ໃນວັນທີ 9 ທັນວານີ້, ກະຊວງສາທາລະນະສຸກຮ່ວມກັບອົງການອະນາໄມໂລກໄດ້ຈັດກອງປະ ຊຸມປຶກສາຫາລືການຈັດຕັ້ງປະຕິບັດວຽກງານສຸກເສີນດ້ານສາທາລະນະສຸກຂຶ້ນ, ທີ່ນະຄອນຫຼວງວຽງຈັນ ໂດຍການເຂົ້າຮ່ວມຂອງທ່ານສຈ. ດຣ. ເອກສະຫວ່າງ ວົງວິຈິດ ລັດຖະ ມົນຕີວ່າການກະຊວງສາທາລະນະສຸກ ແລະ ທ່ານ ດຣ ຈູລຽດ ໄຟລໂຊຄ໌ (Dr Juliet Fleischl) ຜູ້ຕາງໜ້າອົງການອະນາໄມໂລກປະຈຳ ສປປ ລາວ, ພ້ອມດ້ວຍຫົວໜ້າກົມ, ຮອງກົມຈາກກະຊວງ, ສະຖາບັນ, ໂຮງໝໍ ແລະ ພະແນກສາທາ ລະນະສຸກແຂວງຕ່າງໆເຂົ້າຮ່ວມນຳດ້ວຍ.
ທ່ານ ລັດເຖະມົນຕີວ່າການກະຊວງສາທາລະນະສຸກກ່າວໃນທີ່ປະຊຸມວ່າ: ເພື່ອສະເໜີແນວທາງ ແລະ ການແລກປ່ຽນຄວາມຄິດຄວາມເຫັນໃນການຈັດຕັ້ງປະຕິບັດວຽກງານສຸກເສີນດ້ານສາ ທາລະນະສຸກທັງຂັ້ນສູນກາງ ແລະຂັ້ນແຂວງ, ເພື່ອສະໜັບສະໜູນຄວາມອາດສາມາດຂອງຫ້ອງການສຸກເສີນດ້ານ
ສາທາລະນະສຸກລວມໄປເຖິງຂອດປະສານງານໃນວຽກງານດັ່ງກ່າວລະຫວ່າງກະຊວງສາທາລະນະສຸກກັບບັນດາກະຊວງຂະແໜງການທີ່ກ່ຽວຂ້ອງອື່ນໆ ແລະ ການກະກຽມສະກັດກັ້ນ ແລະ ຕອບໂຕ້ສະພາວະສຸກເສີນດ້ານສາທາລະນະສຸກທີ່ເກີດຂຶ້ນໃຫ້ທັນເວລາ ແລະ ມີປະສິດທິພາບຢ່າງເປັນປົກກະຕິ, ພ້ອມນັ້ນກໍປຶກສາຫາລືໃນການສ້າງຕັ້ງຫ້ອງການປະຕິບັດງານສຸກເສີນດ້ານສາທາລະນະສຸກຂຶ້ນຢູ່ໃນລະດັບແຂວງ ແລະ ເມືອງ, ສ້າງຄວາມເຂົ້າໃຈພາລະບົດບາດຂອງຫ້ອງການປະຕິບັດງານສຸກເສີນດ້ານສາທາລະນະສຸກ ແລະ ຄວາມຕ້ອງການສຳລັບໃນລະດັບແຂວງເພື່ອເຊື່ອມໂຍງຂໍ້ມູນຂ່າວສຸກເສີນດ້ານສາທາລະນະສຸກລະຫວ່າງສູນກາງ ແລະ ທ້ອງຖິ່ນຢ່າງມີປະສິດທິພາບ.
ຜູ້ຕາງໜ້າອົງການອະນາໄມໂລກກ່າວວ່າ: ຫ້ອງປະຕິບັດສຸກເສີນມີບົດບາດເປັນຈຸດບັນຊາການ ແລະ ຄວບຄຸມສິ່ງອຳນວຍຄວາມສະດວກຕ່າງໆ, ຊຶ່ງເປັນສະຖານທີ່ປະຕິບັດງານໃນການຕອບໂຕ້ທຸກເຫດການດ້ານສາທາລະນະສຸກ, ທັງເປັນສະຖາທີ່ໃນການກະກຽມແຜນງານ ແລະ ດຳເນີນງານໃນແຕ່ລະວັນ ແລະ ຍັງເປັນການດຳເນີນງານທີ່ກຽວພັນກັບວຽກງານອື່ນໆເຊັ່ນ: ເຝົ້າລະວັງເພື່ອປະເມີນຄວາມສ່ຽງ, ການສະກັດກັ້ນ ແລະ ຄວບຄຸມການຕິດເຊື້ອ,ການບົ່ງມະຕິທາງດ້ານຫ້ອງວິເຄາະ ແລະ ການສື່ສານເພື່ອຫຼຸດຜ່ອນຄວາມສ່ຽງ, ເພື່ອຮັບປະກັນວ່າພວກເຮົາສາມາດຄວບຄຸມການລະບາດຂອງພະຍາດຊືມເຊື້ອ ແລະ ຕອບໂຕ້ໄດ້ທັນກັບເວລາ.
ແຫ່ລງຂ່າວ
