ເພື່ອເປັນການຮັກສາ ແລະ ສືບສານວັດທະນະທຳຮີດຄອງປະເພນີອັນດີງານຂອງປະຊາຊົນລາວບັນດາເຜົ່າ ທີ່ສືບທອດກັນມາແຕ່ດົນນານ ໃຫ້ຄົງຢູ່ໄວ້ກັບປະຊາຊົນລາວຕະຫຼອດໄປ ໃນທ້າຍອາທິດຜ່ານມາ ເມືອງໄຊທານີ ນະຄອນຫຼວງວຽງຈັນ ໄດ້ຈັດງານສະຫຼອງບຸນປີໃໝ່ຂອງຊົນເຜົ່າມົ້ງ (ບຸນປະເພນີກິນຈຽງ) ປະຈຳປີ 2015 ຂຶ້ນທີ່ບ້ານສົມສະໄໝ ໂດຍເປັນກຽດເຂົ້າຮ່ວມຂອງທ່ານ ສາຍທອງ ແກ້ວດວງດີ ຮອງເຈົ້າຄອງນະຄອນຫຼວງວຽງຈັນ ທ່ານ ບຸນທ່ຽງ ຂຸນສີ ປະທານແນວລາວສ້າງຊາດ ນວ ທ່ານ ຈັນທະລາ ອິນທະລັງສີ ເຈົ້າເມືອງໄຊທານີ ມີບັນດາການນຳຂັ້ນສູນກາງ ຂັ້ນນະຄອນຫຼວງ ອົງການຈັດຕັ້ງມະຫາຊົນ ພ້ອມດ້ວຍອຳນາດການປົກຄອງບ້ານ ແລະ ພໍ່ແມ່ປະຊາຊົນອ້ອມຂ້າງ ເຂົ້າຮ່ວມ.
ທ່ານ ຮົວເຮີ ນາຍບ້ານສົມສະໄໝ ໄດ້ກ່າວວ່າ: ງານບຸນປະເພນີກິນຈຽງຊົນເຜົ່າມົ້ງ ແມ່ນງານບຸນປະເພນີໜຶ່ງທີ່ຈັດຂຶ້ນໃນຕົ້ນເດືອນ 12 ລະຫວ່າງວັນທີ 11-13 ຂອງທຸກໆປີ ພາຍຫຼັງທີ່ສຳເລັດການເກັບກ່ຽວຜົນຜະລິດ ຈຸດປະສົງແມ່ນເພື່ອເປັນການຮັກສາວັດທະນະທຳຮີດຄອງປະເພນີອັນດີງາມ ແລະ ການເຊື່ອຖືທີ່ສືບທອດກັນມາແຕ່ບັນພະບຸລຸດ ເຊັ່ນ: ພິທີບູຊາເສັ່ນໄຫວ້ ການຜູກຂໍ້ຕໍ່ແຂນ ແລະ ອື່ນໆ ນອກນັ້ນ ພາຍໃນງານຍັງມີການຄົບງັນ ແລະ ສະແດງກິດຈະກຳຕາມຮີດຄອງປະເພນີຫຼາຍຢ່າງ ເປັນຕົ້ນ: ກິດຈະກຳງົວຊົນງົວ ຂັບລຳ ເປົ່າແຄນ ການສະແດງບົດຟ້ອນ ແລະ ໂຍນໝາກຄອນ ທີ່ສະແດງໃຫ້ເຫັນສິລະປະວັດທະນະທຳ ຮີດຄອງປະເພນີ ແລະ ການເຊື່ອຖືຂອງຊົນເຜົ່າ ຄວາມສາມັກຄີຮັກແພງຊ່ວຍເຫຼືອເຊິ່ງກັນ ແລະ ກັນ ໃຫ້ສະໜິດສະໜົມ ອອກແຮງແຂ່ງຂັນສ້າງຜົນງານ ເພື່ອປະກອບສ່ວນເຂົ້າໃນການສ້າງສາພັດທະນາປະເທດຊາດ ໃຫ້ມີຄວາມຈະເລີນຮຸ່ງເຮືອງ.
ແຫລ່ງຂ່າວ:
