ສຳນັກຂ່າວຕ່າງປະເທດ ລາຍງານໃນວັນທີ 12 ທັນວານີ້ວ່າ ເກີດເຫດສະມາຊິກ ລັດຖະສະພາອູແກຣນ ເປີດເສິກຊົກມວຍກັນກາງສະພາ ໃນວັນສຸກທີ 11 ທັນວາຜ່ານມານີ້ ຫລັງຈາກທີ່ ທ່ານ ໂອເລກ ບານາ ສະມາຊິກສະພາທ່ານໜຶ່ງ ໄດ້ຍ່າງເອົາດອກໄມ້ສີແດງ ຍື່ນໃຫ້ແກ່ ທ່ານ ອາເຊນີ ຢັດເຊນຢຸກ ນາຍົກລັດຖະມົນຕີອູແກຣນ ທີ່ກຳລັງຢືນປາໄສຢູ່ກາງສະພາ ຫລັງຈາກນັ້ນ ທ່ານ ບານາ ກໍເອົາມືສອດຫວ່າງຂາ ນາຍົກລັດຖະມົນຕີ ແລ້ວອູ້ມລົງຈາກບ່ອນປາໄສ ເຮັດໃຫ້ສະມາຊິກສະພາທ່ານອື່ນ ອີກປະມານສິບຄົນ ທີ່ສະໜັບສະໜູນນາຍົກລັດຖະມົນຕີ ອອກມາຂັດຂວາງ ແລະ ແລກໝັດກັນກາງສະພາ.

ທັງນີ້ ເນື່ອງຈາກລັດຖະບານອູແກຣນຊຸດປັດຈຸບັນ ເປັນລັດຖະບານປະສົມ ທີ່ຝັກໄຝ່ຕາເວັນຕົກ ປະກອບດ້ວຍສະມາຊິກສະພາ ຈາກຫລາຍພັກ ແລະ ກຸ່ມການເມືອງ ຈຶ່ງເຮັດໃຫ້ເກີດຄວາມແຕກແຍກ ໃນຂະນະທີ່ປະເທດ ກຳລັງປະເຊີນກັບ ວິກິດການທາງດ້ານເສດຖະກິດ ແລະ ສົງຄາມກາງເມືອງ ກັບກຸ່ມຕໍ່ຕ້ານ ທີແຍກຕົວອອກ ໄປຂຶ້ນກັບຣັດເຊຍ.