັບທັງຄອບຄົວຕົວແບບ, ຜູ້ປະກອບການ ແລະ ນັກພັດທະນາດີເດັ່ນ ຢ່າງຫລວງຫລາຍ, ການເກັບລາຍຮັບເຂົ້າງົບປະມານ ເພີ່ມຂຶ້ນທຸກເມືອງ ແລະ ບ້ານເປົ້າໝາຍ.
ທ່ານ ສົມດີ ດວງດີ ລັດຖະມົນຕີວ່າການກະຊວງແຜນການ ແລະ ການເງິນ ໄດ້ຍົກໃຫ້ເຫັນບາງບັນຫາພົ້ນເດັ່ນຂອງການພັດທະນາເສດຖະກິດ-ສັງຄົມ ໄລຍະ 15 ປີ ໂດຍລວມຍອດຜະລິດຕະພັນພາຍໃນ GDP ໄດ້ມີການຂະຫຍາຍຕົວດ້ວຍຈັງຫວະສະເລ່ຍ 7,1% ຕໍ່ປີ ໃນໄລະຍະປີ 2001-2010 ແລະ ປະມານ 8% ໃນປີ2011-2015, ສະເລ່ຍລາຍຮັບເພີ່ມຂຶ້ນຈາກ 319 ໂດລາສະຫະລັດ ມາເປັນ 1.671 ໂດລາສະຫະລັດໃນປັດຈຸບັນ. ໂຄງປະກອບແຮງງານມີການຫັນປ່ຽນຢ່າງຕັ້ງໜ້າ, ປີ2005 ສາມາດຢຸດຕິການປູກຝິ່ນຢ່າງຂາດຕົວ, ຢຸດຕິການຖາງປ່າເຮັດໄຮ່ ແລະ ແກ້ໄຂຄວາມທຸກຍາກໂດຍພື້ນຖານ ໃນປີ 2010. ສຳລັບການຈັດຕັ້ງປະຕິບັດ ແຜນພັດທະນາເສດຖະກິດ 5 ປີ ຄັ້ງທີ VII ຜ່ານມາ GDP ຂະຫຍາຍຕົວ 7,9% ລາຍໄດ້ 1.700 ໂດລາສະຫະລັດ ຕໍ່ຄົນຕໍ່ປີ, ລັດຖະບານໄດ້ປັບປຸງກົນໄກການສ້າງລາຍຮັບງົບປະມານເພີ່ມຂຶ້ນ, ປັບປຸງກົນໄກການຄ້າ ລະຫວ່າງປະເທດເຮັດໃຫ້ມູນຄ່ານຳເຂົ້າ-ສົ່ງອອກ ມີທ່າອ່ຽງເພີ່ມຂຶ້ນ, ປະຊາກອນເພີ່ມຂຶ້ນປະມານ 1 ລ້ານຄົນໃນຮອບ 10 ປີຜ່ານ ມາ, ການດຳເນີນທຸລະກິດ, ການຜະລິດ, ການບໍລິການ ແລະ ການລົງທຶນ ສືບຕໍ່ມີບັນຍາກາດທີ່ດີ, ການພັດທະນາຊັບພະຍາກອນມະນຸດ ໄປຕາມເປົ້າໝາຍສະຫັດສະວັດ, ບັນດາແຫລ່ງທ່ອງທ່ຽວໄດ້ຮັບການພັດທະນາ ແລະ ປັບປຸງໃຫ້ດີຂຶ້ນກ່ວາເກົ່າ, ປັດຈຸບັນ ມີແຫລ່ງທ່ອງທ່ຽວທຳມະຊາດ 1.093 ແຫ່ງ, ວັດທະນະທຳ 541 ແຫ່ງ ແລະແຫລ່ງທ່ອງທ່ຽວທາງປະຫວັດສາດ 282 ແຫ່ງ.
