ອີງຕາມຂໍ້ມູນຈາກທະນາຄານຮ່ວມພັດທະນາ ໄດ້ແຈ້ງໃຫ້ຮູ້ວ່າ: ນັບແຕ່ວັນທີ 14 ເດືອນພະຈິກ 2015 ເຈົ້າໜ້າທີ່ທະນາຄານ ແລະ ເຈົ້າໜ້າທີ່ຕຳຫຼວດ ໄດ້ຈັບຄາໜັງຄາເຂົາພວກຄົນບໍ່ດີ ເຂົ້າມາເຄື່ອນໄຫວກໍ່ອາຊະຍາກຳທາງດ້ານລະບົບທະນາຄານຢູ່ ສປປ ລາວ ໂດຍສະເພາະ ຢູ່ນະຄອນຫຼວງວຽງຈັນ ເຊິ່ງພວກຄົນບໍ່ດີດັ່ງກ່າວ ໄດ້ລັກລອບຂໍ້ມູນບັດຕ່າງປະເທດ ແລ້ວເຮັດບັດປອມ ເພື່ອມາກົດເອົາເງິນສົດຢູ່ບັນດາຕູ້ ATM ຕ່າງໆໃນນະຄອນຫຼວງວຽງຈັນ ແລະ ແຂວງອື່ນໆ ແຕ່ເຖິງຢ່າງໃດກໍ່ຕາມ ເຈົ້າໜ້າທີ່ທະນາຄານເຫັນຄວາມຜິດປົກກະຕິຂອງຄົນບໍ່ດີດັ່ງກ່າວ ຜ່ານລະບົບປ້ອງກັນຄວາມປອດໄພຂອງຕູ້ ATM ແລະ ລະບົບໄອທີ ທີ່ມີລະບົບເຕືອນໄພສູງ ຈຶ່ງໄດ້ຮ່ວມມືກັບເຈົ້າໜ້າທີ່ຕຳຫຼວດ ຕິດຕາມເພື່ອຈັບກຸມພວກຄົນບໍ່ດີໄດ້ 2 ຄົນ 1 ໃນນັ້ນມີທ້າວ ບ໋ອກດ່ານ ຕາລາລຸນກາ ອາຍຸ 37 ປີ ສັນຊາດຣູມານີ ຖືກຈັບໃນວັນທີ 5 ທັນວາ 2015.
ປັດຈຸບັນ ເຈົ້າໜ້າທີ່ກ່ຽວຂ້ອງກຳລັງດຳເນີນການສືບສວນ-ສອບສວນຄະດີ ໄປຕາມຂັ້ນຕອນກົດໝາຍຂອງ ສປປ ລາວ ນອກຈາກບັດປອມແລ້ວ ພວກຄົນບໍ່ດີຈຳນວນໜຶ່ງ ກໍ່ຊອກໂອກາດສອດຊິບເຂົ້າໃນຕູ້ ATM ຢູ່ລາວ ເພື່ອລັກລອບຂໍ້ມູນລູກຄ້າ ເພື່ອຈະໄປເຮັດບັດປອມອີກ ດັ່ງນັ້ນ ຂໍໃຫ້ທະນາຄານ ພໍ່ແມ່ປະຊາຊົນ ແລະ ຜູ້ຊົມໃຊ້ຕູ້ ATM ຈົ່ງມີສະຕິລະວັງຕົວສູງ ຖ້າເຫັນຕູ້ ATM ຜິດປົກກະຕິ ກະລຸນາແຈ້ງໃຫ້ເຈົ້າໜ້າທີ່ຊາບດ່ວນ.
ແຫລ່ງຂ່າວ:
