ສຳນັກຂ່າວຕ່າງປະເທດ ລາຍງານໃນວັນທີ 14 ທັນວານີ້ວ່າ ໃນຕອນຄ່ຳມື້ນີ້ (14 ທັນວາ) ນັບແຕ່ເວລາ 21:00 ໂມງ ເປັນຕົ້ນໄປ ຕໍ່ເນື່ອງເຖິງວັນທີ 15 ທັນວາ ຈະມີປະກົດການ ຝົນດາວຕົກເຈມິນິສ ຊຶ່ງເປັນປະກົດການທີ່ເກີດຂຶ້ນ ເປັນປະຈຳໃນທຸກໆປີ ໂດຍໃນປີນີ້ຄາດວ່າຈະມີໂອກາດສູງ ທີ່ຈະເຫັນຈຳນວນຝົນດາວຕົກ ຫລາຍກ່ວາປີຜ່ານມາ ເນື່ອງຈາກຈະມີຟ້າມືດ (ໃນບໍລິເວນປະເທດໄທ ແລະ ລາວ) ແລະ ຄາດວ່າຈະມີດາວຕົກຢູ່ລະຫວ່າງ 80-100 ດວງ ຕໍ່ຊົ່ວໂມງ ຊ່ວງເວລາດາວຕົກສູງສຸດ ແມ່ນໃນເວລາ 01:00 ຂອງວັນທີ 15 ທັນວາ.

ສຳລັບ ຝົນດາວຕົກເຈມິນິສ ແມ່ນເກີດຈາກ ການທີ່ໂລກເຄື່ອນທີ່ເຂົ້າໄປ ໃນບໍລິເວນກຸ່ມເສດຊາກດາວເຄາະນ້ອຍ 3002 ເຟດຣອນ ແລ້ວເກີດການສຽດສີ ກັບຊັ້ນບັນຍາກາດຂອງໂລກ ຈຶ່ງເຮັດໃຫ້ເກີດເປັນຝົນດາວຕົກ ສ່ວນໃຫຍ່ຈະເຫັນເປັນສີຂຽວ ແລະ ສີເຫລືອງ, ສຳລັບວິທີການເບິ່ງ ແມ່ນໃຫ້ນອນແຫງນໜ້າຂຶ້ນຟ້າ ຫັນໄປທາງທິດຕາເວັນອອກສຽງເໜືອ ຈຶ່ງຈະສາມາດເບິ່ງເຫັນໄດ້.