ສຳນັກຂ່າວຕ່າງປະເທດ ລາຍງານໃນວັນທີ 11 ທັນວາຜ່ານມານີ້ວ່າ ທ່ານ ຈອນ ແຄຣີ ລັດຖະມົນຕີຕ່າງປະເທດ ສະຫະລັດອາເມຣິກາ ຈະເດີນທາງໄປ ນະຄອນຫລວງມົດສະກູ ໃນວັນທີ 15 ທັນວານີ້ ເພື່ອຫາລືກັນກັບ ປະທານາທິບໍດີ ວະລາດິເມຍ ປູຕິນ ກ່ຽວກັບບັນຫາວິກິດການ ສົງຄາມກາງເມືອງຊີຣີ ແລະ ການຕໍ່ສູ້ປາບປາມ ກຸ່ມລັດອິດສະລາມ ຫລື ໄອເອັສ.

ທັງນີ້ ເນື່ອງຈາກທັງສອງຝ່າຍ ເປັນປະເທດມະຫາອຳນາດ ທີ່ມີບົດບາດສຳຄັນ ໃນການແກ້ໄຂບັນຫາ ສົງຄາມກາງເມືອງຢູ່ຊີຣີ ຊຶ່ງດ້ານສະຫະລັດອາເມຣິກາ ແມ່ນມີຈຸດຢືນ ຕໍ່ຕ້ານລັດຖະບານຊີຣີ ທີ່ມາຈາກການເລືອກຕັ້ງຢ່າງຈະແຈ້ງ ຊຶ່ງກົງກັນຂ້າມ ກັບທ່າທີຂອງຣັດເຊຍ ທີ່ໃຫ້ການສະໜັບສະໜູນ ລັດຖະບານຊີຣີ ພາຍໃຕ້ການນຳຂອງ ທ່ານ ບາຊາ ອັນ-ອັດຊາດ ປະທານາທິບໍດີ ແຫ່ງ ຊີຣີ.