ການດຳເນີນກອງປະຊຸມສະໄໝສາມັນເທື່ອທີ 10 ຂອງ ສະພາແຫ່ງຊາດ ຊຸດທີ VII ມາເຖິງວັນທີ 15 ທັນວາ 2015 ເຊິ່ງເປັນມື້ທີ 7 ຂອງການດຳເນີນກອງປະຊຸມ ໂດຍການເປັນປະທານຂອງທ່ານ ສົມພັນ ແພງຄຳມີ ພ້ອມດ້ວຍ ທ່ານ ດຣ. ໄຊສົມພອນ ພົມວິຫານ ຮອງປະທານສະພາແຫ່ງຊາດ ບັນດາຄະນະອະນຸກຳມະການ ແລະ ສະມາຊິກສະພາແຫ່ງຊາດ ຊຸດທີ VII ຈາກ 17 ເຂດເລືອກຕັ້ງເຂົ້າຮ່ວມ.
ໃນພາກເຊົ້າພາຍຫຼັງທີ່ທ່ານ ສອນໄຊ ສີພັນດອນ ລັດຖະມົນຕີຫົວໜ້າຫ້ອງວ່າການລັດຖະບານ ໄດ້ຂຶ້ນຜ່ານ ຮ່າງກົດໝາຍ ວ່າດ້ວຍລັດຖະບານ (ສະບັບປັບປຸງ) ເຊິ່ງໄດ້ຖືກຮັບຮອງໃນປີ 2003 ປະກອບມີ 8 ໝວດ 38 ມາດຕາ ສ່ວນກົດໝາຍວ່າດ້ວຍສະບັບປັບປຸງ ມີ 8 ໝວດ 36 ມາດຕາ ໃນນັ້ນ ໄດ້ໂຮມເນື້ອໃນຂອງ 9 ມາດຕາ ໃນສະບັບ 2003 ເຂົ້າເປັນ 4 ມາດຕາ ໃນສະບັບປັບປຸງ ແລະ ເພີ່ມເຂົ້າໃໝ່ 3 ມາດຕາ ໃນຈຳນວນ 36 ມາດຕາ ໄດ້ມີການປັບປຸງ 31 ມາດຕາ ໃນການປັບປຸງແກ້ໄຂບາງເນື້ອໃນ ຂໍ້ຄວາມໃນບັນດາມາດຕາຕ່າງໆໃຫ້ຮັດກຸມ ຖືກຕ້ອງສອດຄ່ອງກັບສະພາບຄວາມເປັນຈິງຂອງຍຸກສະໄໝ ໃນການປະຕິບັດໜ້າທີ່ວຽກງານ ເຊິ່ງຜ່ານການຄົ້ນຄວ້າ ປະກອບຄຳຄິດຄຳເຫັນຂອງບັນດາຄະນະຜູ້ແທນທີ່ເຂົ້າຮ່ວມກອງປະຊຸມ ໄດ້ເປັນເອກະສັນຕົກລົງເຫັນດີຮັບຮອງເອົາກົດໝາຍສະບັບປັບປຸງດັ່ງກ່າວ.
ສ່ວນໃນກອງປະຊຸມພາກບ່າຍ ໂດຍພາຍໃຕ້ການເປັນປະທານຂອງທ່ານ ດຣ. ໄຊສົມພອນ ພົມວິຫານ ຮອງປະທານສະພາແຫ່ງຊາດ ໄດ້ມີການສືບຕໍ່ນຳສະເໜີຮ່າງກົດໝາຍວ່າດ້ວຍການລົງທຶນຂອງລັດສະບັບ ປັບປຸງ ໂດຍທ່ານ ສົມດີ ດວງດີ ລັດຖະມົນຕີວ່າການ ກະຊວງແຜນການ ແລະ ການລົງທຶນ ເຊິ່ງກົດໝາຍວ່າ ດ້ວຍການລົງທຶນຂອງລັດສະບັບເລກທີ 08/ສພຊ ລົງວັນທີ 26 ພະຈິກ 2009 ປະກອບດ້ວຍ 7 ພາກ 9 ໝວດ ແລະ 90 ມາດຕາ ສຳລັບຮ່າງກົດໝາຍວ່າດ້ວຍການລົງທຶນຂອງລັດ ສະບັບປັບປຸງ ປະກອບມີ 7 ພາກ 9 ໝວດ 98 ມາດຕາ ໂດຍຮັກສາໂຄງປະກອບຂອງກົດໝາຍໄວ້ຄືເກົ່າ ໄດ້ປັບປຸງ 42 ມາດຕາ ແລະ ເພີ່ມໃໝ່ 8 ມາດຕາ ຂອງກົດໝາຍສະບັບປັບປຸງ ຈາກນັ້ນ ບັນດາຄະນະຜູ້ແທນ ຕ່າງກໍ່ໄດ້ຍົກຫຼາຍມາດຕາຂຶ້ນມາຄົ້ນຄວ້າປຶກສາຫາລືກັນໃນທີ່ປະຊຸມ ເຊິ່ງບັນຍາກາດໂດຍລວມເຫັນວ່າ ແຕ່ລະທ່ານໄດ້ໃຫ້ຄວາມສົນໃຈເປັນພິເສດ ເພາະມັນເປັນບັນຫາແຫຼ່ງລາຍຮັບຂອງປະເທດກ່ຽວຂ້ອງ ເຖິງສິດຜົນປະໂຫຍດອັນຊອບທຳຂອງພໍ່ແມ່ປະຊາຊົນໂດຍກົງ ຜ່ານການປຶກສາຫາລື ປະກອບຄຳຄິດຄຳເຫັນ ຢ່າງກົງໄປກົງມາ ທີ່ປະຊຸມໄດ້ຕົກລົງເຫັນດີເປັນເອກະສັນກັນ ດ້ວຍຄະແນນສຽງ ສ່ວນຫຼາຍຮັບຮອງເອົາກົດໝາຍສະບັບປັບປຸງດັ່ງກ່າວ.
ແຫລ່ງຂ່າວ:
