ວັນ​ທີ 16 ທັນວາ 2015 ທີ່ເຂດ​ເສດຖະກິດ​ສະເພາະ​ບຶງ​ທາດຫຼວງ ນະຄອນຫຼວງ​ວຽງ​ຈັນ ໄດ້ມີ​ຂະ​ບວນ​ການ​ປ່ອຍ​ປາ​ລົງ​ສູ່ໜອງ​ນ້ຳ​ທຳ​ມະ​ຊາດ ໂດຍ​ການເຂົ້າ​ຮ່ວມ​ຂອງ​ທ່ານ ​ດຣ. ສິນ​ລະວົງ ຄຸດ​ໄພທູນ ເຈົ້າ​ຄອງ​ນະຄອນຫຼວງ​ວຽງ​ຈັນ ທັງ​ເປັນ​ຄະນະ​ກຳມະ​ການ​ແຫ່ງ​ຊາດ​ລາວ ເພື່ອ​ຄຸ້ມຄອງ​ເຂດ​ເສດຖະກິດ​ພິເສດ ແລະ ເຂດ​ເສດຖະກິດ​ສະເພາະ (​ຄຂພສ) ທ່ານ​ນາງ ບົວ​ທາ ຂັດຕິ​ຍະ ລັດຖະມົນຕີ​ຊ່ວຍ ຮອງ​ປະທານຫົວໜ້າ​ກອງ​ເລຂາ (​ຄຂພສ) ພ້ອມ​ດ້ວຍ​ບັນດາ​ລັດຖະ​ມົນຕີ ຕະຫຼອດ​ຮອດ​ພາກສ່ວນກ່ຽວຂ້ອງ.

ການ​ສ້າງ​ຂະ​ບວນ​ການ​ໃນຄັ້ງ​ນີ້ ​ເພື່ອ​ສະເຫຼີມສະຫຼອງ​ວັນ​ສຳຄັນ​ຕ່າງໆ​ຂອງ​ຊາດ ເປັນຕົ້ນ ວັນສະຖາປະນາ ​ສປປ ລາວ ຄົບຮອບ 40 ປີ ວັນ​ສ້າງຕັ້ງ​ພັກ​ປະຊາ​ຊົນ​ປະຕິວັດ​ລາວ ຄົບຮອບ 60 ປີ ວັນ​ຄ້າຍ​ວັນ​ເກີດ​ຂອງ​ປະທານ ໄກສອນ ພົມວິຫານ ຄົບຮອບ 95 ປີ ພ້ອມ​ກັນ​ນັ້ນ ເພື່ອ​ເປັນ​ການສ້າງ​ຄວາມ​ອຸດົມສົມບູນ​ທາງນ້ຳ ໃຫ້​ແກ່​ໜອງ​ນ້ຳ​ໃຫຍ່​ໃນ​ກາງ​ບຶງທາດຫຼວງ ທີ່​ມີ​ຄວາມ​ຍາວ 50 ເຮັກຕາ ເລິກ 7 ແມັດ ແລະ ບັນດາ​ຄອງ​ນ້ຳ​ອ້ອມ​ຮອບ​ເຂດເສດຖະກິດ​ສະເພາະ​ບຶງ​ທາດຫຼວງ ໃຫ້​ກາຍເປັນ​ສະຖານທີ່​ທ່ອງ​ທ່ຽວ ພັກຜ່ອນ​ຂອງ​ຊາວ​ນະຄອນຫຼວງວຽງ​ຈັນ ນັກ​ທ່ອງ​ທ່ຽວ​ທັງ​ພາຍໃນ ແລະ ຕ່າງປະເທດ ເຊິ່ງ​ປາ​ທີ່ໄດ້​ນຳ​ເອົາ​ມາ​ປ່ອຍ​ໃນ​ຄັ້ງ​ນີ້​ແມ່ນປາ​ກິນ​ຫຍ້າ ປາ​ເກັດ​ແລບ ຈຳນວນ 1.000 ກິ​ໂລ ທີ່​ມີ​ນ້ຳໜັກປະມານ​ໂຕລະ 1 ກິ​ໂລ ແລະ ຈະສືບຕໍ່​ໄປ​ປ່ອຍ​ເລື້ອຍໆ ເຊິ່ງ​ຄາດວ່າ​ຈະ​ຫຼາຍ​ກວ່າ 10.000 ກິ​ໂລ.

ແຫລ່ງຂ່າວ: