ຕາມຂ່າວຕ່າງປະເທດ, ວັນທີ 14 ມັງກອນ, ອິນເດຍ ປະສົບຄວາມສຳເລັດໃນການ ປຸກລະດົມ ການຊັກຢາວັງແຊງປ້ອງກັນພະຍາດໂປລິໂອ ເຮັດໃຫ້ບໍ່ມີການກວດພົບຜູ້ຕິດເຊື້ອພະຍາດໂປລິໂອອີກໃນໄລຍະ 3 ປີທີ່ຜ່ານມາ ອັນຈະເຮັດໃຫ້ປະເທດອິນເດຍ ໄດ້ຮັບການຮັບຮອງຈາກອົງການ ອະນາໄມໂລກ ໃຫ້ເປັນປະເທດ ຫລ້າສຸດທີ່ກຳຈັດພະຍາດໂປລິໂອໄດ້ສຳເລັດ, ຄາດວ່າ ການປະກາດຢ່າງເປັນທາງການ ຈະມີຂຶ້ນໃນທ້າຍເດືອນມີນາ.
ຂ່າວແຈ້ງວ່າ: ອິນເດຍເຄີຍເປັນປະເທດໜຶ່ງທີ່ມີຄວາມຫຍຸ້ງຍາກ ໃນການປຸກລະດົມການຊັກຢາວັກແຊງປ້ອງກັນພະຍາດໂປລິໂອ ເນື່ອງຈາກປະຊາຊົນສ່ວນຫລາຍ ມີຖານະທຸກຍາກ ແລະ ຢູ່ໃນພື້ນທີ່ຫ່າງໄກສອກຫລີກ ເຮັດໃຫ້ລັດຖະບານຕ້ອງໃຊ້ງົບປະມານປີລະ 2.500 ລ້ານໂດລາສະຫະລັດ “ຕັ້ງແຕ່ປີ 1995“ ພ້ອມທັງ ລະດົມອາສາສະໝັກຈຳນວນຫລາຍລ້ານຄົນ ໄປຊ່ວຍຢອດວັກແຊງໃຫ້ເດັກນ້ອຍ ຕາມສະຖານີລົດໄຟ, ລົດໂດຍສານ, ສະຖານທີ່ກໍ່ສ້າງ, ງານບຸນປະເພນີຕ່າງໆ, ບາງຄົນກໍຂັບຂີ່ລົດຈັກ ຫລືຍ່າງໄປຫາບັນດາບ້ານທີ່ຢູ່ຫ່າງໄກແຕ່ຜົນທີ່ໄດ້ຮັບແມ່ນປະສົບ ຜົນສຳເລັດ ເພາະຊ່ວຍໃຫ້ເດັກນ້ອຍ ພາຍໃນປະເທດ ຈຳນວນກວ່າ 170 ລ້ານຄົນໄດ້ຮັບວັກແຊງໃນແຕ່ລະປີ.
ເຊື້ອພະຍາດໂປລິໂອ ຈະເຂົ້າໄປທຳລາຍສູນກາງລະບົບປະສາດ ແລະ ເຮັດໃຫ້ເປັນອຳມະພາດໄດ້ພາຍໃນບໍ່ເທົ່າໃດຊົ່ວໂມງທີ່ຕິດເຊື້ອ ແລະ ບໍ່ສາມາດແກ້ໄຂໃຫ້ກັບມາເປັນປົກກະຕິໄດ້ ຖືເປັນພະ ຍາດທີ່ຕິດຕໍ່ງ່າຍ ແລະ ມັກແຜ່ລະບາດໃນພື້ນທີ່ ທີ່ມີສຸຂະອານະໄມບໍ່ສະອາດພຽງພໍ ໂດຍສະເພາະ ເດັກອາຍຸຕ່ຳກວ່າ 5 ປີແມ່ນມີຄວາມສ່ຽງຕໍ່ການຕິດເຊື້ອພະຍາດນີ້ຫລາຍທີ່ສຸດ, ແຕ່ສາມາດປ້ອງກັນໄດ້ດ້ວຍການໃຫ້ວັກແຊງ. ປັດຈຸບັນມີ ປະເທດອັຟການິດສະຖານ, ປາກິດສະຖານ, ນີເຊຣີ ທີ່ຍັງມີການແຜ່ລະບາດຂອງພະຍາດໂປລິໂອ.
ທີ່ມາ http://www.kpl.net.la/lao/world/world3.htm