ປັດຈຸບັນອຳນາດການປົກຄອງເມືອງ ແລະ ພໍ່ແມ່ປະຊາຊົນເມືອງປາກງື່ມ ນະຄອນຫຼວງວຽງຈັນ ໄດ້ເອົາໃຈໃສ່ຢ່າງຕັ້ງໜ້າ ເຂົ້າໃນການປະຕິບັດແນວທາງນະໂຍບາຍຂອງພັກ ເພື່ອສ້າງພື້ນຖານເສດຖະກິດໃຫ້ມີຄວາມເຂັ້ມແຂງ ຍົກລະດັບຊີວິດການເປັນຢູ່ໃຫ້ນັບມື້ດີຂຶ້ນເປັນກ້າວໆ ເປັນຕົ້ນແມ່ນການຜະລິດເປັນສິນຄ້າ 1 ເມືອງ 1 ຜະລິດຕະພັນ (ໂອດັອບ) ຕິດພັນກັບວຽກງານກໍ່ສ້າງຮາກຖານບ້ານ ແລະ ກຸ່ມບ້ານພັດທະນາ.
ອຳນາດການປົກຄອງເມືອງປາກງື່ມ ໄດ້ມີການກຳນົດເຂດການຜະລິດ ເພື່ອຊຸກຍູ້ເສດຖະກິດຕາມພູມມີສາດຂອງເມືອງຄື: ເຂດລຽບຕາມແຄມແມ່ນ້ຳຂອງ ເໝາະສົມແກ່ການຜະລິດເຂົ້າ ການສ້າງຟາມລ້ຽງສັດ ເຂດລຽບເສັ້ນທາງເລກທີ 13 ໃຕ້ ກຳນົດເປັນເຂດເສດຖະກິດການຄ້າ-ບໍລິການ ແລະ ເຂດລ່ອງແມ່ນ້ຳງື່ມ (ລຽບຕີນພູເຂົາຄວາຍ) ກຳນົດເປັນເຂດການລ້ຽງສັດໃຫຍ່ ແລະ ປູກພືດອຸດສາຫະກຳ-ກະສິກຳອິນຊີ ເຊິ່ງປັດຈຸບັນ ທົ່ວເມືອງປາກງື່ມມີຄອບຄົວຕົວແບບການຜະລິດເປັນສິນຄ້າ ຈຳນວນ 4 ກຸ່ມໃຫຍ່ຄື: ກຸ່ມປູກພືດຜັກອິນຊີ ບ້ານທ່າຊ້າງ ມີ 20 ຄອບຄົວ ກຸ່ມຜະລິດເຂົ້າຫອມບ້ານໂດນ 18 ຄອບຄົວ ຫັດຖະກຳຜະລິດກະເປົາ 1 ຄອບຄົວ ກຸ່ມຕ່ຳຫູກບ້ານຊຽງແລ ແລະ ບ້ານທ່າຊ້າງ 125 ຄອບຄົວ ແລະ ກຸ່ມປູກເຫັດບ້ານນາບົງ ມີ 40 ຄອບຄົວ.
ທີ່ມາ http://www.vientianemai.net/teen/khao/1/10906