​ຂະ​ບວນ​ຄາຣາວານລົດ ຫວນ​ຄືນສູ່​ຖິ່ນ​ກຳ​ເນີ​ດ ທີ່​​ເມືອງ​ວຽງ​ໄຊ ​ແຂວງ​ຫົວ​ພັນ ໄດ້​​ເລີ່​ມອອກ​ເດີນທາງ ​ໃນ​ວັນ​ທີ 11-15 ທັນວາ 2015 ​ເລີ່​ມຈາກ​ນະຄອນຫລວງ​ວຽງຈັນ ຜ່ານ​ແຂວງ​ບໍລິ​ຄຳ​ໄຊ-​ແຂວງ​ຊຽງຂວາງ ​ເຂົ້າ​ແຂວງຫົວພັນ ​​ໃນໄລຍະ​ການ​ເດີນທາງ 670 ກວ່າ​ກິ​ໂລ​ແມັດ ​ທັງ​ນີ້, ເພື່ອເປັນ​ການ​ສ້າງ​ຂະ​ບວນການສະ​ເຫລີ​ມສະຫລອງ​ ວັນ​ສະຖາ​ປານາ ສປປ ລາວ ຄົບຮອບ 40 ປີ ​ແລະ ວັນ​ຄ້າຍ​ວັນ​ເກີດ​ປະທານ​ໄກສອນ​ພົມວິຫານ​ ຄົບຮອບ 95 ປີ (13/12/1920-13/12/2015) ທັງເປັນ​ການ​ຫວນ​ຄືນ​ມູນ​ເຊື້ອປະຕິ​ວັດ ອັນ​ພິລະ​ອາດ​ຫານ​ຂອງ​ປະຊາຊົນ​ລາວບັນດາ​ເຜົ່າ ​ແລະ​ ເປັນ​ການ​ໂຄສະນາ ​ສົ່ງ​ເສີມ​ການທ່ອງທ່ຽວ ບັນດາ​ແຂວງ​ພາກ​ເໜືອຂອງ​ລາວ.

​ຂະ​ບວນຄາຣາວານ​ ດັ່ງກ່າວ ມີ​ລົດ​ຫລາຍ​ກວ່າ 100 ຄັນ ​ເຂົ້າ​ຮ່ວມ ນຳ​ໂດຍ ທ່ານ ສຈ.ດຣ. ບໍ່​ແສງ​ຄຳ ວົງ​ດາລາ ລັດຖະມົນຕີ​ວ່າການ​ກະຊວງ​ຖະ​ແຫລ​ງຂ່າວ​, ວັດທະນະທຳ ​ແລະ ທ່ອງ​ທ່ຽວ, ​ມີ​ຜູ້ຕາງໜ້າ​ຈາກ​ພາກສ່ວນ​ຕ່າງໆ​ ທັງ​ພາກ​ລັດ ​ແລະ ​ເອກະ​ຊົນ ​ເຂົ້າ​ຮ່ວມ ​ເປັນ​ຈຳນວນ​ຫລາຍ ​ເຖິງ​ຈະ​ເປັນ​ໄລຍະ​ທາງ​ໄກ ​ແຕ່​ຜູ້​ເຂົ້າ​ຮ່ວມ​ຈະ​ໄດ້​ຊົມ​ທິວ​ທັດ​ທຳ​ມະ​ຊາດ, ພູຜາ​ປ່າ​ໄມ້​ ອັນ​ສວຍ​ສົດ​ງົດ​ງາມ​ຕາມ​ສອງ​ຝາກ​ທາງ, ທ່ຽວ​ຊົມ​ແຫລ່ງທ່ອງ​ທ່ຽວ​ທາງ​ວັດທະນະທຳ ​ແລະ ປະຫວັດສາດ​ຈຳນວນ​ໜຶ່ງ ຢູ່ ​ແຂວງ​ຊຽງ​ຂວາງ ຄື: ວັດ​ເກົ່າ​ເມືອງ​ຄູນ, ທົ່ງ​ໄຫ​ຫີນ, ພູ​ກູດ​ຈອມ​ເຫລັກ​ວິລະ​ຊົນ ​ແລະ ຖ້ຳ​ປິວ​ເຫດ​ໂລກ​ຄາດ​ຕະກຳ ​ເມືອງ​ຄຳ. ສຳລັບ​ຢູ່ ​ແຂວງ​ຫົວພັນ ກໍ​ຈະ​ໄດ້​ທ່ຽວ​ຊົມ​ຕາດ​ສະ​ເຫລີ​ຍ ​ແລະ ບັນດາ​ຖ້ຳ​ຜູ້ນຳ ທີ່​ເມືອງ​ວຽງ​ໄຊ ​ແລະ ອື່ນໆ. ພິ​ເສດ ຜູ້​ເຂົ້າ​ຮ່ວມ​ຂະ​ບວນຄາຣາວາດ​ ຄັ້ງ​ນີ້, ຍັງ​ຈະ​ໄດ້​ຮ່ວມ​ວາງ​ກະຕ່າ​ດອກ​ໄມ້ ​ເພື່ອ​ຄຳນັບ​ອະນຸສາວະລີ​ປະທານ​​ໄກສອນ​ພົມວິຫານ ທີ່​ເມືອງ​ວຽງ​ໄຊ ​ແລະ ຮ່ວມ​ງານ​ໂຮມ​ຊຸມນຸມ​ໃຫຍ່ ສະ​ເຫລີ​ມສະຫລອງ​ວັນ​ສະຖາ​ປານາ ສປປ ລາວ ຄົບຮອບ 40 ປີ ​ແລະ ວັນ​ຄ້າຍ​ວັນ​ເກີດ​ປະທານ​ໄກສອນ​ພົມວິຫານ ຄົບ​ຮອບ 95 ປີ. ຂະ​ບວນຄາຣາວານ ດັ່ງກ່າວ ຈະ​ດຳ​ເນີນ​ໄປ​ຮອດວັນ​ທີ 15 ທັນວາ ຈິ່ງ​ຈະ​ກັບ​ຄືນ​ສູ່​ນະຄອນຫລວງ​ວຽງ​ຈັນ./.

ແຫ່ລງຂ່າວ