ສຳລັບຮ່າງວິໃສທັດຮອດປີ 2030 ຍຸດທະສາດການພັດທະນາ ເສດຖະກິດ-ສັງຄົມ ໄລຍະ 10 ປີ 2016-2025 ແລະ ແມ່ນສູ້ຊົນພັດທະນາປະເທດ ໃຫ້ຫລຸດພົ້ນອອກຈາກຄວາມດ້ອຍພັດທະ ນາ ໃນປີ 2020, ກ້າວສູ່ປະເທດກຳລັງພັດທະນາ ທີ່ມີລາຍຮັບກາງ-ສູງ ຕາມທິດການພັດທະນາສີຂຽວ ແລະ ຍືນຍົງ, ເມື່ອເຖິງປີ2030. ລາຍໄດ້ແຫ່ງຊາດໃຫ້ເພີ່ມຂຶ້ນ 4 ເທົ່າ ຂອງປີ 2015, ມີອຸດສາຫະກຳ 3 ເສົາຄ້ຳ, ໂຄ່ງລ່າງພື້ນຖານເຂັ້ມແຂງ ສຳລັບການຫັນເປັນອຸດສາຫະກຳ ແລະ ທັນສະໄໝ, ເສດຖະກິດຕະຫລາດຕາມທິດສັງຄົມນິຍົມ. ຄາດໝາຍລວມຂອງຮ່າງແຜນພັດທະນາເສດຖະ ກິດ-ສັງຄົມແຫ່ງຊາດ 5 ປີ ຄັ້ງທີ VIII (2016-2020) ແມ່ນຮັບປະກັນສະຖຽນລະພາບທາງດ້ານການເມືອງ, ເສດຖະກິດຂະຫຍາຍຕົວຢ່າງຕໍ່ເນື່ອງ, ມີການຄຸ້ມຄອງ ແລະ ນຳໃຊ້ຊັບພະຍາກອນທຳມະຊາດຢ່າງມີປະສິດທິຜົນສູງ, ສ້າງໃຫ້ໄດ້ຮູບແບບການຫັນປ່ຽນ ການພັດທະນາຕາມທິດເສີມຂະ ຫຍາຍທ່າແຮງບົ່ມຊ້ອນ ແລະ ຂໍ້ໄດ້ປຽບຂອງປະເທດ, ເຂົ້າຮ່ວມໃນການເຊື່ອມໂຍງກັບພາກພື້ນ ແລະ ສາກົນຢ່າງເປັນເຈົ້າການ.
ຈາກນັ້ນ, ທ່ານ ດຣ. ລຽນ ທິແກ້ວ ລັດຖະມົນຕີວ່າການກະຊວງການເງິນ ກໍໄດ້ຊີ້ໃຫ້ເຫັນສະພາບການຈັດຕັ້ງປະຕິບັດແຜນງົບປະມານແຫ່ງລັດ 5 ປີ ຄັ້ງ VIIກໍຄືການສ້າງລາຍຮັບໃນ 5 ປີຜ່ານມາ ສາມາດປະຕິບັດເກືອບ 1 ແສນຕື້ກີບ, ໃນນີ້ເປັນລາຍຮັບພາຍໃນ ກວມ 76 ພັນຕື້ກວ່າກີບ, ໃນຂະນະທີ່ລາຍຈ່າຍລວມ 118.000 ຕື້ກວ່າກີບ ແລະ ການຂາດດຸນງົບປະມານ ປະຕິບັດໄດ້ໂດຍລວມເກືອບ 20 ພັນຕື້ກີບ. ພ້ອມນີ້ ທ່ານຍັງຊີ້ແຈງກ່ຽວກັບການວາງນະໂຍບາຍ ແລະ ການຄຸ້ມຄອງລາຍຮັບ ເປັນຕົ້ນ ແມ່ນຂົງເຂດສ່ວຍສາອາກອນ, ພາສີ, ລວມທັງການຄຸມຄອງຊັບສິນຂອງລັດ, ການຄຸ້ມການເງິນລັດວິສາຫະກິດ, ການຄຸ້ມຄອງງົບປະມານແຫ່ງລັດ ພ້ອມດ້ວຍບັນດາທິດທາງ, ຄາດໝາຍສູ້ຊົນ ແລະ ໜ້າທີ່ຈຸດສຸມ ໃນການພັດທະນາຂະແໜງການເງິນໄລຍະປີ 2016-2020./.
ແຫ່ລງຂ່າວ
