ຂປລ. ໃນວັນທີ 14 ມັງກອນ 2014 ທີ່ຫ້ອງວ່າການສະພາແຫ່ງຊາດ ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ໄດ້ໃຫ້ກຽດຕ້ອນຮັບການເຂົ້າຢ້ຽມຂ່ຳນັບ ຂອງ ທ່ານ ອານ ຮົງ ຈູນ ປະທານກຳມາທິການການຕ່າງປະເທດ ແລະ ເຕົ້າໂຮມຊາດເກົາຫລີ ສະພາແຫ່ງຊາດແຫ່ງ ສ.ເກົາ ຫລີ ພ້ອມດ້ວຍຄະນະ ໃນໂອກາດທີ່ທ່ານເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ແຕ່ວັນທີ 13-16 ມັງກອນ 2014.
ທ່ານ ປະທານສະພາແຫ່ງຊາດ ໄດ້ສະແດງຄວາມຍິນດີຕ້ອນຮັບພ້ອມທັງຕີລາຄາສູງຕໍ່ ທ່ານ ອານ ຮົງ ຈູນ ພ້ອມດ້ວຍຄະນະ ທີ່ມາຢ້ຽມຢາມ ແລະ ເຮັດວຽກ ຢູ່ ສປປ ລາວໃນຄັ້ງນີ້. ເພື່ອ ສືບຕໍ່ຊຸກຍູ້ການພົວພັນຮ່ວມມືສອງຝ່າຍໃຫ້ມີປະສິດທິຜົນກວ່າ ເກົ່າ ແລະ ທັງເປັນການຜັນຂະ ຫຍາຍຜົນສຳເລັດຂອງການແລກປ່ຽນເຄື່ອນໄຫວຢ້ຽມຢາມກັນລະຫວ່າງປະມຸກລັດ ແລະ ການນຳຂັ້ນສູງຂອງສອງປະເທດໃນຊຸມປີຜ່ານມາ, ພ້ອມນີ້ຍັງເປັນການປະກອບສ່ວນ ສຳຄັນເຂົ້າໃນການ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ດີລະຫວ່າງສອງປະເທດ ສປປ ລາວ -ສ.ເກົາຫລີ ເວົ້າລວມ,ເວົ້າສະເພາະແມ່ນລະຫວ່າງສອງອົງການນິຕິບັນຍັດ ແລະ ສອງກຳມາທິການຕ່າງປະເທດ ໃຫ້ນັບມື້ກ້າວໜ້າຂະຫຍາຍຕົວຢ່າງບໍ່ຢຸດຢັ້ງ.
ໂອກາດນີ້ ທ່ານ ອານ ຮົງ ຈູນ ໄດ້ສະແດງຄວາມຂອບອົກຂອບໃຈຕໍ່ ທ່ານ ປະທານສະ ພາ ແຫ່ງຊາດ ທີ່ໄດ້ໃຫ້ກຽດຕ້ອນຮັບອັນອົບອຸ່ນ ແລະ ແຈ້ງໃຫ້ຊາບເຖິງຈຸດປະສົງຂອງການເດີນທາງ ມາຢ້ຽມຢາມ ລາວ ແລະ ເຮັດວຽກໃນຄັ້ງນີ້. ເພື່ອສືບຕໍ່ຊຸກຍູ້ການພົວພັນຮ່ວມມືສອງຝ່າຍໃຫ້ມີປະ ສິດທິຜົນກວ່າເກົ່າ ແລະ ນຳເອົາຜົນປະໂຫຍດຕົວຈິງມາສູ່ປະຊາຊົນສອງຊາດຢ່າງເປັນປົກກະຕິ ຕະຫລອດມາ.ອັນສຳຄັນແມ່ນຫ້ອງວ່າການສະພາແຫ່ງຊາດລາວ ແລະ ສູນຄົ້ນຄວ້າ-ສະໜອງຂໍ້ມູນຂອງສະພາແຫ່ງຊາດ ສ.ເກົາຫລີ ໄດ້ລົງນາມບົດບັນທຶກຊ່ວຍຈຳວ່າດ້ວຍການຮ່ວມມືນຳກັນ.
