ຂປລ. ໃນວັນທີ 12 ທັນວາ 2015 ນີ້ ໄດ້ຈັດພິທີວາງສີລາເລີກ ກໍ່ສ້າງສະຖານີວິທະຍຸ ແລະ ໂທລະພາບເຂດ ຢູ່ເມືອງພະລານໄຊ ແຂວງສະຫວັນນະເຂດ ໂດຍໃຫ້ກຽດເຂົ້າຮ່ວມຂອງ ທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ, ຜູ້ຊີ້ນໍາວຽກງານເສດຖະກິດການຜະລິດ ແລະ ຈໍລະຈອນ, ທ່ານ ສົມດີ ດວງດີ ລັດຖະມົນຕີວ່າການກະຊວງແຜນການ ແລະ ການລົງທຶນ, ທ່ານ ບຸ່ຍກວາງວິງ ລັດຖະມົນຕີວ່າການກະຊວງແຜນການ ແລະ ການລົງທຶນ ສສ ຫວຽດນາມ, ທ່ານ ດຣ. ສຸພັນ ແກ້ວມີໄຊ ເຈົ້າແຂວງໆສະຫວັນນະເຂດ, ມີບັນດາຮອງເຈົ້າແຂວງ, ລັດຖະມົນຕີວ່າການ, ຊ່ວຍວ່າການ ພ້ອມດ້ວຍພະນັກງານກ່ຽວຂ້ອງຂອງ ສປປ ລາວ ແລະ ສສ ຫວຽດນາມເຂົ້າຮ່ວມຢ່າງພ້ອມພຽງ.
ທ່ານ ສະຫວັນຄອນ ຣາຊມຸນຕີ ລັດຖະມົນຕີຊ່ວຍວ່າການ ກະຊວງຖະແຫລງຂ່າວ ວັດທະນະທໍາ ແລະ ທ່ອງທ່ຽວ ໄດ້ກ່າວລະຫວ່າງ ພິທີວາງສີລາເລີກວ່າ: ໂຄງການກໍ່ສ້າງສະຖານີຖ່າຍທອດວິທະຍຸ ແລະ ໂທລະພາບ ເຂດເປັນໂຄງການຮ່ວມມືຊ່ວຍເຫລືອຂອງລັດຖະບານ ສສ ຫວຽດນາມ ຍາມໃດກໍໄດ້ເອົາໃຈໃສ່ຊ່ວຍເຫລືອ ໃຫ້ແກ່ລັດຖະບານ ແລະ ປະຊາຊົນລາວຕະຫລອດມາ, ສະຖານີແຫ່ງນີ້ ແມ່ນໜຶ່ງໃນ 4 ສະຖານີວິທະຍຸ ແລະ ໂທລະພາບຮ່ວມມື ລາວ-ຫວຽດນາມ ເຊິ່ງໄດ້ເລີ່ມປະຕິບັດໂຄງການ ມາແຕ່ ປີ2009 ໄດ້ສໍາເລັດກໍສ້າງ ແລະ ເປີດນໍາໃຊ້ເປັນທາງການແລ້ວ 2 ແຫ່ງຄື ຢູ່ແຂວງຫລວງພະບາງ ແລະ ຈໍາປາສັກ ສ່ວນແຫ່ງທີ່ 3 ແມ່ນຢູ່ແຂວງອຸດົມໄຊ ແລະ ການ ກໍ່ສ້າງໄກ້ຈະສໍາເລັດແລ້ວຄາດວ່າຈະເປີດນໍາໃຊ້ໃນທ້າຍປີນີ້ ໂຄງການກໍ່ສ້າງສະຖານີວິທະຍຸ ແລະ ໂທລະພາບເຂດທີ່ເມືອງພະລານໄຊ, ແຂວງສະຫວັນນະເຂດນີ້ ເປັນແຫ່ງທີ 4 ເມື່ອສໍາເລັດການກໍ່ສ້າງຈະເຮັດໃຫ້ການແຜ່ກະຈາຍສັນຍານວິທະນຸກວມ ເຖິງ 95% ແລະ ຄື້ນໂທລະພາບພາກພື້ນດິນ ໃນປະເທດເຮົາກວມ 85% ຂອງພື້ນທີ່ທົ່ວປະເທດ ເຊິ່ງຈະເປັນບ່ອນນໍາຂໍ້ມູນຂ່າວສານທາງສະຖານີວິທະຍຸ ແລະ ໂທລະພາບລົງພື້ນຖານຂອງປະຊາຊົນລາວບັນດາເຜົ່າ ພາຍໃນ ແລະ ບັນດາແຂວງໄກ້ຄຽງໄດ້ຮັບຮູ້ແນວທາງນະໂຍບາຍຂອງພັກ, ລະບຽບກົດໝາຍຂອງລັດ ແລະ ຂໍ້ມູນຂ່າວສານ ສາລະໜ້າຮູ້ຕ່າງໆໄດ້ຢ່າງວອງໄວ ແລະ ຊັດເຈນຂຶ້ນ ທັງ ເປັນເວທີສົ່ງເສີມຊຸກຍູ້ການພົວພັນຮ່ວມມືແບບພິເສດຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມອັນເປັນມູນເຊື້ອ ໃຫ້ນັບມື້ແຕດກດອກອອກຜົນຂຶ້ນເລື້ອຍໆ ໂຄງການກໍ່ສ້າງສະຖານີວິທະຍຸ ແລະ ໂທລະພາບເຂດທີ່ເມືອງທ່າພະລານໄຊ ແຂວງສະຫວັນນະເຂດນີ້ ມີມູນຄ່າ 116.807 ຕື້ດົງ (ສະກຸນເງີນຫວຽດນາມ) .
ໃນໂອກາດນີ້ ທ່ານ ສະຫວັນຄອນ ຮາຊມຸນຕີ ໄດ້ສະ ແດງຄວາມຮູ້ບຸນຄຸນຂອບໃຈເປັນຢ່າງສູງຕໍ່ພັກ-ລັດ ແລະ ປະຊາຊົນຫວຽດນາມອ້າຍນ້ອງ ໂດຍສະເພາະຢ່າງຍິງແມ່ນວິທະຍຸກະຈາຍສຽງ ແຫ່ງຊາດ ຫວຽດນາມທີ່ໄດ້ໃຫ້ການຊ່ວຍເຫລືອອັນລໍ້າຄ່າ ໃຫ້ແກ່ ສປປ ລາວ ພ້ອມທັງໄດ້ຮຽກຮ້ອງໃຫ້ທຸກພາກສ່ວນອໍານາດການປົກຄອງແຕ່ລະຂັ້ນ ກໍຄື ພໍ່ແມ່ປະຊາຊົນເມືອງພະລານໄຊທຸກຄົນຈົງເອົາໃຈໃສ່ປົກປັກຮັກສາ ແລະ ນໍາໃຊ້ສະຖານີດັ່ງກ່າວໃຫ້ມີຄວາມຍືນຍົງ, ມີປະສິດທິຜົນສູງ ແລະ ຊົມໃຊ້ສະຖານີແຫ່ງນີ້ ໃຫ້ເກີດປະໂຫຍດສູງສຸດ.
ໂຄງການກໍ່ສ້າງສະຖານີວິທະຍຸ ແລະ ໂທລະພາບເຂດແຫ່ງນີ້ ປະກອບ ມີເສົາສັນຍານສູງ 135 ແມັດ, ຕືກອາຄານຕັ້ງເຄື່ອງຈັກສົ່ງສັນຍານ, ອາຄານຫ້ອງການ, ອາຄານຫໍພັກພະນັກງານ, ສະຖາທີ່ຈອດລົດ, ເປົ້າຍາມ, ປະໂຕໂຂງ, ກໍາ ແພງອ້ອມຮອບສະຖານີ, ລະບົບໂຄງລ່າງ, ປູພື້ນ, ລະບົບໄຟຟ້າ, ລະບົບຮອງລະບາຍນ້ຳ, ສະໜາມສວນດອກໄມ້, ເສັ້ນທາງເຂົ້າສະຖານີ ແລະ ລະບົບ ເສັ້ນທາງພາຍໃນ, ໝໍ້ແປງໄຟ, ລະບົບກັນຟ້າຜ່າ, ສາຍໄຟຂະໜາດກາງຕໍ່ກັບສາຍໄຟຫລວງແຫ່ງຊາດ, ອ່າງນ້ຳໃຕ້ດິນ, ນ້ຳປະປາ, ຖັງນ້ຳ, ລະບົບໄຟດັບເພີງ ແລະ ອື່ນໆ.
ແຫລ່ງຂ່າວ:
