ໂຄງການ​ນ້ຳ​ປະປາ​ແສນ​ດິນ ເມືອງ​ນາ​ຊາຍ​ທອງ ນະຄອນຫຼວງ​ວຽງ​ຈັນ ມີ​ການ​ສຶກ​ສາ​ໂຄງການ​ເບື້ອງ​ຕົ້ນ​ແຕ່​ປີ 2014 ເປັນຕົ້ນ​ມາ ເຊິ່ງ​ໂຄງການ​ດັ່ງກ່າວ ມີເປົ້າ​ໝາຍ​ສຳຄັນ​ ເພື່ອ​ຕອບ​ສະໜອງ​ໄດ້​ຄວາມ​ຮຽກຮ້ອງ​ຕ້ອງການ​ຂອງ​ລັດຖະບານ ໃນ​ການຫຼຸດຜ່ອນ​ອັດຕາ​ສ່ວນ ຈຳນວນ​ປະຊາ​ກອນ​ທີ່​ບໍ່​ສາມາດ​ໄດ້​ຮັບ​ນ້ຳດື່ມ​ສະອາດ ພາຍ​ໃນ​ປີ 2015 ໃຫ້​ປະສົບ​ຜົນສຳເລັດ​ຕາມ​ຄາດໝາຍ​ວາງ​ໄວ້.

ພິທີ​ເຊັນ​ສັນຍາ​ສຳ​ປະທານ ໂຄງການ​ກໍ່ສ້າງ​ໂຮງງານ​ນ້ຳ​ປະປາ​ແສນ​ດິນ ຈັດ​ຂຶ້ນ​ໃນ​ທ້າຍ​ອາທິດ​ຜ່ານ​ມາ ຢູ່​ທີ່​ໂຮງແຮມ​ແລນມາກ ແມ່​ຂອງ ຣີ​ເວີ​ໄຊ ນະຄອນຫຼວງ​ວຽງ​ຈັນ ຮ່ວມ​ລົງ​ນາມ ມີທ່ານ ຄຳ​ເຜີຍ ວົງສາ​ຄຳ​ຜຸຍ ຜູ້ອຳນວຍ​ການ​ລັດ​ວິ​ສາ​ຫະ​ກິດ​ນ້ຳປະປານະຄອນຫຼວງ ແລະ ທ່ານ ພຶດສະພາ ພູມ​ມະ​ສັກ ປະທານບໍລິສັດ ເອ​ເຊຍ​ລົງທຶນພັດທະນາ ແລະ ກໍ່ສ້າງ​ ຈຳກັດ​ຜູ້​ດຽວ ໂດຍ​ມີທ່ານ ແກ້ວ​ພິລາ​ວັນ ອາ​ໄພ​ລາດ ຮອງ​ເຈົ້າ​ຄອງ​ນະຄອນຫຼວງ​ວຽງຈັນ ພ້ອມ​ດ້ວຍ​ບັນດາຫົວໜ້າ​ພະແນກ ຫ້ອງການ ແລະ ພະນັກງານ-ວິຊາ​ການ​ກ່ຽວຂ້ອງ​ສອງຝ່າຍ​ເຂົ້າ​ຮ່ວມ.

ສຳລັບ​ໂຄງການ​ກໍ່ສ້າງ​ໂຮງງານ​ຜະລິດ​ນ້ຳ​ປະ​ນາ​ແສນ​ດິນ ລະບົບ​ການ​ຜະລິດ​ແມ່ນ​ຈະ​ນຳໃຊ້​ນ້ຳ​ຈາກ​ແມ່ນ້ຳ​ງື່ມ ໂຄງການມີ​ໄລຍະ​ການ​ກໍ່ສ້າງ 18 ເດືອນ ດ້ວຍ​ມູນ​ຄ່າທັງ​ໝົດ 15 ລ້ານໂດ​ລາ​ສະຫະລັດ ຫຼື ປະມານ 120 ຕື້​ກີບ ມີ​ກຳລັງ​ການ​ຜະລິດ 24.000 ແມັດ​ກ້ອນ/ວັນ ຄາດວ່າໂຄງການ​ສຳເລັດ​ ຈະ​ສາມາດປະກອບສ່ວນ​ເຂົ້າ​ໃນ​ແຜນການຂະຫຍາຍ​ລະບົບ​ນ້ຳ​ປະປາ​ທົ່ວນະຄອນຫຼວງ ຮອດ​ປີ 2020 ເພີ່ມ​ຂຶ້ນ​ຫຼາຍ​ກວ່າ 365.000 ແມັດ​ກ້ອນ/ວັນ ຈາກ​ປັດຈຸບັນ ມີພຽງ​ແຕ່​ປະມານ 180.000 ແມັດກ້ອນ/ວັນ ເຊິ່ງ​ນັ້ນ​ບໍ່​ສາມາດ​ຕອບສະໜອງ​ໄດ້​ຄວາມ​ຮຽກຮ້ອງຕ້ອງການ​ຂອງ​ສັງຄົມ ກໍ່​ຄືການຂະຫຍາຍຕົວ​ທາງ​ດ້ານ​ເສດ​ຖະກິດ-ສັງຄົມໃນ​ອະນາຄົດ.