ສຳນັກຂ່າວຕ່າງປະເທດ ລາຍງານໃນວັນທີ 14 ທັນວາ ຜ່ານມານີ້ວ່າ ກະຊວງສາທາລະນະສຸກກຳປູເຈຍ ໄດ້ອອກມາເປີດເຜີຍມື້ວານນີ້ (13 ທັນວາ) ວ່າ ໃນໄລຍະຜ່ານມາ ພົບປະຊາຊົນ ເສຍຊີວິດແລ້ວຢ່າງໜ້ອຍ 19 ຄົນ ແລະ ລົ້ມປ່ວຍນອນໂຮງໝໍ ອີກກ່ວາ 172 ຄົນ ຈາກການດື່ມເຫລົ້າໂທທີ່ເປັນພິດ ໃນພື້ນທີ່ແຂວງກຣະແຈະ ຊຶ່ງຜົນຂອງການກວດສອບ ໃນຫ້ອງທົດລອງຂອງແພດພົບວ່າ ການເສຍຊີວິດ ແມ່ນມີສາເຫດມາຈາກ ສານເມທານອນ ສູງເຖິງ 12% ຊຶ່ງປົກກະຕິແລ້ວ ຈະຕ້ອງຢູ່ໃນລະດັບ 0.15%.

ປັດຈຸບັນ ເຈົ້າໜ້າທີ່ກຳປູເຈຍ ໄດ້ສັ່ງໃຫ້ບັນດາຜູ່ຜະລິດໃນທ້ອງຖິ່ນດັ່ງກ່າວ ແລະ ຜູ່ຂາຍເຫລົ້າໂທ ທຸກຄົນປິດກິດຈະການຊົ່ວຄາວ ເພື່ອທຳການສືບສວນ-ສອບສວນແລ້ວ.

ທັງນີ້ ທ່ານ ນຳ ບຸນເຮັງ ລັດຖະມົນຕີວ່າການ ກະຊວງສາທາລະນະສຸກ ໄດ້ກ່າວຖະແຫລງວ່າ ປະຊາຊົນຄວນຢຸດດື່ມເຫລົ້າໂທ ຫລື ເຫລົ້າສະໝຸນໄພ ທີ່ຜະລິດຂຶ້ນເອງ ໂດຍບໍ່ໄດ້ຮັບການກວດສອບຢ່າງຖືກຕ້ອງ ຫລື ໄດ້ຮັບການອະນຸຍາດຈາກທາງການ ໂດຍທັນທີ.