ໃນວັນດຽວກັນກໍໄດ້ມີການພົບປະສອງຝ່າຍລະຫວ່າງ ທ່ານ ສຈ.ດຣ.ບຸນຍົງ ບຸບຜາ ຮອງປະທານກຳມາທິການການຕ່າງປະເທດ ສະພາແຫ່ງຊາດ ແຫ່ງ ສປປ ລາວ ພ້ອມດ້ວຍຄະນະ ແລະ ທ່ານ ອານ ຮົງ ຈູນ ປະທານກຳມາທິການການຕ່າງປະເທດ ແລະ ເຕົ້າໂຮມຊາດເກົາຫລີ ສະພາແຫ່ງຊາດ ແຫ່ງ ສ.ເກົາຫລີ ພ້ອມດ້ວຍຄະນະ.
ການ ພົບປະສອງຝ່າຍຄັ້ງນີ້ເພື່ອເປັນການສືບຕໍ່ຜັນຂະຫຍາຍ ແລະ ຍົກລະດັບການຮ່ວມມື ລະຫວ່າງ ສອງປະເທດ ກໍຄືສອງອົງການນິຕິບັນຍັດ ລາວ-ສ.ເກົາຫລີ ໃຫ້ມີຄຸນນະພາບໃໝ່, ຮັບໃຊ້ຜົນປະໂຫຍດຂອງປະຊາຊົນສອງປະເທດໃຫ້ນັບມື້ນັບຫລາຍຂຶ້ນ. ພ້ອມນີ້ທັງສອງຝ່າຍຍັງໄດ້ສະເໜີບາງທິດທາງການຮ່ວມມືໃນຕໍ່ ໜ້າຕາມເນື້ອໃນຈິດໃຈທີ່ສອງປະທານສະພາແຫ່ງຊາດ ລາວ ແລະ ສ.ເກົາຫລີ ໃຫ້ເຫັນດີນຳກັນສືບຕໍ່ແລກປ່ຽນການຢ້ຽມຢາມຖອດຖອນບົດຮຽນເຊິ່ງກັນ ແລະ ກັນ ໃນລະດັບຕ່າງໆຂອງສະພາແຫ່ງຊາດ, ຊຸກຍູ້ການຈັດຕັ້ງປະຕິບັດບົດບັນທຶກຊ່ວຍຈຳລະຫວ່າງສູນຄົ້ນຄ້ວາ ແລະ ສະໜອງຂໍ້ມູນຂອງສະພາແຫ່ງຊາດ ສ.ເກົາຫລີ ແລະ ສູນຝຶກອົບຮົມຂອງຫ້ອງວ່າການສະພາແຫ່ງຊາດແຫ່ງ ສປປ ລາວ ໃຫ້ເກີດດອກອອກຜົນຕາມກອບເນື້ອໃນທີ່ສອງຝ່າຍໄດ້ລົງນາມຮ່ວມ ກັນໃນວັນທີ 7 ທັນວາ 2010 ໂດຍສະເພາະແມ່ນຊ່ວຍຊຸກຍູ້ໃຫ້ມີການແລກປ່ຽນຂໍ້ມູນ-ຂ່າວ ສານດ້ານກົດໝາຍ, ການຮ່ວມມືລະຫວ່າງສະຖາບັນຄົ້ນຄວ້າວິທະຍາສາດ-ສັງຄົມ ສ.ເກົາຫລີ ກັບສູນອົບຮົມຂອງສະພາແຫ່ງຊາດລາວ ຫລື ຮ່ວມກັນຈັດກອງປະຊຸມສຳມະນາດ້ານວິຊາການ ພາຍໃຕ້ຫົວຂໍ້ໃດໜຶ່ງທີ່ສອງຝ່າຍມີຄວາມສົນໃຈ ແລະ ເປັນປະໂຫຍດຮ່ວມກັນ, ສືບຕໍ່ຊຸກຍູ້ບັນດານັກລົງ ທຶນຕາມຂະແໜງການທີ່ທັງສອງຝ່າຍມີທ່າແຮງ ແລະ ທັງສອງສະພາແຫ່ງຊາດຂອງສອງປະເທດ ສືບຕໍ່ຮ່ວມມືກັນໃນເວທີພາກພື້ນ ແລະ ສາກົນໂດຍສະເພາະໃນກອບການຮ່ວມມືອາຊຽນ, ອົງການສະມັດຊາລັດຖະສະພາລະຫວ່າງຊາດອາຊຽນ, ກອບການຮ່ວມມືໃນອົງການສະຫະປະຊາຊາດ, ສະ ຫະພັນລັດຖະສະພາສາກົນ IPU ແລະ ອື່ນໆ.ເພື່ອນຳເອົາຜົນປະໂຫຍດຕົວຈິງມາສູ່ປະຊາຊົນສອງຊາດ.
ທີ່ມາ http://www.kpl.net.la/lao/news/dnl%201.htm