ໂດຍໄດ້ຮັບການສະໜັບສະໜູນຈາກໂຄງການຊ່ວຍເຫຼືອວຽກງານອາຊຽນ ໄລຍະ 3 ຂອງອົງການສະຫະປະຊາຊາດ ເພື່ອການພັດທະນາ ກົມອາຊຽນ ກະຊວງການຕ່າງປະເທດ ຈຶ່ງໄດ້ຈັດກອງປະຊຸມສະຫຼຸບການເຄື່ອນໄຫວວຽກງານອາຊຽນຂອງ ສປປ ລາວ ປະຈຳປີ 2013 ໄດ້ມີຂຶ້ນວັນທີ 13 ມັງກອນ 2014 ຢູ່ສູນຮ່ວມມືສາກົນ ແລະ ການເຝິກອົບຮົມ (ICTC) ໂດຍເປັນປະທານຂອງທ່ານ ອາລຸນແກ້ວ ກິດຕິຄຸນ ລັດຖະມົນຕີຊ່ວຍວ່າການ ກະຊວງການຕ່າງປະເທດ ຫົວໜ້າເຈົ້າໜ້າທີ່ອາວຸໂສອາຊຽນຂອງ ສປປ ລາວ ມີບັນດາຜູ້ຮັບຜິດຊອບຈຸດປະສານງານອາຊຽນ ຈາກຂະແໜງການຕ່າງໆ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ຈຸດປະສົງຂອງກອງປະຊຸມຄັ້ງນີ້ ເພື່ອຕີລາຄາຄືນຜົນສຳເລັດ ຂໍ້ຄົງຄ້າງ ສິ່ງທ້າທາຍໃນການຈັດຕັ້ງປະຕິບັດບັນດາກິດຈະກຳ ແລະ ມາດຕະການໃນໜຶ່ງປີຜ່ານມາ ພາຍໃຕ້ແຜນແມ່ບົດ 3 ເສົາຄ້ຳຄື: ປະຊາຄົມການເມືອງ-ຄວາມໝັ້ນຄົງອາຊຽນ ປະຊາຄົມເສດຖະກິດອາຊຽນ ແລະ ປະຊາຄົມວັດທະນະທຳສັງຄົມອາຊຽນ ນອກນີ້ກອງປະຊຸມຍັງໄດ້ຮັບຊາບ ສະພາບການຂອງພາກພື້ນ ແລະ ສາກົນທີ່ພົ້ນເດັ່ນໃນປັດຈຸບັນ ພ້ອມທັງໄດ້ແລກປ່ຽນຖອດຖອນບົດຮຽນເຊິ່ງກັນ ແລະ ກັນ ເພື່ອປັບປຸງຂອດປະສານງານ ແລະ ກະກຽມຄວາມພ້ອມໃນແຕ່ລະດ້ານ ເປັນຕົ້ນ ດ້ານບຸກຄະລາກອນ ນິຕິກຳ ໂຄງລ່າງພື້ນຖານ ຜະລິດຕະພັນ ແລະ ບັນຫາອື່ນໆທີ່ກ່ຽວຂ້ອງ ເພື່ອກຽມພ້ອມເຂົ້າເປັນປະຊາຄົມອາຊຽນ ໂດຍສະເພາະ ການເຂົ້າຮ່ວມປະຊາຄົມເສດຖະກິດອາຊຽນ ໃນປີ 2015 ແລະ ການກະກຽມເປັນປະທານອາຊຽນຂອງ ສປປ ລາວ ໃນປີ 2016.
ໄລຍະ 1 ປີຜ່ານມາ ສປປ ລາວ ໄດ້ປະກອບສ່ວນຢ່າງຫ້າວຫັນ ໃນການຈັດຕັ້ງປະຕິບັດພັນທະຂອງຕົນຢ່າງມີຄວາມຮັບຜິດຊອບສູງ ເປັນຕົ້ນ ໄດ້ເປັນເຈົ້າພາບຈັດກອງປະຊຸມລັດຖະມົນຕີອາຊຽນ ວ່າດ້ວຍການຕ້ານອາດຊະຍາກຳຂ້າມຊາດ ຄັ້ງທີ 9 ກອງປະຊຸມຜູ້ບັນຊາການທະຫານອາກາດສູງສຸດ ຄັ້ງທີ 10 ກອງປະຊຸມເຈົ້າໜ້າທີ່ອາວຸໂສ ວ່າດ້ວຍກົດໝາຍອາຊຽນ ຄັ້ງທີ 15 ກອງປະຊຸມອົງການຕ້ານການສໍ້ລາດບັງຫຼວງ ຂົງເຂດອາຊີຕາເວັນອອກສຽງໃຕ້ ຄັ້ງທີ 9 ກອງປະຊຸມລັດຖະມົນຕີຂົນສົ່ງອາຊຽນ ຄັ້ງທີ 19 ແລະ ກອງປະຊຸມເຈົ້າໜ້າທີ່ອາວຸໂສຂົນສົ່ງອາຊຽນ ຄັ້ງທີ 36 ກອງປະຊຸມລັດຖະມົນຕີປ່າໄມ້ອາຊຽນ ຄັ້ງທີ 35 ກອງປະຊຸມລັດຖະມົນຕີທ່ອງທ່ຽວອາຊຽນ ຄັ້ງທີ 12 ແລະ ກອງປະຊຸມລັດຖະມົນຕີກີລາອາຊຽນ ຄັ້ງທີ 2.
ທີ່ມາ http://www.vientianemai.net/teen/khao/1/10974