ສະມາຊິກສະພາແຫ່ງຊາດ ໄດ້ເຫັນດີຮັບຮອງເອົາກົດໝາຍວ່າດ້ວຍງົບປະມາແຫ່ງລັດສະບັບປັບປຸງຢ່າງເປັນເອກກະສັນ ໃນເຊົ້າວັນທີ 16 ທັນວານີ້, ເຊິ່ງເປັນມື້ທີ 8 ຂອງການດຳເນີນກອງປະຊຸມສະໄໝສາມັນເທື່ອທີ 10 ຂອງສະພາແຫ່ງຊາດຊຸດທີ VII. ທ່ານ ລຽນ ທິແກ້ວ ລັດຖະມົນຕີວ່າການກະຊວງການເງິນ ໄດ້ສະເໜີກ່ຽວກັບການປັບປຸງຮ່າງກົດໝາຍວ່າດ້ວຍງົບປະມານແຫ່ງລັດວ່າ:ກົດໝາຍດັ່ງກ່າວ ເປັນເຄື່ອງມືທີ່ສຳຄັນໃນການຄຸ້ມຄອງວຽກງານການເງິນ-ງົບປະມານໃຫ້ເຂົ້າສູ່ລະບຽບກົດໝາຍ, ສາມາດລວມສູນລາຍຮັບ-ລາຍຈ່າຍງົບປະມານ, ສາມາດລະດົມແຫລ່ງລາຍຮັບເຂົ້າງົບປະມານເພີ່ມຂຶ້ນຢ່າງຕໍ່ເນື່ອງ ແລະ ເກີນແຜນໃນບາງປີ, ພ້ອມທັງສາມາດສະໜອງດ້ານທຶນຮອນ
ໃຫ້ແກ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໃນແຕ່ລະໄລຍະໄດ້ໂດຍພື້ນຖານ, ສາມາດຄຸ້ມຄອງລາຍຈ່າຍງົບປະມານໃຫ້ໄປຕາມແຜນທີ່ສະພາແຫ່ງຊາດຮັບຮອງ, ຮັກສາວິໄນການເງິນຢ່າງເຂັ້ມງວດ, ຄຸ້ມຄອງງົບປະມານແຫ່ງລັດໃຫ້ມີຄວາມຖືກຕ້ອງ, ຄົບຖ້ວນ, ໂປ່ງໃສ, ເປີດເຜີຍ ແລະ ສາມາດກວດສອບໄດ້ ຈຶ່ງມີຄວາມຈຳເປັນທີ່ຈະຕ້ອງໄດ້ມີການປັບປຸງກົດໝາຍສະບັບນີ້ ເພື່ອໃຫ້ເນື້ອໃນຂອງກົດໝາຍດັ່ງກ່າວສອດຄ່ອງກັບນະໂຍບາຍຂອງພັກ-ລັດຖະບານ ໃນແຕ່ລະໄລຍະ ແລະ ສອດຄ່ອງກັບມາດຕະຖານສາກົນໃນການຄຸ້ມຄອງງົບປະມານ ແລະ ການເງິນແຫ່ງລັດ, ໂດຍລວມແລ້ວ ໄດ້ມີການປັບປຸງທາງດ້ານໂຄງສ້າງ, ເນື້ອໃນຕົ້ນຕໍຂອງກົດໝາຍ, ກົດໝາຍສະບັບເກົ່າປະກອບມີ 8 ພາກ, 14 ໝວດ ແລະ 91 ມາດຕາ ສ່ວນສະບັບປັບປຸງໃໝ່ ປະກອບມີ 10 ພາກ, 15 ໝວດ ແລະ 98ມາດຕາ ໃນນີ້ ໄດ້ເພີ່ມເຂົ້າໃໝ່ 2 ພາກ, 1 ໝວດ ແລະ 12 ມາດຕາ ແລະ ໄດ້ປັບປຸງໃໝ່ 49 ມາດຕາ.
ທ່ານລັດຖະມົນຕີ ກ່າວວ່າ: ເມື່ອກົດໝາຍສະບັບໃໝ່ ຖືກຮັບຮອງຈາກສະພາແຫ່ງຊາດ ການຄຸ້ມຄອງງົບປະມານຂອງລັດ ຈະມີຄວາມຈະແຈ້ງ, ໂປ່ງໃສ, ສອດຄ່ອງກັບບັນດານິຕິກຳທີ່ມີການປັບປຸງ, ຮັບປະກັນການຈັດຕັ້ງປະຕິບັດລັດຖະທຳມະນູນ, ກົດໝາຍ, ແຜນພັດທະນາເສດຖະກິດ-ສັງຄົມ, ປະສິດທິຜົນສູງ ແລະ ສາມາດປົກປ້ອງສິດຜົນປະໂຫຍດຂອງລັດ, ລວມໝູ່ ແລະ ຜົນປະໂຫຍດອັນຊອບທຳຂອງປະຊາຊົນ ເຮັດໃຫ້ລາຍຮັບ ເຂົ້າງົບປະມານແຫ່ງລັດຢ່າງລວມສູນ ແລະ ຈຳກັດລາຍຈ່າຍນອກແຜນໄດ້ອີກດ້ວຍ.
ໃນຕອນບ່າຍຂອງວັນດຽວກັນ ທ່ານລັດຖະມົນຕີວ່າການກະຊວງການເງິນຍັງໄດ້ຂຶ້ນສະເໜີກ່ຽວກັບການປັບປຸງກົດໝາຍວ່າດ້ວຍສ່ວຍສາອາກອນ ສະບັບປັບປຸງ ຕໍ່ສະພາແຫ່ງຊາດຢ່າງກົງໄປກົງມາ, ຊຶ່ງກົດໝາຍດັ່ງກ່າວ ປະກອບມີ: 1 ພາກ ແລະ 64 ມາດຕາ ແລະ ໃນຂະນະດຽວກັນ ທ່ານປະທານກອງປະຊຸມ ໄດ້ມີບາງຄຳຖາມເຈາະຈີ້ມຕໍ່ກົດໝາຍສະບັບດ່ັງກ່າວ ເພື່ອເປັນບ່ອນອີງໃຫ້ບັນດາສະມາຊິກສະພາແຫ່ງຊາດໄດ້ມີການຄົ້ນຄວ້າປະກອບຄຳເຫັນໃສ່ຮ່າງກົດໝາຍສະບັບດ່ັງກ່າວ ໃຫ້ມີຄວາມໜັກແໜ້ນ ແລະ ສົມບູນຂຶ້ນກວ່າເກົ່າ ແລະ ໃນຕອນທ້າຍກໍໄດ້ເຫັນດີຮັບຮອງເອົາກົດໝາຍວ່າດ້ວຍສ່ວຍສາອາກອນ ສະບັບປັບປຸງ ຫລາຍກວ່າ 90% ຂອງຜູ້ແທນທັງໝົດ.
ແຫ່ລງຂ່າວ
