ສຳນັກຂ່າວຕ່າງປະເທດ ລາຍງານວ່າ ໃນວັນທີ 16 ທັນວາຜ່ານມານີ້ ອົງການອຸຍນີເຊບ ຫລື UNICEF ໄດ້ອອກມາລະບຸວ່າ ໃນແຕ່ລະມື້ ມີເດັກນ້ອຍປະມານ 500 ຄົນ ຕ້ອງເສຍຊີວິດ ໃນບັນດາປະເທດອາຟຣິກາ ທີ່ຢູ່ພາກໃຕ້ຂອງທະເລຊາຍຊາຮາລາ ເນື່ອງຈາກການຂາດແຄນນ້ຳສະອາດ ແລະ ສຸຂະອະນາໄມທີ່ດີ ພ້ອມທັງລະບຸວ່າ ກຸ່ມປະເທດເຫລົ່ານີ້ ຊຶ່ງກະຈາຍຢູ່ທາງພາກຕາເວັນຕົກ ແລະ ພາກກາງຂອງທະວີບອາຟຣິກາ ຈຳເປັນຈະຕ້ອງໄດ້ຮັບເງິນຊ່ວຍເຫລືອ ປະມານ 30 ຕື້ໂດລາຕໍ່ປີ ເພື່ອແກ້ໄຂບັນຫາດັ່ງກ່າວ ຢ່າງເປັນລະບົບ.
ທ່ານ ມານູເອວ ຟົງແຕັງ ຜູ່ອຳນວຍການ ອົງການອຸຍນີເຊບ ປະຈຳພາກພື້ນອາຟຣິກາຕາເວັນຕົກ ແລະ ອາຟຣິກາກາງ ໄດ້ກ່າວວ່າ ບັນຫານີ້ ຈະຕ້ອງໄດ້ຮັບການແກ້ໄຂຢ່າງຮີບດ່ວນ ແລະ ຈຳເປັນຕ້ອງອາໄສການຮ່ວມມື ຈາກທຸກພາກສ່ວນທີ່ກ່ຽວຂ້ອງ ເພື່ອເຮັດໃຫ້ປະເທດເຫລົ່ານີ້ ໄດ້ເຂົ້າເຖິງລະບົບສຸຂະອະນາໄມ ທີ່ເປັນມາດຕະຖານສາກົນ ແລະ ໄດ້ເຂົ້າເຖິງນ້ຳສະອາດຢ່າງທົ່ວເຖິງ ພາຍໃນປີ 2030 ຕາມເປົ້າໝາຍ ດ້ານການພັດທະນາແບບຍືນຍົງ ຂອງອົງການສະຫະປະຊາຊາດ.