ຂປລ. ກອງປະຊຸມອາຊີວະສຶກສາຂອງປະເທດພາກພື້ນ ຄັ້ງທີ 3 ເປັນໂອກາດທີ່ດີໃຫ້ແກ່ ສປປ ລາວໃນການປັບປຸງຄຸນນະພາບຂອງການສຶກສາດ້ານອາຊີວະສຶກສາ ກໍຄື ການພັດທະນາຊັບພະຍາ ກອນມະນຸດໂດຍເລັ່ງໃສ່ການຮຽນ ແລະ ຕະຫລາດແຮງງານ ໂດຍເນັ້ນໃຊ້ສໍາລັບການພັດທະນາອາຊີວະສຶກສາ ໃນອາຊີຕາເວັນອອກສຽງໃຕ້ຄື: ການບໍລິຫານວຽກງານອາຊີວະສຶກສາ, ການຈັດການຮຽນ-ການສອນໃຫ້ແກ່ຜູ້ດ້ອຍໂອກາດ, ການຮ່ວມມືພາກລັດ-ເອກະຊົນ ແລະ ການພັດທະນາບຸກຄະລາກອນ.
ກອງປະຊຸມດັ່ງກ່າວໄດ້ຈັດຂຶ້ນລະຫວ່າງວັນທີ 14-15 ທັນວາ 2015 ນີ້ ທີ່ນະຄອນຫລວງວຽງຈັນ ໂດຍການເປັນປະທານກ່າວເປີດຂອງທ່ານ ພັນຄໍາ ວິພາວັນ ຮອງນາຍົກລັດຖະມົນຕີ, ລັດຖະມົນຕີວ່າການກະຊວງສຶກສາທິ ການ ແລະ ກິລາ, ມີທ່ານ ໂທມັດສ໌ ຊີນເບີຣອນ ເລຂາປະຈໍາສະພາ, ລັດຖະມົນຕີຊ່ວຍວ່າການກະຊວງຮ່ວມມືເສດຖະ ກິດ ແລະ ການພັດທະນາສະຫະພັນ ເຢຍລະມັນ, ມີບັນດາອົງການຈັດຕັ້ງສາກົນ, ພາກທຸລະກິດທັງພາຍໃນ ແລະ ຕ່າງ ປະເທດ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.
ທ່ານ ພັນຄໍາ ວິພາວັນ ກ່າວວ່າ: ກອງປະຊຸມຄັ້ງນີ້ມີຄວາມໝາຍສໍາຄັນຫລາຍສໍາລັບວຽກງານອາຊີວະສຶກສາຂອງ ສປປ ລາວ ໃນການປະກອບສ່ວນເຂົ້າໃນການປັບປຸງຄຸນນະພາບຂອງການສຶກສາດ້ານອາຊີວະສຶກສາ ກໍຄື ການ ພັດທະນາຊັບພະຍາກອນມະນຸດ. ດັ່ງທີ່ຮູ້ນໍາກັນແລ້ວວ່າປີ 2016 ສປປ ລາວ ຈະໄດ້ຮັບກຽດເປັນປະທານອາຊຽນ ຢ່າງເປັນທາງການອີກເທື່ອໜຶ່ງ ແລະ ກໍເປັນປີທີ່ປະຊາຄົມອາຊຽນ ໄດ້ສ້າງບາດກ້າວສໍາຄັນ ແລະ ໜັກແໜ້ນຂອງການເຊື່ອມໂຍງ ຄືການເຂົ້າສູ່ປະຊາຄົມເສດຖະກິດອາຊຽນ ການພັດທະນາຊັບພະຍາກອນມະນຸດຂອງບັນດາປະເທດອາຊຽນ ຖືວຽກງານດັ່ງກ່າວເປັນບຸລິມະສິດສໍາຄັນໃນການເຊື່ອມໂຍງ ເຮັດໃຫ້ຄວາມຕ້ອງການກໍາມະ ກອນທີ່ມີຄວາມຊໍາ ນານສູງໃນທຸກລະດັບ. ສິ່ງດັ່ງກ່າວແມ່ນຖືກຕ້ອງ ແລະ ສອດຄ່ອງກັບຄວາມຕ້ອງການຂອງ ສປປ ລາວ ໂດຍສະພາະ ໃນໄລຍະທີ່ຈະກ້າວເຂົ້າສູ່ການປະຕິບັດແຜນພັດທະນາເສດຖະກິດ-ສັງຄົມ 5 ປີຄັ້ງທີ VIII (2016-2020). ນອກ ຈາກນີ້ ຍັງເປັນການເປີດໂອກາດໃຫ້ຜູ້ເຂົ້າຮ່ວມກອງປະຊຸມ ໄດ້ແລກປ່ຽນປະສົບການ ແລະ ຄໍາຄິດເຫັນກ່ຽວກັບສະຖານະພາບຂອງວຽກງານອາຊີວະສຶກສາ ແລະ ການຝຶກອົບຮົມໃນພາກພື້ນ ແລະ ສາກົນ ໃຫ້ສາມາດກໍານົດບັນດາສິ່ງທ້າທາຍໃນອານາຄົດຂ້າງໜ້າ ແລະ ຂອງບັນດາປະເທດອາຊຽນ ໃນການສ້າງຄວາມກົມກຽວດ້ານການພັດທະນາວຽກງານດັ່ງກ່າວຮ່ວມກັນຫລັງປີ 2015.
ແຫ່ລງຂ່າວ
