ຂປລ. ສປປ ລາວ ໄດ້ຮັບກຽດເປັນເຈົ້າພາບຈັດສໍາມະນາ ກ່ຽວກັບການປົກປັກຮັກສາ ໜັງສືໃບລານ ໃນປະເທດອາຊຽນເພື່ອເພີ່ມຄວາມຮູ້ ແລະ ແລກປ່ຽນບົດຮຽນ,ປະສົບການເຊິ່ງກັນ ແລະ ກັນ ໃນການປົກປັກຮັກສາໜັງສືໃບລານ ເຊິ່ງເປັນໜັງສື ເກົ່າແກ່ທີ່ຫາຍາກ ເປັນມໍລະດົກທາງດ້ານ ວັດທະນະທໍາ ໃຫ້ຄົງຢູ່ຕະຫລອດ
ທ່ານ ບົວເງິນ ຊາພູວົງ ລັດຖະມົນຕີຊ່ວຍວ່າການກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວໄດ້ມີຄໍາເຫັນ ໃນຊຸດສຳມະນາທີ່ຈັດຂຶ້ນໃນວັນທີ 15 ທັນວາ ນີ້ວ່າ:ໜັງສືໃບລານເປັນເອກະສານທີ່ ບັນຈຸຂໍ້ມູນຕ່າງໆ ທັງຝ່າຍໂລກ ແລະ ຝ່າຍທໍາ ເຊິ່ງເປັນພູມປັນຍາຂອງ ບັນພະບູລຸດໄດ້ຂຽນ (ຈານ) ລົງໃນໃບລານດ້ວຍອັກສອນທໍາລາວ, ຂອມ, ລື້, ລ້ານນາ, ໄທດໍາ ແລະ ເປັນພາສາບາລີ, ສັນສະກິດ, ລາວ, ບາລີ/ລາວ, ບາລີ/ລື້, ບາລີ/ລ້ານນາ. ໜັງສືໃບລານລາວລວມ ມີເນື້ອໃນຫລາຍທີ່ຈານລົງໄວ້ ໃນໃບລານເຊັ່ນ: ພະວິໄນ, ພະສູດ, ພະອະພິທໍາ, ຄໍາພີພາສາບາລີ, ບົດສູດມົນ, ຕໍານານເມືອງ, ກົດໝາຍ, ໂອວາດຄໍາສອນ, ປະເພນີ/ວິທີກໍາ, ທໍາມະທົ່ວໄປ, ນິຍາມທໍາມະ, ຕໍານານພຸດທະສາສະໜາ ແລະ ອື່ນໆ; ໜັງສືໃບລານເປັນວັດທະນະທໍາ ຄວາມເຊື່ອຖືທາງສາສະໜາພຸດ ທີ່ຈາລຶກໄວ້ໃນເອກະສານບູຮານ, ໄດ້ກໍານົດຮູບແບບ ແນວຄວາມຄິດທີ່ເນັ້ນໜັກຄຸນຄ່າ ແຫ່ງສະຕິປັນຍາ, ສິລະປະ ບັນເທິງ, ວັດທະນະທໍາ, ຄວາມຮູ້ຮອບຕົວ, ສ້າງຄວາມສາມັກຄີຖານພີ່ນ້ອງ, ຊ່ວຍເຫລືອເຊິ່ງກັນ ແລະ ກັນຂອງທຸກຊັ້ນຄົນ ໃນສັງຄົມ ໃຫ້ມີຄວາມ ເມດຕາກະລຸນາ ຕໍ່ເພື່ອມະນຸດດ້ວຍກັນ ຈາກໜັງສືໃບລານທີ່ຮຽນອ່ານ, ເທດໃນວັດກາຍມາເປັນຄວາມເຊື່ອ ໂດຍການນຳມາປະຕິບັດຂອງ ອອກຕົນ ຍາດໂຍມ ໃນຊີວິດປະຈໍາວັນ ແລະ ຮີດຄອງປະເພນີພິທີກໍາຕ່າງໆ.
ທ່ານ ບົວເງິນ ຊາພູວົງ ຍັງມີຄໍາເຫັນຕື່ມອີກວ່າ: ໜັງສືໃບລານ ແມ່ນວັດທະນະທໍາທີ່ໄດ້ຢັ່ງຮາກເລິກຢູ່ໃນ ຄວາມຜູກພັນຂອງຊາວລາວ ແບບຍືນຍົງ ເປັນເວລາຫລາຍສະຕະວັດມາແລ້ວ ສ່ວນຫລາຍຈະແມ່ນຜູ້ຊາຍ ທີ່ໄດ້ບວດ ຮຽນ, ຂຽນ, ອ່ານ ສະເພາະແມ່ຍິງ ແລະ ເດັກນ້ອຍເຖິງແມ່ນ ວ່າໃນສະໄໝກ່ອນບໍ່ໄດ້ຮຽນ, ຂຽນ, ອ່ານ ໜັງສືທໍາ, ໜັງສືລາວ ແຕ່ໄດ້ປະຕິບັດຄໍາສອນທາງທໍາ, ທາງໂລກ ທີ່ພະສົງເທດສູ່ຟັງຢ່າງເຄັ່ງຄັດ.
ແຫລ່ງຂ່າວ:
