ຕາມ​ການ​ໃຫ້​ຂໍ້​ມູນ​ຂອງ​ທ່ານ ຊົງ ຮຸຍ ຮົງ ຜູ້ອຳນວຍການ ບໍລິສັດ​ໄຟຟ້າ​ນ້ຳ​ງື່ມ 5 ຈຳກັດ ໃນ​ວັນ​ທີ 29 ທັນວາ 2013 ທີ່​ຜ່ານ​ມາ ໃຫ້​ຮູ້​ວ່າ: ເຂື່ອນ​ໄຟຟ້າ​ນ້ຳ​ງື່ມ 5 ໄດ້​ບັນລຸ​ເປົ້າ​ໝາຍ​ໃນ​ການ​ຜະລິດ​ພະລັງງານ​ໄຟຟ້າ ເພື່ອ​ຈຳໜ່າຍ​ປະຈຳ​ປີ 2013 ກ່ອນ​ຈະ​ເຖິງ​ກຳນົດ​ເວລາ​ສາມ​ວັນ ເຊິ່ງ​ສາມາດ​ວັດແທກ​ພະລັງງານ​ທີ່​ຜະລິດ​ໄດ້ ຈຳນວນ 500.681.100 ກິ​ໂລ​ວັດ​ໂມງ.

ເຂື່ອນ​ໄຟຟ້າ​ນ້ຳ​ງື່ມ 5 ຕັ້ງ​ຢູ່​ເຂດ​ເມືອງ​ພູ​ຄູນ ແຂວງ​ຫຼວງ​ພະ​ບາງ ແລະ ເມືອງ​ພູ​ກູດ ແຂວງ​ຊຽງ​ຂວາງ ປະກອບ​ດ້ວຍ​ຈັກ​ປັ່ນ​ໄຟຟ້າ 2 ເຄື່ອງ ມີ​ກຳລັງ​ຕິດ​ຕັ້ງ​ທັງ​ໝົດ 120 ເມ​ກາ​ວັດ ສາມາດ​ຜະລິດ​ພະລັງງານ​ໄດ້ 500 ລ້ານ​ກິ​ໂລ​ວັດ​ໂມງ​ຕໍ່​ປີ ຊຶ່ງ​ເປັນ​ໂຄງການ​ທຳ​ອິດ​ຂອງ​ບໍລິສັດ ຊີ​ໂນ​ໄຮ​ໂດຼ (sinohydro) ທີ່​ມາ​ລົງທຶນ​ຢູ່ ​ສປປ ລາວ ໃນ​ຮູບ​ແບບ BOT ໂດຍ​ມີ​ໄລຍະ​ເວລາ​ສຳ​ປະທານ 25 ປີ ເຂື່ອນ​ໄຟຟ້າ​ດັ່ງກ່າວ ໄດ້​ເລີ່ມ​ລົງມື​ກໍ່ສ້າງ​ໃນ​ເດືອນ​ຕຸລາ​ປີ 2008 ແລະ ໃນ​ວັນ​ທີ 2 ທັນວາ ປີ 2012 ກໍ່​ໄດ້​ເລີ່ມ​ດຳເນີນ​ການ​ຜະລິດ​ໄຟຟ້າ​ຢ່າງ​ເປັນ​ທາງ​ການ.

ໃນ​ການ​ດຳເນີນ​ງານ​ປີ​ທຳ​ອິດ​ຂອງ​ເຂື່ອນ​ໄຟຟ້າ​ນ້ຳ​ງື່ມ 5 ກໍ່​ໄດ້​ປະສົບ​ກັບ​ສະຖານະ​ການ​ຂາດແຄນ​ນ້ຳ​ໃນ​ຮອບ​ຫຼາຍ​ປີ ເຊິ່ງ​ເປັນ​ເຫດ​ໃຫ້​ມີ​ຄວາມ​ຫຍຸ້ງຍາກ​ຫຼາຍ​ໃນ​ການ​ຜະລິດ​ໄຟຟ້າ ດັ່ງນັ້ນ ບໍລິສັດ​ຈຶ່ງ​ໄດ້​ມີ​ການ​ວິເຄາະ ແລະ ມີ​ການ​ວາງ​ແຜນ​ຢ່າງ​ລະມັດລະວັງ​ທີ່​ສຸດ ເພື່ອ​ເຮັດ​ໃຫ້ການ​ບໍລິຫານ​ຈັດການ​ນ້ຳ​ໃຫ້​ມີ​ປະ​ສິດທິ​ຜົນ​ຢ່າງ​ສູງ​ສຸດ ໂດຍ​ມີ​ການ​ຄຳນວນ​ໃນ​ແບບ​ວິທະຍາສາດ ເພື່ອ​ວາງ​ແຜນ​ໃນ​ການ​ບໍລິຫານ​ນ້ຳ ມີ​ການ​ຄວບ​ຄຸມ​ລະດັບ​ນ້ຳ​ໃນ​ອ່າງ ໃຫ້​ແທດເໝາະ​ກັບ​ການ​ຄາດ​ຄະເນ​ປະລິມານ​ນ້ຳ​ໄຫຼ​ເຂົ້າ​ອ່າງ ມີ​ການ​ວາງ​ແຜນການ​ຜະລິດ​ໄຟຟ້າ ໂດຍ​ຈັດ​ແບ່ງ​ປະລິມານ​ນ້ຳ ຕາມ​ຄວາມ​ເໝາະ​ສົມ​ກັບ​ລະດູ​ການ ສ້າງ​ຄວາມ​ສົມ​ດຸນ​ຂອງ​ການ​ເກັບ​ກັກ​ນ້ຳ ແລະ ການ​ປ່ອຍ​ນ້ຳ​ຜະລິດ​ພະລັງງານ​ໄຟຟ້າ ຮັບປະກັນ​ການ​ທຳ​ງານ​ຂອງ​ເຄື່ອງ​ຈັກ ໃຫ້​ມີ​ປະສິດທິພາບ​ສູງ​ສຸດ ຫຼຸດຜ່ອນ​ອັດຕາ​ການ​ນຳ​ໃຊ້​ນ້ຳ​ຢ່າງ​ສິ້ນ​ເປືອງ ແລະ ໃຫ້​ມີ​ຜົນ​ກະທົບ​ໜ້ອຍ​ທີ່​ສຸດ​ຂອງ​ການ​ໃຊ້​ນ້ຳ​ແຕ່​ລະ​ຢົດ ນຳ​ໃຊ້​ຊັບພະຍາກອນ​ນ້ຳ ຢ່າງ​ມີ​ຄຸນຄ່າ​ເຂົ້າ​ຜະລິດ​ໄຟຟ້າ ພ້ອມ​ດຽວ​ກັນ​ນັ້ນ ກໍ່​ໄດ້​ມີ​ການ​ຕິດຕາມ​ກວດກາ​ເຄື່ອງ​ຈັກ ຊຶ່ງ​ເຫັນ​ໄດ້​ວ່າ​ໃນ​ໄລຍະ​ຜ່ານ​ມາ ບໍ່​ພົບ​ຄວາມ​ຜິດ​ປົກກະຕິ​ໃດໆ​ເກີດ​ຂຶ້ນ ນັ້ນ​ເປັນ​ສິ່ງ​ສະແດງ​ໃຫ້​ເຫັນ​ວ່າ ອຸປະກອນ ແລະ ເຄື່ອງ​ຈັກ​ຕ່າງໆ ມີ​ຄວາມ​ຮັບປະກັນ​ທາງ​ດ້ານ​ເຕັກນິກ ແລະ ຄຸນ​ນະ​ພາບ.

ໃນ​ໄລຍະ​ໜຶ່ງ​ປີ​ທີ່​ຜ່ານ​ມາ ຜູ້ນຳ​ທຸກ​ລະດັບ​ຂອງ​ບໍລິສັດ ຊີ​ໂນ​ໄຮ​ໂດຼ (sinohydro) ໄດ້​ເອົາໃຈໃສ່​ດູ​ແລ ແລະ ສະໜັບສະໜູນ​ພະນັກງານ​ທັງ​ໝົດ​ຂອງ​ບໍລິສັດ ທີ່​ໄດ້​ເອົາໃຈໃສ່​ສູ້​ຊົນ​ໃນ​ການ​ປະຕິບັດ​ໜ້າທີ່​ວຽກ​ງານ​ຕາມ​ຫຼັກການ​ທີ່​ ວ່າ: “ຄວາມ​ປອດ​ໄພ​ຕ້ອງ​ມາ​ກ່ອນ” ໂດຍ​ມີ​ການ​ກວດກາ ແລະ ບຳລຸງ​ຮັກສາ​ຢ່າງ​ເປັນ​ໄລຍະ ເພື່ອ​ເຮັດ​ໃຫ້​ໂຕ​ເຂື່ອນ​ມີ​ຄວາມ​ໝັ້ນຄົງ ມີ​ປະສິດທິພາບ ແລະ ຮັບປະກັນ​ໃນ​ການ​ດຳເນີນ​ງານ​ຢ່າງ​ຕໍ່​ເນື່ອງ ພ້ອມ​ກັນ​ນັ້ນ ກໍ່​ໄດ້​ເອົາໃຈໃສ່​ໃນ​ການ​ປ້ອງ​ກັນ​ເວນຍາມ ຮັກສາ​ຄວາມ​ປອດ​ໄພ​ຢ່າງ​ເປັນ​ປົກກະຕິ.

ໄຊຊະນະ​ໃນ​ປີ​ທຳ​ອິດ​ຂອງ​ເຂື່ອນ​ໄຟຟ້າ​ນ້ຳ​ງື່ມ 5 ໃນ​ການ​ດຳເນີນ​ງານ​ການ​ຄ້າ ແມ່ນ​ເປັນ​ແບບຢ່າງ​ຂອງ​ຜົນສຳເລັດ ໃນ​ການ​ລົງທຶນ​ຂອງ​ບໍລິສັດ ຊີ​ໂນ​ໄຮ​ໂດຼ ແລະ ຍັງ​ເປັນ​ຂີດ​ໝາຍ​ແຫ່ງ​ຜົນສຳເລັດ ແລະ ໝາກຜົນ​ທີ່​ສຳຄັນ​ຂອງ​ການ​ຮ່ວມ​ມື ລະຫວ່າງ​ສອງ​ປະເທດ ​ສປປ ລາວ ແລະ ​ສປ.ຈີນ ນຳ​ອີກ​ດ້ວຍ ພ້ອມ​ກັນ​ນີ້ ມັນ​ຍັງ​ສະແດງ​ໃຫ້​ເຫັນ​ເຖິງ​ປະສິດທິພາບ ແລະ ຄວາມ​ເຂັ້ມແຂງ​ຂອງ​ໂຄງການ​ໄຟຟ້າ​ພະລັງ​ນ້ຳ​ແຫ່ງ ​ສປ.ຈີນ ຢ່າງ​ແທ້​ຈິງ

ທີ່ມາ http://www.vientianemai.net/teen/khao/1/10909