ສຳນັກຂ່າວຕ່າງປະເທດ ລາຍງານໃນວັນທີ 14 ທັນວານີ້ວ່າ ໃນມື້ວານນີ້ (13 ທັນວາ) ທ່ານ ບັນກີມູນ ເລຂາທິການໃຫຍ່ ອົງການສະຫະປະຊາຊາດ ໄດ້ກ່າວສະແດງ ຄວາມຊົມເຊີຍ ຕໍ່ໝາກຜົນທີ່ ບັນດາປະເທດຕ່າງໆ 195 ປະເທດ ທີ່ເປັນພາຄີອະນຸສັນຍາ ສະຫະປະຊາຊາດ ວ່າດ້ວຍການປ່ຽນແປງ ສະພາບພູມອາກາດ ຊຶ່ງຈັດກອງປະຊຸມ ສະໄໝທີ 21 ຫລື COP21 ທີ່ນະຄອນຫລວງປາຣີ ປະເທດຝຣັ່ງ ສາມາດບັນລຸຂໍ້ຕົກລົງຮ່ວມກັນ ໂດຍຈຸດປະສົງຂອງຂໍ້ຕົກລົງ ແມ່ນເພື່ອຫລຸດຜ່ອນ ປະລິມານການປ່ອຍອາຍກາກບອນ ຢູ່ໃນທົ່ວໂລກໃຫ້ຫລຸດລົງ ພ້ອມທັງສົ່ງເສີມການພັດທະນາ ເສດຖະກິດສີຂຽວ ແນໃສ່ແກ້ໄຂ ສະພາວະໂລກຮ້ອນ ໃຫ້ເປັນຮູບປະທຳ.