ຂະບວນຄະຣາວານລົດຫວນຄືນສູ່ຖິ່ນກຳເນີດທີ່ເມືອງວຽງໄຊ ແຂວງຫົວພັນ ໄດ້ເລີ່ມອອກເດີນທາງໃນວັນທີ 11-15 ທັນວາ 2015 ເລີ່ມຈາກນະຄອນຫລວງວຽງຈັນ ຜ່ານແຂວງບໍລິຄຳໄຊ, ແຂວງຊຽງຂວາງ ເຖິງ ແຂວງຫົວ ພັນ ໃນໄລຍະການເດີນທາງ 670 ກວ່າກິໂລແມັດ, ທັງນີ້ ເພື່ອເປັນການສ້າງຂະບວນການສະເຫລີມສະຫລອງວັນສະຖາປະນາ ສປປ ລາວຄົບຮອບ 40 ປີ ແລະ ວັນຄ້າຍວັນເກີດປະທານໄກສອນ ພົມວິຫານ ຄົບຮອບ 95 ປີ(13/12/1920-13/12/2015), ທັງເປັນການຫວນຄືນມູນເຊື້ອປະຕິວັດອັນພິລະອາດຫານຂອງປະຊາຊົນລາວ ບັນດາເຜົ່າ ແລະ ເປັນການໂຄສະນາ ສົ່ງເສີມການທ່ອງທ່ຽວບັນດາແຂວງພາກເໜືອຂອງລາວ.
ຂະບວນຄາຣາວານ ດັ່ງກ່າວ ມີລົດຫລາຍກວ່າ 100 ຄັນ ເຂົ້າຮ່ວມ ນຳໂດຍ ທ່ານ ສຈ.ດຣ. ບໍ່ແສງຄຳ ວົງດາລາ ລັດຖະມົນຕີວ່າການກະຊວງຖະແຫລງຂ່າວວັດທະນະທຳ ແລະ ທ່ອງທ່ຽວ, ມີຜູ້ຕາງໜ້າຈາກພາກສ່ວນຕ່າງໆລວມທັງພາກລັດ ແລະ ເອກະຊົນເຂົ້າຮ່ວມເປັນຈຳນວນຫລາຍ. ເຖິງຈະເປັນໄລຍະທາງໄກ ແຕ່ຜູ້ເຂົ້າຮ່ວມຈະໄດ້ຊົມທິວທັດທຳມະຊາດ,
ພູຜາປ່າໄມ້ອັນສວຍສົດງົດງາມຕາມສອງຟາກທາງ, ທ່ຽວຊົມແຫລງທ່ອງທ່ຽວທາງວັດທະນະ ທຳ ແລະ ປະຫວັດສາດຈຳນວນໜຶ່ງ ຢູ່ແຂວງຊຽງຂວາງຄື: ວັດເກົ່າເມືອງຄູນ, ທົ່ງໄຫຫີນ, ພູກູດຈອມເຫລັກວິລະຊົນ ແລະ ຖ້ຳປິວເຫດໂລກຄາດຕະກຳທີ່ເມືອງຄຳ, ສຳລັບຢູ່ແຂວງຫົວພັນ ກໍຈະໄດ້ພົບເຫັນຕາດສະເຫລີຍ ແລະ ບັນດາຖ້ຳຜູ້ນຳທີ່ເມືອງວຽງໄຊ ແລະ ອື່ນໆ, ຊຶ່ງພິເສດຜູ້ເຂົ້າຮ່ວມວາງກະຕ່າດອກໄມ້ ເພື່ອຄຳນັບອະນຸສາວະລີ ປະທານໄກສອນ ພົມວິຫານ ທີ່ເມືອງວຽງໄຊ ແລະ ຮ່ວມງານໂຮມຊຸມນຸມໃຫຍ່ສະເຫລີມຫລອງວັນສະຖາປະນາ ສປປ ລາວ ຄົບຮອບ 40ປີ ແລະ ວັນເກີດປະທານໄກສອນ ພົມວິຫານຄົບຮອບ 95 ປີ. ຄາດວ່າຂະບວນຄາລະວານໃຫຍ່ຄັ້ງນີ້ ຈະດຳເນີນໄປຮອດວັນທີ 15 ທັນວານີ້ ຈຶ່ງຈະກັບວຽງຈັນ.
ແຫ່ລງຂ່າວ
